Esera 7:1-28

  • Lako i Jerusalemi o Esera (1-10)

  • iVola nei Atakisekise vei Esera (11-26)

  • Vakacaucautaki Jiova o Esera (27-28)

7  Oti na ka kece qo ni se veiliutaki tiko o Tui Atakisekise+ e Perisia, sa qai lesu mai o Esera*+ na luvei Siraia,+ na luvei Asaraia, na luvei Ilikaia,+  na luvei Salumi, na luvei Setoki, na luvei Etupi,  na luvei Amaraia, na luvei Asaraia,+ na luvei Miraoci,  na luvei Seraia, na luvei Usai, na luvei Puki,  na luvei Episua, na luvei Finiasi,+ na luvei Eliesa,+ na luvei Eroni+ na iliuliu ni bete.  O Esera qo e lako cake mai Papiloni. E vunivola* o koya, e kila vinaka* na Lawa e vola o Mosese+ a solia o Jiova na Kalou ni Isireli. E vakadonuya na tui na ka kece e kerea, ni tiko vua na liga i Jiova na nona Kalou.  Ena ikavitu ni yabaki i Tui Atakisekise era lako cake i Jerusalemi eso na Isireli, o ira na bete, o ira na Livai,+ o ira na daulagasere,+ o ira na ivakatawa ni matamata+ kei ira na dauveiqaravi ena valenisoro.*+  E qai yaco i Jerusalemi o Esera ena ikalima ni vula, ena ikavitu ni yabaki ni tui.  E biubiu mai Papiloni ena imatai ni siga ena imatai ni vula qai yaco i Jerusalemi ena imatai ni siga ena ikalima ni vula, ni tiko vua na liga vinaka ni nona Kalou.+ 10  A vakarautaka na lomana* o Esera me vaqaqara ena Lawa i Jiova, me cakava,+ me vakavulica tale ga na kena ivakaro kei na lewa e Isireli.+ 11  Qo na ilavelave ni ivola a solia o Tui Atakisekise vei Esera na bete, na vunivola, e kenadau ena vulici* ni ivakaro i Jiova kei na nona lawa vei ira na Isireli: 12  *“O Atakisekise+ na nodra tui na tui, vei Esera na bete, e dau lavetaka na* Lawa ni Kalou ni lomalagi: Me levu mada ga na nomu vakacegu. Ia qo 13  au vakaroti ira kece era tiko ena noqu matanitu era lewe i Isireli kei ira na nodra bete kei ira na Livai era via lako vata kei iko i Jerusalemi, mera lako.+ 14  Ni talai iko mai na tui kei ratou na vitu na nona daunivakasala mo vaqaqa se sa vakayacori tiko e Juta kei Jerusalemi na Lawa ni nomu Kalou e tiko vei iko,* 15  me kau tale ga na siliva kei na koula e solia mai vu ni lomana na tui kei ratou na nona daunivakasala vua na Kalou ni Isireli, e tiko mai Jerusalemi na nona vale, 16  vaka kina na siliva kei na koula kece e soli* vei iko ena yasana taucoko o Papiloni, na nodra iloloma na lewenivanua kei na ka era cautaka na bete ina vale ni nodra Kalou e tiko e Jerusalemi.+ 17  Mo volia vakatotolo ena ilavo qo na bulumakau tagane,+ na tamanisipi,+ na lami,+ vaka kina na nodra isoro covuata+ kei na nodra isoro livi,+ mo qai cabora ena icabocabonisoro ni vale ni nomuni Kalou e Jerusalemi. 18  “Mo cakava ena vo ni siliva kei na koula na ka ga e donu vei iko kei ira na tacimu, me vaka na loma ni nomuni Kalou. 19  Na iyaya kece a soli vei iko me baleta na veiqaravi ena vale ni nomu Kalou mo vakauta i Jerusalemi me biu ena mata ni Kalou.+ 20  Na vo ni ka e yaga ena vale ni nomu Kalou e dodonu mo solia, o na solia mai na valeniyau ni tui.+ 21  “O yau o Tui Atakisekise au vakaroti kemuni kece na dauniyau oni tiko ena yasayasa ni Tai ni Uciwai,* moni cakava sara vakatotolo na ka kece e kerea vei kemuni o Esera+ na bete, e dau lavetaka na* Lawa ni Kalou ni lomalagi, 22  oya me rauta ni 100 na taledi* na siliva, e 100 na ivakarau ko* witi, e 100 na ivakarau paca* waini,+ e 100 na ivakarau paca waiwai,+ kei na masima+ me kua ni vakaiyalayala. 23  Na ka kece e vakarota na Kalou ni lomalagi me vakayacori ena yalogu me baleta na vale ni Kalou ni lomalagi,+ me kua kina ni cudruvi na nona matanitu na tui kei ira na luvena.+ 24  Moni kila tale ga me kua ni lavaki vei ira na bete, vei ira na Livai, vei ira na daunisere,+ vei ira na ivakatawa ni katuba, vei ira na dauveiqaravi ena valenisoro*+ kei ira na cakacaka tiko ena vale ni Kalou qo e dua na ivakacavacava, na ivakacavacava ni iyaya+ se na ivakacavacava ni gaunisala. 25  “O iko Esera me vaka na nomu vuku e solia vei iko na nomu Kalou,* mo lesi ira na vakailesilesi ni mataveilewai kei ira na turaganilewa, mera lewai ira kece na lewenivanua era tiko ena yasayasa ni Tai ni Uciwai, o ira kece era kila na lawa ni nomu Kalou, ia o koya e sega ni kila qori moni vakavulici koya.+ 26  O koya e sega ni muria na Lawa ni nomu Kalou kei na lawa ni tui me lewai sara vakatotolo, oya me vakamatei, me cemuri, se totogi ilavo, se biu e valeniveivesu.” 27  Me vakacaucautaki mada ga o Jiova na nodra Kalou na tukada, o koya e uqeta qori e lomana na tui me ukutaka na vale i Jiova e Jerusalemi!+ 28  E vakaraitaka na dei ni nona lomani au e matana na tui+ kei na matadratou na nona daunivakasala,+ kei ira kece na nona turaga qaqa na tui. Au mani yaloqaqa* ni tiko vei au na liga i Jiova na noqu Kalou, au qai kumuni ira mai na iliuliu e Isireli me keimami lako vata cake.

iVakamacala e ra

Kena ibalebale “Veivuke.”
Kena vosa vakaIperiu era okati kina na lavetaka na Lawa kei na so na tiki ni iVolatabu.
Se “e matai ena lavetaka.”
Se “na Necinimi.” Ipe., “o ira na soli.”
Se “A nakita e lomana.”
Se “ena lavetaka na vosa.”
Ese 7:12 ina 7:26 e volai taumada ena vosa vakaArame.
Se “vunivola ni.”
Ipe., “tiko e ligamu.”
Ipe., “o raica.”
Se “Tai ni Uferetisi.”
Se “vunivola ni.”
Dua na taledi e tautauvata kei na 34.2 na kilokaramu (1,101 na onisi). Raica na iKuri B14.
Dua na ko e tautauvata kei na 220 na lita (200 na kota mamaca). Raica na iKuri B14.
Dua na paca e tautauvata kei na 22 na lita (5.81 na qaloni). Raica na iKuri B14.
Se “Necinimi.” Ipe., “o ira na lesi.”
Ipe., “me vaka na vuku ni nomu Kalou e tiko e ligamu.”
Se “Au mani vakaukauataki au.”