Esera 4:1-24
4 Nira rogoca na kedra meca na Juta kei Penijamini+ nira tara tiko na valenisoro i Jiova na Kalou ni Isireli o ira na suka mai ena nodra kau vakavesu,+
2 era vakatotolo sara vei Serupepeli kei ira na iliuliu ni mataqali nei tamadra, ra qai tukuna vei ira: “Me keimami tara vale vata kei kemuni ni keimami qarava* na nomuni Kalou me vakataki kemuni ga,+ keimami vakacaboisoro tiko vua me tekivu mai na gauna i Tui Esatoni+ e Asiria, o koya a kauti keimami mai ke.”+
3 Ia e kaya vei ira o Serupepeli, o Jesua kei ira na vo ni iliuliu ni mataqali nei tamadra na Isireli: “Oni na sega ni tara vale vata kei keimami vua na neimami Kalou,+ keimami na tara ga vakataki keimami na vale i Jiova na Kalou ni Isireli, me vaka e vakaroti keimami kina o Tui Sairusi na tui Perisia.”+
4 Era qai vakayalolailaitaki* ira na lewe i Juta na lewenivanua, era vakararawataki ira mera kua ni tara vale.+
5 Era saumi ira na daunivakasala mera vakasesea na ka era nakita+ ena gauna kece nei Tui Sairusi e Perisia me yacova ni veiliutaki o Tui Taraiasi+ e Perisia.
6 Ena itekitekivu ni veiliutaki nei Esuerosi, era vola e dua na ivola mera beitaki kina na lewe i Juta kei Jerusalemi.
7 Ena gauna i Tui Atakisekise e Perisia eratou volavola o Pisalami, o Miciritaci, o Tapeli kei ira na vo ni nona itokani vei Atakisekise na tui, eratou vakadewataka vakaArame+ na ivola qai volai ena matanivola vakaArame.*
8 *Qo na ka e vola o Ruimi na vakailesilesi levu ni matanitu kei Simisei na vunivola me rau beitaki Jerusalemi kina vei Tui Atakisekise:
9 (E vola mai o Ruimi na vakailesilesi levu ni matanitu, o Simisei na vunivola kei ira na vo ni nodrau itokani, qo o ira na turaganilewa, o ira na ivukevuke ni kovana, o ira na vunivola, o ira na lewe i Ireki,+ o ira na kai Papiloni, o ira na lewe i Susa,+ qo o ira na kai Ilama,+
10 kei ira na vo ni veimatanitu a kauta vakavesu o Osinapa na turaga rogo qai dokai, e vakatikori ira ena veikoro e Samaria,+ o ira na kena vo ena yasayasa ni Tai ni Uciwai,*
11 qo na ilavelave ni ivola eratou vakauta vua.)
“Vei Tui Atakisekise, o keimami na nomuni dauveiqaravi, o ira na turaga ena Tai ni Uciwai: Ia qo
12 moni kila mada na tui ni o ira na Jiu oni tala mai vei keimami era sa yaco mai Jerusalemi. Era tara tale tiko na koro ca e dau be, era tara tale tiko na kena bai+ ra qai vakavinakataka tiko na kena yavu.
13 Moni kila mada na tui, ke sa tara tale na koro qo qai vakaoti na kena bai, era na sega ni solia na nodra ivakacavacava, se na ivakacavacava ni iyaya,+ se na ivakacavacava ni gaunisala, ena yali kina vei kemuni na tui na nomuni iyau.
14 Me vaka ga ni keimami kana masima ena valenitui* qai sega ni vinaka me keimami raica ni vakaleqai na ka e kauai kina na tui, qo na vuna keimami talatala yani kina me vakatakilai vua na tui,
15 me rawa ni vaqaqai na kedra ivolatukutuku na nomuni qase.+ Oni na raica ena ivolatukutuku qori, oni na kila tale ga ni koro dau be na koro qo, e vakacacani ira na tui kei na veiyasana, era tiko tale ga kina o ira na bukana tiko na vakaduduile mai na gauna makawa. Oya na vuna e vakarusai kina na koro qo.+
16 Keimami vakatakila tiko vei kemuni na tui ke mani tara tale na koro qo qai vakaoti na kena bai, oni na sega sara ni lewa na Tai ni Uciwai.”+
17 E vakauitukutuku na tui vei Ruimi na vakailesilesi levu ni matanitu, vei Simisei na vunivola kei ira na vo ni nodrau itokani era tiko e Samaria kei na vo ni yasayasa ena Tai ni Uciwai:
“Ni bula! Sa mai
18 wiliki vakamatata* vei au na ivola oni vakauta mai vei keitou.
19 Au vakarota me vaqaqai qai laurai ni dau saqati ira tiko na tui ena veigauna sa oti na koro qo, e yaco kina na be kei na vakaduduile.+
20 Era liutaki Jerusalemi na tui vosayaco era lewa na yasayasa taucoko ena Tai ni Uciwai qai soli vei ira na ivakacavacava, na ivakacavacava ni iyaya, kei na ivakacavacava ni gaunisala.
21 Ia moni vakarota mera cegu na turaga qo, me kua ni tara tale na koro qori me yacova niu sa lewa yani.
22 Moni qarauna moni kua ni vakaweleweletaka na kena vakayacori na ka qo, me kua ni vakaleqai tale na veika e kauai kina na tui.”+
23 Ni wili oti na ilavelave ni ivola i Atakisekise na tui vei Ruimi kei Simisei na vunivola, kei ira na vo ni nodrau itokani, era vakatotolo sara i Jerusalemi vei ira na Jiu mera tarovi ira vakaukaua.
24 Sa mani cegu na cakacaka ena vale ni Kalou e Jerusalemi, e cegu tu va qori me yacova na ikarua ni yabaki ni veiliutaki nei Tui Taraiasi e Perisia.+
iVakamacala e ra
^ Ipe., “vakasaqara.”
^ Ipe., “vakamalumalumutaka na ligadra.”
^ Se rawa ni, “volai vakaArame qai vakadewataki.”
^ Ese 4:8 ina 6:18 e volai taumada ena vosa vakaArame.
^ Se “Tai ni Uferetisi.”
^ Se “keimami saumi ena valenitui.”
^ Se rawa ni, “vakadewataki qai wiliki.”
