Dauveilewai 9:1-57

  • Tui Sikemi o Apimeleki (1-6)

  • Vosa vakatautauvata me baleti Jocame (7-21)

  • Lewa voravora nei Apimeleki (22-33)

  • Valuti Sikemi o Apimeleki (34-49)

  • Dua na yalewa e vakamavoataki Apimeleki mani mate (50-57)

9  Sa dede toka e qai lako i Sikemi o Apimeleki+ na luvei Jerupeali vei ira na ganei tinana, e vosa sara vei ira kei ira kece na vuvale nei tukana:*  “Au kerea mo dou tukuna vei ira na iliuliu* e Sikemi, ‘Na cava e vinaka vei kemuni, mera liutaki kemuni o ira kece na 70 na tagane na luvei Jerupeali,+ se me liutaki kemuni e dua ga na tagane? Moni nanuma tiko ni o yau ga qo na suimuni kei na lewemuni.’”*  Eratou mani vakasavuya na ganei tinana na itukutuku qo me baleti koya vei ira kece na iliuliu e Sikemi, e malele sara na lomadra vei Apimeleki, era kaya: “E wekada o koya.”  Era qai solia vua e 70 na tikinisiliva mai na vale* i Pealipirici,+ e mani sauma kina o Apimeleki eso na tagane vucesa era qaciqacia mera tomani koya.  Oti qori e lako sara ina vale nei tamana e Ofira+ me vakamatei ira na tacina,+ o ira na 70 na tagane na luvei Jerupeali ena dua na vatu. E bula ga o Jocame na itini nei Jerupeali ni a vuni.  Era mani soqoni vata na iliuliu e Sikemi kei ira kece na Pecimilo mera buli Apimeleki me tui+ volekata na vunikau levu, ena yasa ni duru mai Sikemi.  Nira tukutuku oti ga vei Jocame, e lako sara me duri ena Ulu i Kirisimi,+ e kaci yani vei ira ena domolevu: “Ni rogoci au mada o kemuni na iliuliu e Sikemi, ena qai rogoci kemuni na Kalou.  “Ena dua na gauna, era lako na vunikau mera lumuta e dua na nodra tui. Era mani kaya ina vuniolive, ‘Mo liutaki keimami.’+  Ia e kaya vei ira na vuniolive, ‘Vakacava meu biuta tani na noqu waiwai* e dau vakalagilagi kina na Kalou kei na tamata, meu lai liutaka eso tale na vunikau niu suaigelegele?’ 10  Oti era kaya na vunikau ina vunilolo, ‘Mo mai liutaki keimami.’ 11  Ia e kaya vei ira na vunilolo, ‘Vakacava meu biuta na kequ kamica kei na vuaqu vinaka meu lai liutaka eso tale na vunikau niu suaigelegele?’ 12  Era kaya tale na vunikau ina vunivaini, ‘Mo mai liutaki keimami.’ 13  E kaya vei ira na vunivaini, ‘Vakacava meu biuta na noqu waini vou e vakamarautaka vakalevu na Kalou kei na tamata, meu lai liutaka eso tale na vunikau niu suaigelegele?’ 14  Oti era kaya kece na vo ni vunikau ina soni, ‘Mo mai liutaki keimami.’+ 15  E kaya sara na soni vei ira na vunikau, ‘Ke oni via lumuti au dina meu nomuni tui, moni mai vakaruru ena kequ yaloyalo. Ia ke sega, me caudre mai na soni na bukawaqa me yameca na sitari ni Lepanoni.’ 16  “Vakacava oni sa yalodina, oni yalododonu moni buli Apimeleki me tui,+ oni yalovinaka vei Jerupeali kei na nona vuvale moni vakayacora vua na ka dodonu? 17  Ni vala ena vukumuni o tamaqu,+ e bolemate me vakabulai kemuni mai na ligadra na Mitiani.+ 18  Ia nikua oni sa valuti ira na vuvale i tamaqu moni vakamatei ira na luvena tagane, e 70 na tagane ena dua na vatu.+ Oti oni buli Apimeleki na luvena na nona yalewa bobula+ me nodra tui na iliuliu e Sikemi baleta ga ni wekamuni. 19  Io ke oni yalodina, oni yalododonu vei Jerupeali kei na nona vuvale nikua, moni marautaki Apimeleki vakalevu me marautaki kemuni tale ga vakalevu o koya. 20  Ke sega, me caudre mai vei Apimeleki na bukawaqa me yameci ira na iliuliu e Sikemi kei Pecimilo,+ me caudre tale ga mai vei ira na iliuliu e Sikemi kei Pecimilo na bukawaqa me yameci Apimeleki.”+ 21  E cici o Jocame+ me dro i Peri, e vakaitikotiko e kea ena vuku i Apimeleki na tacina. 22  E veiliutaki o Apimeleki e Isireli me tolu na yabaki. 23  E qai vakatara na Kalou me duiyaloyalo* o Apimeleki kei ira na iliuliu e Sikemi, era qai lawakitaki Apimeleki. 24  E yaco qori me saumi kina na ivalavala voravora e vakayacori vei ira na 70 na tagane na luvei Jerupeali, me tau vei Apimeleki na nodra dra na tacina ni vakamatei ira,+ vaka kina vei ira na iliuliu e Sikemi nira vukei koya me vakamatei ira na tacina. 25  Era lesia sara na iliuliu e Sikemi eso na tagane mera toka vuni mera vakaleqai koya ena veiulunivanua, era dau butakoci ira kece tale ga na tavali e gaunisala. Oti e qai tukuni vei Apimeleki. 26  E lako yani o Keali na luvei Epeti kei ira na tacina mera takoso i Sikemi,+ era nuitaki koya sara na iliuliu e Sikemi. 27  Era lako yani ina were mera kumuna na vuanivaini ena nodra loganivaini, era butuka, era soqo sara, oti era lako ina vale ni nodra kalou,+ era kana, era gunu, ra qai vosavakacacataki Apimeleki. 28  E kaya o Keali na luvei Epeti: “O cei o Apimeleki, o cei o Sikemi meda qaravi rau? Qo ga na luvei Jerupeali,+ e nona ivukevuke o Sipuli? Moni qaravi ira na Emori na tamai Sikemi! Ia na cava meda qaravi koya kina? 29  Keu lewai ira na tamata qo, au na vakasivoi Apimeleki.” E kaya sara vei Apimeleki: “Vakalevutaka na nomu mataivalu qai lako mai.” 30  Ni rogoca o Sipuli na turaganikoro na vosa i Keali na luvei Epeti, e tubu sara ga na nona cudru. 31  E qai tala lo* eso na italai vei Apimeleki, era kaya: “Raica! Sa tiko mai Sikemi o Keali na luvei Epeti kei ira na tacina, era mai uqeti ira na lewenikoro mera valuti iko. 32  Ia qo mo lako cake mai ena bogi, o iko kei ira na nomu ito, moni lai toka vuni e veikau. 33  Ni cila ga na siga ena mataka, moni lako vakamataka moni valuta na koro. Ia ni valuti kemuni mai o Keali kei ira na nona ito, mo vakayacora na ka o rawata mo vakadrukai koya kina. 34  E vakarau sara ena bogi o Apimeleki kei ira kece na nona ito, era wase vakava, ra qai lai toka vuni mera valuti Sikemi. 35  Ni lako yani o Keali na luvei Epeti me lai tu ena matamatanikoro, e duri sara o Apimeleki kei ira na nona ito mai na vanua e toka vuni kina. 36  Ni raici ira na tamata o Keali, e kaya sara vei Sipuli: “Raica! Eso era lako sobu tiko mai na ulunivanua.” Ia e kaya vua o Sipuli: “Na yaloyalo ga ni ulunivanua o raica tiko qori nira vaka na tamata.” 37  Oti e kaya o Keali: “Raica! Era lako tiko mai na tamata ena lomadonu ni vanua, e dua na ilawalawa era muria mai na sala ena vunikau levu e Mioninimi. 38  E kaya vua o Sipuli: “O sa guilecava tale na ka o tukuna, ‘O cei o Apimeleki meda qaravi koya?’+ Sega ni o ira ga qo o vosabeca? Mo lako yani mo valuti ira.” 39  E mani liutaki ira yani na iliuliu e Sikemi o Keali mera valuti Apimeleki. 40  E cicimuri koya yani o Apimeleki e qai drovaki koya o Keali, era vakamatei e lewe levu me yaco sara ina icurucuru ena matamatanikoro. 41  E vakaitikotiko ga o Apimeleki e Eruma, e qai cemuri Keali kei ira na tacina o Sipuli+ mai Sikemi. 42  Era lako sara i veikau na tamata ena siga e tarava, e qai tukuni vei Apimeleki. 43  E mani kauti ira na tamata, e wasei ira vakatolu mera toka vuni e veikau. Ni raica nira sa biuta tiko na koro na tamata, e ravuti ira me vakamatei ira. 44  E cici yani o Apimeleki kei na ilawalawa era tomani koya mera duri ena matamatanikoro, e rua tale na ilawalawa e ravuti ira kece na tiko e veikau ra qai vakamatei ira. 45  E valuta tiko na koro o Apimeleki ena siga taucoko oya qai vakadruka. E vakamatei ira na tiko kina, e basuka na koro+ qai kaburaka kina na masima. 46  Nira rogoca qori o ira kece na iliuliu ena valececere mai Sikemi, era lako totolo sara ina idrodro ena vale i Elipirici.+ 47  Ni tukuni oti ga vei Apimeleki nira sa soqoni vata kece na iliuliu ena valececere mai Sikemi, 48  e lako cake sara o Apimeleki kei ira kece na nona ito i Ulu i Salimoni. E taura o Apimeleki e dua na matau, e taya e dua na tabanikau, e cola e tabana, e kaya vei ira na nona ito: “Na ka dou raica niu cakava, dou cakava tale ga vakatotolo!” 49  Era mani taya na tamata kece na tabanikau ra qai muri Apimeleki. Era biuta sara na tabanikau ena idrodro ra qai vakama. Era mate tale ga na tamata kece era tiko ena valececere mai Sikemi, e rauta ni 1,000 na tagane kei na yalewa. 50  E lako sara i Tipesi o Apimeleki, e keba volekati Tipesi qai ravuta. 51  E tiko e dua na valececere kaukaua ena lomadonu ni koro, era dro kece kina na tagane, na yalewa, kei ira kece na iliuliu ni koro. Era sogoti ira e loma ra qai lako ina dela ni valececere. 52  E lako yani ina valececere o Apimeleki qai ravuta. E lako volekata yani o koya na katuba ni valececere me vakama. 53  E qai vakalutuma mai cake e dua na marama na vatuniqaqaqi* e ulu i Apimeleki, e voroka sara ga nona qavokavoka.+ 54  E totolo ga ni kaciva na nona dauveiqaravi e kauta tiko na nona iyaragi, e kaya vua: “Ucuna na nomu iseleiwau mo vakamatei au mera kua ni kaya me baleti au, ‘E vakamatei koya e dua na yalewa.’” E suaki koya na nona dauveiqaravi mani mate. 55  Nira raica na Isireli ni sa mate o Apimeleki era lesu kece i vale. 56  E vakavuna gona na Kalou me sauti Apimeleki na ka ca e cakava vei tamana ni vakamatei ira na 70 na tacina.+ 57  E vakavuna tale ga na Kalou me sauti ira na lewe i Sikemi na ka ca kece era cakava. E sauti ira gona na vosavakacaca i Jocame+ na luvei Jerupeali.+

iVakamacala e ra

Ipe., “na vuvale ena mataqali nei tamai tinana.”
Se rawa ni, “itaukeiniqele.”
Se “wekamuni vakadra.”
Se “burekalou.”
Se “vuaqu.”
Ipe., “tala e dua na yalo ca.”
Se “vaqaseqase.”
Se “iqaqaqi.”