Esera 6:1-22
6 Sa qai vakarota o Tui Taraiasi, era mani vaqaqara ena valenivola maroroi* e tu kina na iyau e Papiloni.
2 E mani kune e dua na ivolavivigi ena vanua viribaiti e Akimeca ena yasana o Mitia, qo na itukutuku e volai tu kina:
3 “Ena imatai ni yabaki i Tui Sairusi, e vakarota o Tui Sairusi me baleta na vale ni Kalou e Jerusalemi:+ ‘Me tara tale na vale ena vanua era vakacaboisoro kina, me dei na kena yavu, na kena cere me 60 na kiupiti,* na kena raba me 60 na kiupiti,+
4 me yatu tolu na kena vatu lelevu, me yatu dua na kena kau,+ me qai soli na kena isau mai na valenitui.+
5 Me vakasukai tale ga na iyaya koula kei na iyaya siliva ni vale ni Kalou a kauta mai o Nepukanesa ena valenisoro e Jerusalemi qai lai biuta i Papiloni,+ me rawa ni biu ena kedra vanua ena valenisoro e Jerusalemi, mera biu ena vale ni Kalou.’+
6 “Ia qo Tatinai na kovana ena yasayasa ni Tai ni Uciwai,* Sicari-posinai kei na nomudrau itokani, o ira na ivukevuke ni kovana ena yasayasa ni Tai ni Uciwai,+ moni kua ni volekata na vanua oya.
7 Moni kua ni vakataotaka na cakacaka ena vale ni Kalou. Ena tara tale na vale ni Kalou qori ena kena vanua na nodra kovana na Jiu kei na nodra qase na Jiu.
8 Au vakarota tale ga na ka moni na cakava vei ira na nodra qase na Jiu mera tara tale kina na vale ni Kalou qori: Me soli totolo vei ira na tamata qo na ilavo mai na valeniyau ni tui,+ io mai na ivakacavacava e kumuni ena yasayasa ni Tai ni Uciwai me kua sara ni cegu.+
9 Na ka tale ga e vinakati, oya na luvenibulumakau tagane,+ kei na tamanisipi+ kei na lami+ me isoro kama vua na Kalou ni lomalagi, na witi,+ na masima,+ na waini+ kei na waiwai,+ me vaka ga era kaya na bete era tiko e Jerusalemi, me soli tiko ga vei ira ena veisiga me kua sara ni cegu,
10 mera cabora tiko ga kina na isoro e marautaka na Kalou ni lomalagi, mera masulaka tale ga na nona bula na tui kei ira na luvena.+
11 Au vakarota tale ga ke dua e beca na lawa qo, ena laudre mai e dua na kau mai na nona vale, ena vakaduri cake me vakaliligi* kina qai vukici nona vale me valelailai* ni lewenivanua ena vuku ni cala qo.
12 Me vakarusa mada ga na Kalou e vakavuna me tiko e kea na yacana,+ na tui se tamata e dodoka na ligana me beca na lawa qo qai vakarusa na vale ni Kalou e Jerusalemi. O yau o Taraiasi, au vakarota qo. Me vakayacori vakatotolo.”
13 Sega ni bera ni vakayacora qo o Tatinai na kovana ena Tai ni Uciwai, o Sicari-posinai+ kei na nodrau itokani na ka kece e vakarota o Tui Taraiasi.
14 Era tara ra qai tosoya tiko na nodra qase na Jiu+ ni uqeti ira na nodrau parofisai o Akeai+ na parofita kei Sakaraia+ na makubui Ito, era tara oti me vaka na ivakaro ni Kalou ni Isireli+ kei na ivakaro i Sairusi,+ i Taraiasi+ kei Tui Atakisekise+ e Perisia.
15 Era qai vakaotia na vale ena ikatolu ni siga ni vula o Eta,* ena ikaono ni yabaki ni veiliutaki i Tui Taraiasi.
16 Era mani vakatabuya na vale ni Kalou qo ena marau o ira na Isireli, o ira na bete, o ira na Livai,+ kei ira na kena vo era a kau vakavesu.
17 Era cabora e 100 na bulumakau tagane, e 200 na tamanisipi, e 400 na lami me vakatabui kina na vale ni Kalou qo, kei na 12 na me tagane me nodra isoro ni ivalavala ca na Isireli kece, me vaka na iwiliwili ni yavusa e Isireli.+
18 Era qai lesi ira na bete ena nodra iwasewase kei ira na Livai ena nodra iwasewase mera qarava na nodra itavi vua na Kalou e Jerusalemi+ me vaka na ka e volai ena ivola i Mosese.+
19 Era qai soqova o ira a kau vakavesu na Lakosivia ena ika14 ni siga ena imatai ni vula.+
20 Era vakasavasavataki ira kece na bete kei ira na Livai,+ era savasava kece, era qai vakamatea na isoro ni Lakosivia me baleti ira kece era a kau vakavesu, ena vukudra na nodra itokani bete, ena vukudra tale ga.
21 Era qai kania qori na Isireli era sereki mai nira vesu tu, kei ira kece era tomani ira nira tawasei ira mai na nodra veika tawasavasava na lewe ni veimatanitu mera qaravi* Jiova na Kalou ni Isireli.+
22 Era marautaka tale ga na Soqo ni Madrai Sega ni Vakaleveni+ me vitu na siga, ni vakavuna o Jiova mera marau qai veisautaka na loma i tui Asiria me golevi ira+ me tokoni* ira ena cakacaka ni vale ni Kalou dina, na Kalou ni Isireli.
iVakamacala e ra
^ Ipe., “vale ni maroroi itukutuku.”
^ Se “Tai ni Uferetisi.”
^ Se rawa ni, “ibenubenu, ibinibini denimanumanu.”
^ Se “me vako kina o koya.”
^ Ipe., “vakasaqarai.”
^ Ipe., “vakaukauataka na ligadra.”
