Dauveilewai 4:1-24
4 Ia ni sa mate o Eute, era caka ca tale na Isireli ena mata i Jiova.+
2 E mani volitaki ira o Jiova ena liga i Japini na tui Kenani+ a veiliutaki e Asori. Na iliuliu ni nona mataivalu o Sisera, e vakaitikotiko e Eroseci+ ni veimatanitu.*
3 Era tagi vei Jiova na Isireli,+ ni 900 na qiqinivalu nei Japini e vakaisele takelo*+ qai vakasaurarataki ira na Isireli+ me 20 na yabaki.
4 Ia e lewai ira tiko na Isireli ena gauna oya o Tepora na parofita yalewa,+ na wati Lapitoci.
5 E dau dabe o koya ena ruku ni vuniniuniu nei Tepora ena maliwa i Rama+ kei Peceli+ ena veiulunivanua e Ifireimi. Era dau lako cake vua na Isireli me lewai ira.
6 E talatala sara me kacivi mai o Peraki+ na luvei Epinoami mai Ketesinafitalai,+ e tukuna vua: “Vakacava, a sega ni vakarota o Jiova na Kalou ni Isireli? ‘Mo lako* i Ulu i Tepori, mo kauta e 10,000 na tagane ni Nafitalai kei ira na Sepuloni.
7 Au na kauti Sisera yani na iliuliu ni mataivalu nei Japini vaka kina na nona qiqinivalu kei ira na nona sotia ena uciwai* o Kisoni,+ au na soli koya i ligamu.’”+
8 E kaya vei Tepora o Peraki: “Au na lako ga ke o tomani au, ke o na sega ni tomani au, au na sega ni lako.”
9 E kaya sara o Tepora: “Au na tomani iko sara ga. Ia o na sega ni dokai ena ilakolako qo, ni na soli Sisera o Jiova ina ligana e dua na marama.”+ E mani tucake o Tepora me tomani Peraki i Ketesi.+
10 E kacivi ira na Sepuloni kei ira na Nafitalai+ o Peraki mera lako i Ketesi, era qai muri koya e 10,000 na tagane. E tomani koya cake tale ga o Tepora.
11 Ia o Eperi na Kenaiti e tawasei koya vei ira na Kenaiti,+ o ira na kawa nei Opapi na vugoi Mosese,+ e birika na nona valelaca volekata na vunikau levu mai Senanimi e Ketesi.
12 Era tukuna sara vei Sisera ni sa lako cake i Ulu i Tepori o Peraki na luvei Epinoami.+
13 Sega ni bera ni kauti ira vata mai na nona qiqinivalu kece o Sisera, e 900 na qiqinivalu e vakaisele takelo kei ira kece nona sotia era tiko vata kei koya mai Eroseci ni veimatanitu, mera lako ina uciwai o Kisoni.+
14 E kaya sara vei Peraki o Tepora: “Tucake, qo na siga ena soli Sisera kina i ligamu o Jiova. Vakacava, e sega ni liutaki iko o Jiova?” E siro sara o Peraki mai Ulu i Tepori kei na 10,000 na tagane era muri koya.
15 E qai vakavuna o Jiova me veilecayaki o Sisera,+ na nona qiqinivalu kece kei ira kece na nona mataivalu ena mata ni iseleiwau nei Peraki. E mani sobu mai na nona qiqinivalu o Sisera qai dro e yavana.
16 E cicimuria o Peraki na qiqinivalu kei na mataivalu me yaco sara i Eroseci ni veimatanitu. Era bale kece na mataivalu i Sisera ena iseleiwau, e sega ni dua tale e vo.+
17 Ia e dro e yavana o Sisera ina valelaca i Jaili+ na wati Eperi+ na Kenaiti, ni rau veiyaloni tu o Japini+ na tui Asori kei na vuvale i Eperi na Kenaiti.
18 E lako sara yani o Jaili me tavaki Sisera, e kaya vua: “Lako mai noqu turaga, lako mai ke. Ni kua ni rere.” E mani curu ina nona valelaca qai ubi koya o Jaili ena itutuvi.
19 E kaya sara vei koya o Sisera: “Yalovinaka, solia mada vakalailai vei au na wai meu gunuva niu karamaca.” E dolava sara o Jaili e dua na tavaya sucu kulinimanumanu qai solia vua me gunu,+ oti e ubi koya tale.
20 E kaya sara vei Jaili o Sisera: “Mo duri toka ena katuba ni valelaca, ke dua e lako mai qai tarogi iko, ‘E tiko eke e dua na turaga?’ mo kaya, ‘Sega!’”
21 Ia e kauta o Jaili na wati Eperi e dua na pini ni valelaca kei na ituki e ligana. E mocelutu o Sisera ni oca sara ga, e lako lo yani o Jaili qai tukia na pini ena nona kanavalavala, e tukia me curubasika ina qele mani mate kina.+
22 E yaco yani i kea o Peraki ni cicimuri Sisera yani, e curu i tuba o Jaili me tavaki koya, e kaya: “Lako mai meu vakaraitaka vei iko na turaga o vaqara tiko.” E curu i loma o Peraki kei Jaili qai raica ni sa davo matemate tu o Sisera, e coba tu na pini ena nona kanavalavala.
23 O koya gona, na Kalou e vakamalumalumutaki Japini na tui Kenani e matadra na Isireli ena siga oya.+
24 E kaukaua tiko ga na ligadra na Isireli vei Japini na tui Kenani+ me yacova nira vakamatei Japini na tui Kenani.+
