Dauveilewai 2:1-23

  • iVakaro ni agilosi i Jiova (1-5)

  • Mate o Josua (6-10)

  • Ra lesi na turaganilewa mera vakabulai ira na Isireli (11-23)

2  E lako cake mai Kilikali+ na agilosi i Jiova+ me lako i Pokimi, e kaya: “Au kauti kemuni cake mai Ijipita meu kauti kemuni ina vanua au bubuluitaka vei ira na tukamuni.+ Au tukuna tale ga, ‘Au na sega ni beca na noqu veiyalayalati kei kemuni.+  O kemuni, moni kua ni veiyalayalati kei ira na lewenivanua qo,+ moni basuka na nodra icabocabonisoro.’+ Ia oni sega ni rogoca na domoqu.+ Na cava oni cakava kina qo?  Oya na vuna au kaya tale ga kina, ‘Au na sega ni cemuri ira e matamuni,+ era na coriti kemuni,+ ena bacani kemuni na nodra kalou.’”+  Ni tukuna oti ga na vosa qori na agilosi i Jiova vei ira taucoko na Isireli, era qai tagi vakadomoilevu na tamata.  Era mani vakayacana na vanua oya me o Pokimi,* era vakacaboisoro e kea vei Jiova.  Ni tukuna ga o Josua vei ira na lewenivanua mera lako, era dui lako sara na Isireli ina nodra ivotavota mera taukena na vanua.+  Era qaravi Jiova tiko ga na tamata ena gauna taucoko i Josua kei na nodra gauna taucoko na qase era bula tiko ni sa mate o Josua, era raica tale ga na cakacaka veivakurabuitaki kece i Jiova ena vukudra na Isireli.+  E qai mate o Josua na luvei Nuni, na tamata i Jiova ni sa yabaki 110.+  Era buluti koya ga ena vanua e tiko kina na nona ivotavota e Timinacaeresi+ ena veiulunivanua e Ifireimi, ena vualiku ni Ulu i Keasi.+ 10  Na itabatamata kece oya era davo vata kei na nodra qase,* e tubu tale mai e dua na itabatamata me taravi ira era sega ni kilai Jiova se na ka e cakava vei ira na Isireli. 11  Era cakava na ka ca na Isireli ena mata i Jiova, era qaravi ira na Peali.+ 12  Era mani biuti Jiova na Kalou i tukadra a kauti ira tani mai na vanua o Ijipita.+ Era muria eso tale na kalou, na nodra kalou na lewe ni veivanua era tiko wavoliti ira,+ era cuva vei ira ra qai vakacudrui Jiova.+ 13  Era biuti Jiova mera qaravi Peali kei na ivakatakarakara kei Asetoreci.+ 14  E waqa mai na cudru i Jiova vei ira na Isireli, e mani soli ira vei ira na dauvakacaca mera vakacacani ira.+ E volitaki ira e ligadra na kedra meca era tiko wavoliti ira,+ era sega ni valuta rawa na kedra meca.+ 15  Na vanua kece era lakova e saqati ira na liga i Jiova ni kauta yani vei ira na ca,+ me vaka ga e tukuna o Jiova, me vaka e bubuluitaka vei ira o Jiova.+ Era rarawa vakalevu kina.+ 16  E mani lesia o Jiova eso na turaganilewa mera vakabulai ira mai na ligadra na vakacacani ira.+ 17  Ia era sega mada ga ni vakarorogo vei ira na turaganilewa, era saqamua ga kei na so tale na kalou ra qai cuva vei ira. E totolo ga nira gole tani mai na sala era muria na tukadra era talairawarawa ina ivakaro i Jiova.+ Era sega ni muria qori. 18  Ni lesia vei ira o Jiova eso na turaganilewa,+ o Jiova e tokona na turaganilewa qai vakabulai ira mai na ligadra na kedra meca ena nona gauna taucoko na turaganilewa. E lomani ira o Jiova+ nira vutugu baleti ira na dau vakasaurarataki ira+ kei ira na vakararawataki ira. 19  Ia ni mate na turaganilewa, sa qai ca tale na nodra ivalavala, e ca sara ni vakatauvatani kei na tukadra nira muria eso tale na kalou, era qaravi ira, era cuva vei ira.+ Era sega ni biuta na nodra ivalavala kei na nodra domoqa. 20  E qai waqa mai na cudru i Jiova vei Isireli,+ e kaya: “Ni beca na matanitu qo na noqu veiyalayalati+ au vakaroti tukadra kina ra qai sega ni muria na noqu vosa,+ 21  au na sega sara ni cemuria e matadra e dua vei ira na matanitu e vakavoca tu o Josua ni sa mate.+ 22  Me laurai kina se ra na dei tiko ga na Isireli ena ivalavala i Jiova+ nira muria me vaka ga era vakayacora na tukadra.” 23  E mani vakadonuya o Jiova mera tiko ga na veimatanitu qori. E sega ni cemuri ira totolo, e sega tale ga ni soli ira ena liga i Josua.

iVakamacala e ra

Kena ibalebale “O ira na tagi.”
Qo na ka e dau tukuni ni dua e mate.