Nodra Cakacaka na Yapositolo 9:1-43

  • Lako o Saula i Tamasiko (1-9)

  • Talai o Ananaiasa me lai vukei Saula (10-19a)

  • Vunautaki Jisu o Saula mai Tamasiko (19b-25)

  • Lako o Saula i Jerusalemi (26-31)

  • Vakabulai Inia o Pita (32-35)

  • Vakaturi o Tokasa na marama yalovinaka (36-43)

9  E sega ni cegu o Saula na vakarerei ira na tisaipeli ni Turaga kei na nona via vakamatei ira sara ga.+ E mani lako vua na bete levu  me lai kerea me volai eso na ivola ina veivalenilotu e Tamasiko me rawa ni kauti ira vakavesu i Jerusalemi na tagane kei na yalewa era lewe ni ilawalawa e vakatokai Na Sala.+  Ni volekati Tamasiko yani ena nona ilakolako, e qai cilavi koya vakasauri e dua na rarama mai lomalagi,+  e bale sara ina qele qai rogoca e dua na domo e kaya vua: “I Saula, I Saula, na cava o vakacacani au tiko kina?”  E taroga: “O cei o kemuni, Turaga?” E qai sauma na Turaga: “O yau o Jisu+ o vakacacana tiko.+  Mo tucake, lako ina koro, ena qai tukuni vei iko na ka mo cakava.”  Era sega ni vosa rawa o ira na tomani koya tiko, era rogoca na domo, era sega ga ni raica e dua.+  E qai duri mai o Saula ena qele, e tadola tu na matana, ia e sega ni raica e dua na ka. Era mani tubera na ligana qai kauti koya i Tamasiko.  Siga tolu nona sega ni raica tu e dua na ka,+ e sega ni kana, sega tale ga ni gunu. 10  E tiko ena gauna ya e Tamasiko e dua na tisaipeli na yacana o Ananaiasa,+ e kaya vua na Turaga ena raivotu: “Ananaiasa!” E sauma o koya: “O yau qo Turaga.” 11  Mani kaya vua na Turaga: “Tucake, lako ina gaunisala e vakatokai o Dodonu, lai raica ena vale nei Jutasa e dua na tagane mai Tarisu,+ na yacana o Saula. Raica, e masu sara tiko ga o koya, 12  qai raica ena raivotu e dua na tagane, na yacana o Ananaiasa ni lako yani vua, e tabaki koya e ligana me rai tale kina.”+ 13  Ia e sauma o Ananaiasa: “Turaga, levu na itukutuku au rogoca me baleta na tagane qo, e levu na ka rarawa e cakava vei ira na nomuni tamata yalosavasava e Jerusalemi. 14  Era sa vakadonuya na iliuliu ni bete me vesuki ira kece era masuta na yacamuni ena vanua qo.”+ 15  Ia e kaya vua na Turaga: “Mo lako, niu sa digitaka oti na tagane qo+ me tukuna na yacaqu ina veimatanitu,+ vei ira tale ga na tui+ kei ira na luvei Isireli. 16  Au na qai vakaraitaka vakamatata vua na levu ni ka ena sotava ena vuku ni yacaqu.”+ 17  E mani lako o Ananaiasa, lai curu sara i vale, e tabaki Saula e ligana qai kaya: “I Saula na taciqu, e talai au mai na Turaga o Jisu, o koya a rairai vei iko ena sala o muria mai, me rawa ni o rai tale, me sobuti iko tale ga na yalo tabu.”+ 18  E vakasauri na kena lutu mai matana na ka e vaka na vari ni ika, e mani rai tale. Oti ya e tucake sa qai papitaiso. 19  E kana, e kaukaua tale mai. E vica tale na siga nona tiko vata kei ira na tisaipeli e Tamasiko.+ 20  Sega ni wawa tale ni sa vunautaki Jisu ena veivalenilotu, ni o koya qo na Luve ni Kalou. 21  Ia era kurabui kece na rogoci koya ra qai kaya: “Sega ni o koya ga qo e dau vakalolomataki ira na masuta na yaca qo mai Jerusalemi?+ Sega beka ni inaki tale ga ni nona lako mai me vesuki ira qai kauti ira vei ira na iliuliu ni bete?”+ 22  Ia sa qai gumatua ga o Saula, e vakadrukai ira na Jiu e Tamasiko ena nona vakadinadinataka vakamatata ni qo ga na Karisito.+ 23  Ni oti e vica vata na siga, era qai bukiveretaka na Jiu mera vakamatei koya.+ 24  Ia e qai kila o Saula na nodra bukivere. Era yadrava vinaka tale ga na matamata ena siga kei na bogi ena nodra via vakamatei koya. 25  Era mani kauti koya nona tisaipeli ena bogi ra qai vakalutulututaki koya sobu ena dua na basikete mai na katubaleka ni bainikoro.+ 26  Ni yaco i Jerusalemi,+ e saga sara me lai tomani ira na tisaipeli, ia era rerevaki koya kece nira sega ni vakabauta ni sa tisaipeli dina. 27  E mani vukei Saula o Panapasa+ qai kauti koya vei ratou na yapositolo. E vakamacalataka sara vei ratou na nona raica o Saula na Turaga e gaunisala+ kei na nona vosa vua, vaka kina nona doudou me vunau ena yaca i Jisu mai Tamasiko.+ 28  E tiko vata ga kei ratou mai Jerusalemi, e cakava na ka e dau cakava e veisiga qai doudou ni vunau ena yaca ni Turaga. 29  E veivosaki e veileti tale ga kei ira na Jiu vosa vaKirisi, ia dua na ka nodra saga mera vakamatei koya.+ 30  Nira sa kila qo na veitacini, era kauti koya sobu i Sisaria me lako sara i Tarisu.+ 31  E qai vakilai e dua na gauna ni vakacegu ena ivavakoso ena vanua taucoko o Jutia, Kalili, kei Samaria.+ E bulabula na ivavakoso, era rerevaki Jiova* na lewena, era vakila tale ga na veivakacegui ni yalo tabu+ qai tubu tiko ga na kedra iwiliwili. 32  Ni lako voli o Pita ena yasayasa kece ya, e lako sobu tale ga vei ira na yalosavasava era tiko e Lita.+ 33  E raica kina e dua na tagane na yacana o Inia, sa yabaki walu nona davo tu ga ena nona idavodavo ena vuku ni paralasi. 34  E kaya vua o Pita: “Inia, sa vakabulai iko o Jisu Karisito.+ Tucake, samaka nomu idavodavo.”+ Mani tucake ena gauna vata ya. 35  Nira raici koya o ira kece na tiko e Lita kei na Buca o Seroni, era veisau sara ga mera vakabauta na Turaga. 36  Ia mai Jopa e tiko kina e dua na tisaipeli na yacana o Tavaita, ni vakadewataki, e kena ibalebale “Tokasa.” E yalewa dau cakacaka qai dau soli iloloma vei ira na vakaleqai. 37  Ia e tauvimate mani mate sara. Era vakasilima ra qai vakadavora na yagona ena rumu ni vale e cake. 38  E veivolekati ga na vanua o Lita kei Jopa, nira rogoca gona na tisaipeli ni tiko mai na koro ya o Pita, era qai tala e rua na tagane me rau lai kerei koya: “Keimami kerea mo lako sara ga mai qo vei keimami.” 39  E tucake sara ga o Pita, eratou lako. Ni yaco yani, erau kauti koya sara ina tabavale e cake. Era vakaraitaka tagitagi na yada na isulu balavu e loma kei na isulu e sau a cula o Tokasa ni se bula vata kei ira. 40  E vakatalai ira kece i tuba o Pita,+ e tekiduru qai masu. E qara ina yago qai kaya: “Tavaita, duri!” E rai mai qai raici Pita, mani dabe sara.+ 41  E dodoka yani o Pita na ligana, e vakaduri koya cake, qai kacivi ira na yalosavasava kei na yada me vakaraitaka vei ira ni sa bula tale o Tavaita.+ 42  E kuruseta na vanua taucoko o Jopa na italanoa ni ka e yaco qo, e levu era mai vakabauta kina na Turaga.+ 43  Vica tale na siga nona tiko vata kei Saimoni na daucaka leca, e Jopa.+

iVakamacala e ra

Raica na iKuri A5.