Esiteri 7:1-10
7 E lako sara na tui vata kei Emani+ ina kanavata e vakarautaka o Ranadi Esiteri.
2 E kaya tale na tui vei Esiteri ena ikarua ni siga ni gunu waini: “Na cava o vinakata Ranadi Esiteri? Ena soli ga vei iko. Na cava o kerea? E rawa mada ga ni soli vei iko e veimama na noqu matanitu!”+
3 E kaya o Ranadi Esiteri: “Ke oni vakadonui au kemuni na tui, ke oni vinakata na tui, au kerea meu bula, au vakamasuti kemuni tale ga moni vakabulai ira na kainoqu.+
4 Ni keimami sa volitaki,+ o yau kei ira na kainoqu, me keimami vakawabokotaki, me keimami vakamatei, me keimami vakarusai.+ Ke keimami volitaki me tagane se yalewa bobula au na galu ga. Ia me kua ni yaco na ka rarawa qo ni na vakaleqa na tui.”
5 E kaya sara o Tui Esuerosi vei Ranadi Esiteri: “O cei qo, i vei o koya e bolea me vakayacora qo?”
6 E kaya o Esiteri: “Na tagane ca qo o Emani, na dauveisaqati, na meca.”
E rerevaki rau sara ga na tui kei na ranadi o Emani.
7 E tucake mai na gunu waini na tui ena cudru katakata me lako ina banisenikau ni valenitui, ia e tucake o Emani me vakamasuti Ranadi Esiteri me vakabulai koya ni kila ni na totogitaki koya na tui.
8 Ni lesu mai na tui ena basenikau ni valenitui me lako ina vale eratou gunu waini tiko kina, e raica ni sa cuva tu o Emani ena idavodavo e toka kina o Esiteri. E kaya ena domolevu na tui: “Ena kucuva tale ga na ranadi ena noqu vale?” Ni vosa oti ga na tui, era ubia sara na mata i Emani.
9 Ia e kaya o Apona+ e dua na vakailesilesi ni tui: “Sa vakarautaka tale tu ga o Emani e dua na kau me baleti Motekai,+ o koya e vakatakila na itukutuku me bula kina na tui.+ Sa tu mai na vale nei Emani, e 50 na kiupiti* na kena cere.” E kaya sara na tui: “Vakaliligi koya kina.”
10 Era mani vakaliligi Emani ena kau a vakarautaka me baleti Motekai, sa qai ruru na cudru katakata ni tui.
