Dauveilewai 6:1-40
6 Ia era caka ca tale ena mata i Jiova na Isireli,+ e mani soli ira o Jiova ina ligadra na Mitiani me vitu na yabaki.+
2 E kaukaua na ligadra na Mitiani vei ira na Isireli.+ Ena vukudra na Mitiani era vakarautaka na Isireli eso na nodra ivunivuni* ena veiulunivanua, ena qaravatu, kei na vanua e dredre ni lakovi.+
3 Ke ra kaburaka na sorenitei na Isireli, era lako yani na Mitiani, na Amaleki,+ kei ira mai na Tokalau+ mera valuti ira.
4 Era na keba volekati ira, era na vakacacana na vuaniqele me yaco sara i Kesa, era sega ni vakavoca e dua na ka mera kania na Isireli, e sega na sipi, se bulumakau, se na asa.+
5 Era na lako cake vata kei na nodra manumanu kei na nodra valelaca, era lewe levu me vaka na vodre,+ e sega ni wili rawa na kedra levu vaka kina na nodra kameli,+ era na lako yani ena vanua mera vakarusa.
6 Era vakadravudravuataki vakaca gona na Isireli ena vukudra na Mitiani, era kere veivuke sara vei Jiova na Isireli.+
7 Nira kere veivuke vei Jiova na Isireli ena vuku i Mitiani,+
8 e tala sara o Jiova e dua na parofita vei ira na Isireli, e kaya vei ira: “Qo na ka e tukuna o Jiova na Kalou ni Isireli, ‘Au kauti kemuni cake mai Ijipita, au kauti kemuni tani gona mai na vale ni veivakabobulataki.+
9 Au vakabulai kemuni mai na ligadra na Ijipita kei ira kece na dauvakasaurarataki kemuni, au cemuri ira tani e matamuni au qai solia vei kemuni na nodra vanua.+
10 Au tukuna vei kemuni: “O yau o Jiova na nomuni Kalou.+ Moni kua ni qarava na nodra kalou na Amoraiti oni tiko ena nodra vanua.”+ Ia oni sega ni talairawarawa vei au.’”*+
11 Oti e lako na agilosi i Jiova+ me dabe ena ruku ni vunikau levu e Ofira, e nei Joasi na luvei Epieseri.+ E samu witi tiko o Kitioni+ na luvena ena ikeliniwaini mera kua ni raica na Mitiani.
12 E rairai sara vua na agilosi i Jiova, e tukuna vua: “E tiko kei iko o Jiova,+ o iko na tamata qaqa.”
13 E kaya vua o Kitioni: “Vosoti au noqu turaga, ke tokoni keimami o Jiova, na cava e yacovi keimami tiko kina na ka qo?+ I vei ga na nona cakacaka veivakurabuitaki kece era talanoataka vei keimami na tukai keimami,+ era kaya, ‘E kauti keda mai Ijipita o Jiova?’+ Ia qo sa biuti keimami o Jiova+ qai soli keimami ina ligadra na Mitiani.”
14 E vuki yani vua o Jiova, e kaya: “Mo lako ena kaukaua e tiko qo vei iko, o na vakabulai ira na Isireli mai na ligadra na Mitiani.+ Vakacava, au sega ni talai iko?
15 E sauma vua o Kitioni: “Vosoti au, Jiova. Meu vakabulai Isireli vakacava? Raica! E lailai duadua na noqu mataqali* vei ira na Manasa, au lailai sara ena vuvale i tamaqu.”
16 Ia e kaya vua o Jiova: “Niu na tokoni iko,+ o na mokuti ira kina na Mitiani me vaka ga era le dua.”
17 E kaya sara vua o Kitioni: “Keu lomani e matamuni, moni vakaraitaka mada vei au e dua na ivakatakilakila ni oni vosa tiko vei au.
18 Yalovinaka moni tiko ga eke meu kauta mada mai na noqu isolisoli meu biuta e matamuni.”+ E kaya sara: “Au na dabe tiko ga eke me yacova ni o lesu mai.”
19 E curu sara i loma o Kitioni, e vakarautaka e dua na luvenime, e bulia na madrai sega ni vakaleveni ena dua na efa* na falawa.+ E biuta na lewe ni manumanu ena basikete kei na kena su ena kuro ni vakasaqa, qai kauta yani vua ena ruku ni vunikau levu me vakarautaka.
20 E kaya na agilosi ni Kalou dina: “Mo taura na lewe ni manumanu kei na madrai sega ni vakaleveni mo biuta ena vatu levu oya, mo sova tani na kena su.” E cakava sara o koya.
21 E dodoka na agilosi i Jiova na mua ni ititoko e taura tiko me tara na lewe ni manumanu kei na madrai sega ni vakaleveni, qai caudre mai na vatu na yameyame me yameca na lewe ni manumanu kei na madrai sega ni vakaleveni.+ E yali sara mai matana na agilosi i Jiova.
22 E qai kila o Kitioni ni oya na agilosi i Jiova.+
E kaya sara o Kitioni: “Oilei, kemuni na Turaga Cecere Duadua Jiova, au raica sara ga na mata ni agilosi i Jiova!”+
23 Ia e kaya vua o Jiova: “Mo vakacegu. Kua ni rere,+ o na sega ni mate.”
24 E mani tara e kea o Kitioni e dua na icabocabonisoro vei Jiova, e yacana o Jiova-salomi*+ me yacova na siga qo. Se tiko ga e Ofira, na nodra na luvei Epieseri.
25 Ena bogi oya e kaya vua o Jiova: “Mo kauta na luvenibulumakau tagane nei tamamu, oya na ikarua ni luvenibulumakau tagane yabaki vitu, mo basuka na icabocabonisoro i Peali e nei tamamu, mo musuka na duru ni sokalou* e volekata.+
26 Ni o tara oti e dua na icabocabonisoro vei Jiova na nomu Kalou ena ulu ni koro kaukaua qo ena dua na iyatu vatu, mo kauta na ikarua ni luvenibulumakau tagane mo cabora me isoro kama ena tikitiki ni kau ni duru ni sokalou* o musuka.”
27 E kauta sara o Kitioni e tini nona tagane dauveiqaravi me vakayacora na ka e tukuna vua o Jiova. Ia e sega ni cakava ena siga ni rerevaki ira vakalevu na vuvale i tamana kei ira na lewenikoro, mani cakava ena bogi.
28 Nira yadra vakamataka ena siga tarava na lewenikoro, era raica ni sa basu tu na icabocabonisoro i Peali, sa musu tu na duru ni sokalou* e toka volekata, sa cabori tale tu ga na ikarua ni luvenibulumakau tagane ena icabocabonisoro sa tara oti.
29 Era veitarotarogi: “O cei e vakayacora qo?” Nira vaqaqa oti, era kaya: “O Kitioni na luvei Joasi e vakayacora qo.”
30 Era kaya vei Joasi na lewenikoro: “Kauta mai tuba na luvemu me vakamatei ni basuka na icabocabonisoro i Peali, e musuka tale ga na duru ni sokalou* e toka volekata.”
31 E kaya sara o Joasi+ vei ira kece na tu volekati koya: “Oni na tokoni Peali? Moni vakabulai koya? Me vakamatei ena mataka nikua o koya e tokoni koya.+ Ke kalou me taqomaki koya ga,+ ni dua e basuka na nona icabocabonisoro.”
32 E vakatokai Kitioni sara me o Jerupeali* ena siga oya, e kaya: “Me taqomaki koya ga o Peali ni dua sa basuka na nona icabocabonisoro.”
33 Era soqoni vata+ kece na Mitiani,+ na Amaleki,+ kei ira mai na Tokalau mera takoso* ina vanua Buca e Jesirieli mera keba kina.
34 E sobuti Kitioni na yalo i Jiova+ mani uvuca na davui,+ era lako vata mai na luvei Epieseri+ mera muri koya.
35 E tala o koya eso na italai vei ira kece na Manasa, era lako vata mai mera muri koya. E tala tale ga eso na italai vei ira na Aseri, vei ira na Sepuloni kei ira na Nafitalai, era lako cake mera tavaki koya.
36 E kaya sara o Kitioni vua na Kalou dina: “Ke oni na vakabulai ira na Isireli ni oni vakayagataki au me vaka oni yalataka,+
37 au na biuta na vutinisipi ena rara ni butu covuata. Ke tauva na tegu na vutinisipi qai mamaca tu ga na qele e wavokita, au na kila ni oni na vakabulai ira na Isireli ni oni vakayagataki au me vaka oni yalataka.”
38 Qori sara ga na ka e yaco. Ni yadra vakamataka ena siga tarava e lobaka na vutinisipi, na levu ni tegu e lobaka mai na vutinisipi e sinai kina e dua na boulu levu na wai.
39 Ia e kaya o Kitioni vua na Kalou dina: “Moni kua ni cudruvi au, meu kaya tale mada e dua na ka. Yalovinaka meu vakatovolea tale vakadua na vutinisipi. Au kerea me mamaca na vutinisipi, me tauvi tegu ga na qele taucoko.”
40 Qori na ka e vakayacora na Kalou ena bogi oya, e mamaca ga na vutinisipi, e tauvi tegu na qele taucoko.
iVakamacala e ra
^ Se rawa ni, “vanua ni maroroi iyaya ena loma ni qele.”
^ Ipe., “rogoca na ka au tukuna.”
^ Ipe., “udolu.”
^ Kena ibalebale, “O Jiova na Vakacegu.”
^ Raica na iVakamacala ni Vosa.
^ Raica na iVakamacala ni Vosa.
^ Raica na iVakamacala ni Vosa.
^ Raica na iVakamacala ni Vosa.
^ Kena ibalebale “Me Lewai Koya ga o Peali.”
^ Se “takosova na uciwai.”
