Dauveilewai 15:1-20

  • Sauma o Samisoni na ka era vakayacora na kai Filisitia (1-20)

15  Sa dede toka, ena gauna ni tamusuki witi e lai sikovi watina sara o Samisoni, e kauta e dua na luvenime. E kaya: “Au via lako vei watiqu ina rumunimoce.”* Ia e sega ni vakadonuya o tamai yalewa me curu i loma.  E kaya o tamai yalewa: “Au nanuma, ‘O sa sega sara ga ni taleitaki koya.’+ Au mani soli koya vua na nomu itokani.+ Vakacava, e sega ni matavinaka o tacina? Me nomu mada ga o koya me kena isosomi.”  Ia e kaya o Samisoni: “Era na sega ni beitaki au na kai Filisitia ena gauna qo keu vakamavoataki ira.”  E lako yani o Samisoni, e toboka sara e 300 na fokisi. E kauta eso na cina, e vukica vata na buidra na fokisi me veisotari qai biuta e dua na cina ena maliwa ni rua na buidra.  E waqara sara na cina caucaudre qai vakatalai ira na fokisi ina nodra loganicovuata na kai Filisitia se bera ni tamusuki. E vakama gona o koya na ka taucoko, mai na ivesu covuata ina covuata se bera ni tamusuki, vaka kina na loganivaini kei na veiolive.  Era taroga na kai Filisitia: “O cei e cakava qo?” E tukuni vei ira: “O Samisoni na vugona na kai Timinaca, ni kauta o koya na watina qai solia vua na nona itokani.”+ Era mani lako cake na kai Filisitia ra qai vakamai yalewa kei tamana.+  E kaya sara vei ira o Samisoni: “Ke va qo na nomuni ivakarau, au na sauma vei kemuni au qai cegu.”+  E ravuti ira yadudua* ena dua na veivakamatei levu qai lako sobu me tiko ena qaravatu o Etami.  Oti era lako cake na kai Filisitia mera keba e Juta, era veilakoyaki tiko e Liai.+ 10  Era kaya na lewe i Juta: “Na cava oni mai valuti keimami kina?” era sauma: “Keimami lako cake mai me keimami vesuki Samisoni, me keimami vakayacora vua na ka e cakava vei keimami.” 11  Era lako sobu ina qaravatu o Etami e 3,000 na lewe i Juta, era kaya vei Samisoni: “O kila nira lewai keda tiko na kai Filisitia? Na cava o cakava kina qo vei keimami?”+ E kaya vei ira: “Au vakayacora ga vei ira na ka era cakava vei au.” 12  Ia era kaya vua: “Keimami lako mai me keimami vesuki iko mo soli vei ira na kai Filisitia.” E qai kaya vei ira o Samisoni: “Moni bubuluitaka vei au ni oni na sega ni vakamavoataki au.” 13  Era qai kaya vua: “Sega, keimami na vesuki iko ga, keimami na soli iko vei ira, ia keimami na sega ni vakamatei iko.” Era vesuki koya sara ena rua na dali vou ra qai kauti koya cake mai na qaravatu. 14  Ni yaco yani o koya i Liai, era kaila ena marau na kai Filisitia nira mai tavaki koya. E qai vakaukauataki koya na yalo i Jiova,+ e vaka ga na wa lineni kama na dali e ligana, e tasere na kena ivesu mai ligana.+ 15  E raica sara o Samisoni e dua na suinigalegale vou ni asa tagane, e dodoka yani na ligana me taura mai qai mokuta kina e 1,000 na tamata.+ 16  E qai kaya o Samisoni: “Ena suinigalegale ni asa tagane, e dua na ibinibini, e rua na ibinibini! Ena suinigalegale ni asa tagane au vakamatea kina e 1,000 na tamata.”+ 17  Ni vosa oti ga o Samisoni e kolotaka tani na suinigalegale, qai vakayacana na vanua oya me o Ramailiai.*+ 18  Dua na ka na nona karamaca, e kerei Jiova sara, e kaya: “O kemuni ga oni vakayacora na veivakabulai levu qo vua na nomuni tamata. Ia qo meu mate ena karamaca, meu bale e ligadra na sega ni cili qo?” 19  E qai wasea na Kalou na qara e tiko e Liai mani vure mai kina na wai.+ Ni gunu oti ga e kaukaua mai, e bulabula. Oya na vuna e vakayacana kina na vanua qori me o Eniakori,* se tiko ga e Liai me yacova na siga qo. 20  E lewai ira na Isireli o Samisoni ena nodra gauna na kai Filisitia me 20 na yabaki.+

iVakamacala e ra

Se “ina rumu e loma.”
Ipe., “na yavadra e dibidra.”
Kena ibalebale “Na Vanua Cecere ni Suinigalegale.”
Kena ibalebale “Na Mena Waivure o Koya a Tagi.”