Esiteri 4:1-17
4 Ni kila o Motekai+ na ka kece e yaco tiko,+ e dresulaka na nona isulu, e vakaisulutaga qai kaburaka vua na dravusa. E lako sara yani ena lomadonu ni koro, e tagi vakadomoilevu ena rarawa.
2 E lako sara me donuya na nona matamata na tui, ni sega ni rawa ni dua e vakaisulutaga me curu ina nona matamata na tui.
3 Ena yasana kece+ e yaco kina na vosa ni tui kei na nona lawa, era lolosi vakalevu na Jiu, era lolo,+ era tagi, era tagilagalaga. Levu era davo ena isulutaga kei na dravusa.+
4 Nira curu yani na goneyalewa dauveiqaravi nei Esiteri kei ratou na nona vakailesilesi liu mera tukuna vua, e rarawa sara ga na ranadi. E mani vakauta eso na isulu me dara o Motekai, me kua ni vakaisulutaga, ia e sega ni taura o koya.
5 Ni kila qori o Esiteri e kacivi Etaki sara e dua na nona vakailesilesi liu na tui, e lesi me qaravi Esiteri, mani vakaroti koya me lai tarogi Motekai ena ibalebale ni ka qo kei na ka e yaco tiko.
6 E mani lako o Etaki vei Motekai ena rara ni koro donuya na matamata ni tui.
7 E tukuna o Motekai na ka kece e yacovi koya kei na levu ni ilavo+ e yalataka o Emani me biuta ina valeniyau ni tui mera vakarusai kina na Jiu.+
8 E solia tale ga vua na ilavelave ni lawa volai e soli mai Susani*+ mera vakawabokotaki kina. Me lai vakaraitaka o koya vei Esiteri, me vakamacalataka vua qai vakaroti koya+ me lako vua na tui me vakamamasu vua, me kerekere vakadodonu vua me baleti ira na kainona.
9 E lesu o Etaki me lai tukuna vei Esiteri na vosa i Motekai.
10 E tukuna vei Etaki o Esiteri na ka me lai tukuna vei Motekai:+
11 “Era kila kece tu na dauveiqaravi ni tui kei ira na tiko ena yasana e lewa na tui, ke lako yani ina rara+ ni valenitui e dua na tagane se yalewa e sega ni kacivi, e dua ga na kena lawa: Me vakamatei o koya, ena bula ga ke dodoka vua na tui na nona ititoko vakatui koula.+ Au se sega mada ga ni kacivi meu lako vua na tui me 30 na siga.”
12 Ni tukuni vei Motekai na vosa nei Esiteri,
13 e tukuna lesu vei Esiteri: “Mo kua sara ni nanuma ni o na bula ni o tiko ena valenitui mo sega kina ni vakataki ira kece na vo ni Jiu.
14 Ke o galu tiko ena gauna qo, na nodra vukei kei na nodra vakabulai na Jiu ena lako mai na dua tale na vanua,+ ia o iko kei na vuvale nei tamamu oni na mate. O cei e kila de nakiti na nomu mai ranadi ena vuku ni gauna va qo?”+
15 E kaya o Esiteri vei Motekai:
16 “Mo lako, mo soqoni ira kece na Jiu era tiko e Susani,* moni lolo+ ena vukuqu. Ni kua ni kana se gunu ena bogi kei na siga me tolu na siga.+ Au na lolo tale ga kei ira na noqu goneyalewa dauveiqaravi. Au na lako vua na tui, na ka e tabu vakalawa, keu mate au na mate ga.”
17 E lako sara o Motekai me vakayacora na ka kece e vakaroti koya kina o Esiteri.
