Vei Filimoni 1:1-25
1 O yau o Paula, au kaivesu+ ena noqu vakabauti Karisito Jisu, kei Timoci+ na tacida, vei Filimoni na taci keirau lomani, na neirau itokani vakacakacaka,
2 vei Afia na ganei keirau, vei Akipo+ na neirau itokani sotia, kei na ivavakoso e dau soqoni ena nomu vale:+
3 Me tiko mada ga kei kemuni na loloma soli wale kei na vakacegu ni Kalou na Tamada kei na Turaga o Jisu Karisito.
4 Au dau vakavinavinaka vua na noqu Kalou niu cavuti iko ena noqu masu,+
5 niu dau rogoca na nomu vakabauta kei na nomu lomana na Turaga o Jisu kei ira kece na yalosavasava,
6 mo kua kina ni cegu ena nomu tukuna yani nomu vakabauta ni o sega ni lecava na veika vinaka kece eda vakila nida duavata kei Karisito.
7 Dua na ka na noqu marau kei na noqu vakacegu ena vuku ni nomu loloma taciqu, ni vakayaloqaqataki sara ga na lomadra na yalosavasava ena vukumu.
8 O koya gona, e dina ni tu vei au na galala meu vakaroti iko ena yaca i Karisito mo cakava na ka e dodonu,
9 au vakamasuti iko ga niu lomani iko, ena nomu raica ni o yau o Paula, au sa kenaturaga, au kaivesu tale ga ena vuku i Karisito Jisu.
10 Au vakamasuti iko ena vuku i luvequ o Onisimo,+ niu a tamana+ ena gauna au vesu tu kina.
11 A sega ni dau yaga vei iko e liu o koya, ia qo sa yaga vei iko vei au tale ga.
12 E lomaqu dina meu talai koya tale yani vei iko.
13 E rawa ni keirau sa tiko vata ga me kemu isosomi me qaravi au ena noqu vesu tu qo ena vuku ni itukutuku vinaka.+
14 Ia au sega ni via cakava e dua na ka ke o sega ni vakadonuya, me rawa ni vu mai lomamu na ka vinaka o cakava, mo kua ni vakasaurarataki kina.+
15 Qo na vuna e dro kina vakalekaleka,* mo rawa ni qai taukeni koya me tawamudu,
16 o sa na sega ni taukeni koya me vaka na bobula+ ni sa uasivia sara na bobula. E taciqu lomani,+ ia vei iko e nomu bobula, e tacimu tale ga ena cakacaka ni Turaga.
17 O koya gona, ke o noqu itokani, ciqomi koya ena loloma me vaka nomu ciqomi au.
18 Kena ikuri, ke cala vei iko se dinau vei iko, mo qai vola vei au.
19 O yau o Paula, na ivola qo au vola sara ga e ligaqu: Au na sauma—o kila vinaka ni o iko sara mada ga o dinautaka tu vei au na nomu bula.
20 Io taciqu, ena vuku ni Turaga, me yaga mada ga vei au na noqu kerei iko mo vakaceguya na lomaqu ena vuku i Karisito.
21 Au nuidei tu ni o na duavata kei na noqu gagadre, au volavola yani kina niu kila ni na uasivi sara na ka o cakava ni vakatauvatani kei na ka e kerei vei iko.
22 Ia me kena ikuri, vakarautaka tale ga e dua na noqu icili, niu nuitaka tu niu na soli tale yani vei kemuni ena vuku ni nomuni masu.+
23 E loloma yani vei iko o Epafira,+ o koya keirau vesu vata tiko ena vuku i Karisito Jisu,
24 eratou loloma tale tu ga yani o Marika, o Arisitako,+ o Timasa,+ kei Luke,+ eratou noqu itokani vakacakacaka.
25 Me tiko mada ga ena yalo oni vakaraitaka na loloma soli wale ni Turaga o Jisu Karisito.
iVakamacala e ra
^ Kir., “ena dua na aua.”
