Nodra Cakacaka na Yapositolo 8:1-40
8 E marautaka o Saula na nona vakamatei o Sitiveni.+
Ena siga ya, era vakacacani sara vakalevu na lewe ni ivavakoso e Jerusalemi. Era dui se kece ina veivanua e Jutia kei Samaria, ratou qai vo ga na yapositolo.+
2 Ia eso na tagane yalodina era kauta na yago i Sitiveni mera lai buluta, dua na ka na nodra tagicaki koya.
3 Sa qai torosobu ga na nona vakacacani ira na lewe ni ivavakoso o Saula. E curuma sara ga na vale yadua, yarataki ira mai tuba na tagane kei na yalewa, qai balati ira i valeniveivesu.+
4 Ia o ira na veiseyaki ya era sa qai tukuna yani na itukutuku vinaka ni vosa ni Kalou ena vanua kece era dui lako kina.+
5 Sa qai lako sobu o Filipi ina koro o Samaria,+ e lai vunautaki Karisito sara vei ira.
6 Era duavata na lewenivanua ena nodra vakatudaliga matua vei Filipi, era rogoci koya ra qai sarava na nona cakamana.
7 E levu e curumi ira na yalo velavela. Ia era qoqolou ra qai lako tani.+ Era vakabulai tale ga e levu na paralasi kei na lokiloki.
8 Dua na ka na nodra marau na lewenikoro ya.
9 E tiko ena koro ya e dua na tagane e dau cakava tu e liu na cakacaka veivakurabuitaki, na yacana o Saimoni, e dau vakadrukai ira na kai Samaria, qai dau lavelaveti koya cake.
10 O ira kece, me tekivu vei koya e lailai duadua me yacovi koya e levu duadua, era dau vakarorogo vua ra qai kaya: “E laurai sara ga vua na kaukaua ni Kalou.”
11 Era dau vakarorogo vua ni sa dua na gauna balavu nona vakadrukai ira voli ena nona cakaiba.
12 Ia nira vakabauti Filipi ni tukuna vei ira na itukutuku vinaka ni Matanitu ni Kalou+ kei na yaca i Jisu Karisito, era sa qai papitaiso na tagane kei na yalewa.+
13 E mai vakabauta tale ga o Saimoni, e papitaiso sara, erau mai veitokani dredre kei Filipi.+ Dua na ka nona kurabuitaka na cakamana kei na ka veivakurabuitaki e cakava o Filipi.
14 Ni ratou rogoca na yapositolo eratou tiko e Jerusalemi nira sa ciqoma na kai Samaria na vosa ni Kalou,+ eratou mani talai Pita kei Joni i kea.
15 Erau lako sobu i Samaria, rau masulaki ira me sobuti ira na yalo tabu.+
16 E se sega ni dua vei ira e sobuta na yalo tabu, era se papitaisotaki ga ena yaca ni Turaga o Jisu.+
17 Erau tabaki ira e ligadrau,+ e qai sobuti ira na yalo tabu.
18 Ni raica o Saimoni ni sobuti ira na yalo tabu ena nodrau veitabaki e ligadrau na yapositolo, e via soli ilavo sara vei rau,
19 e kaya: “Drau solia tale ga vei au na kaukaua qo, me sobuti ira yadua au tabaka e ligaqu na yalo tabu.”
20 Ia e kaya vua o Pita: “Mo drau rusa vata mada ga kei na nomu siliva, ni o nanuma ni o rawa ni volia na isolisoli wale ni Kalou ena ilavo.+
21 E sega sara ga ni dua na nomu ilesilesi se ivotavota ena ka qo, ni sega ni dodonu na lomamu ena mata ni Kalou.
22 Mo veivutunitaka gona nomu ivalavala ca, qai kere veivosoti vei Jiova* de rawa ni vosoti iko ena inaki ca ni lomamu,
23 niu raica ni o poisoni gaga, o qai bobula ena veika e sega ni dodonu.”
24 E sauma vei rau o Saimoni: “Drau masulaki au mada vei Jiova* me kua ni yacovi au na ka drau tukuna tiko.”
25 Ni rau vakamacalataka oti vakavinaka na vosa i Jiova,* erau qai lesu i Jerusalemi, rau tukuna tale ga na itukutuku vinaka ena levu na nodra koro na kai Samaria.+
26 E qai kaya vei Filipi na agilosi i Jiova:*+ “Tucake mo lako ina ceva ena gaunisala mai Jerusalemi me cici sobu i Kesa.” (Qo na gaunisala ena vanua dravuisiga.)
27 Mani tucake e lako sara. Ni rai yani e raica na matanivanua ni Iciopea, e nona dauniyau, e nona vakailesilesi liu tale ga na ranadi ni Iciopea, o Kadasi.* E lako na matanivanua qo i Jerusalemi me lai sokalou.+
28 Ni lesu mai, e vodo tiko ena nona qiqi qai wilika tiko vakadomoilevu na ivola i Aisea na parofita.
29 Mani kaya vei Filipi na yalo tabu: “Lako volekata na qiqi qo.”
30 Ni cici yani o Filipi ena yasa ni qiqi, e rogoci koya sara ni wilika tiko i cake na ivola i Aisea na parofita, e qai kaya: “O kila na ka o wilika tiko?”
31 E sauma: “Meu kila vakacava ke sega ni dua e vakavulici au?” E mani vakamasuti Filipi me vodo yani ina qiqi me lai dabe e yasana.
32 A wilika tiko na wase ni iVolatabu qo: “E sega ni dolava na gusuna me vaka na sipi e kau me lai vakamatei, e vaka tale ga na lami e galu voli e mata i koya na dauveikoti.+
33 E vakamaduataki, e kau tani vua na lewadodonu.+ O cei ena vakamacalataka vakamatailalai na nona iyatukawa? Ni sa kau tani e vuravura na nona bula.”+
34 E kaya vei Filipi na matanivanua: “Yalovinaka, e tukuni cei tiko na parofita? E tukuni koya ga se dua tale?”
35 Sa qai vakamacala o Filipi, e tekivu ena tikinivolatabu qo ena nona tukuna vua na itukutuku vinaka me baleti Jisu.
36 Ni toso tiko na ilakolako e gaunisala, ratou yacova sara e dua na tobu, mani kaya na matanivanua: “Raica! Sa tu qo na wai. Na cava e tarova na noqu papitaiso?”
37 * ——
38 Sa qai vakarota me tu vakadua na qiqi, rau sobu ruarua i wai o Filipi kei na matanivanua, sa qai papitaisotaki koya o Filipi.
39 Ni rau cabe mai wai, e kauti Filipi totolo sara na yalo tabu i Jiova,* e sega ni qai raici koya tale na matanivanua, ia e gole yani o koya ena marau levu.
40 E lako sara i Asoto o Filipi, e taleva na yasayasa kece ya ena nona vunautaka na itukutuku vinaka ena koro kece, me yaco sara i Sisaria.+
iVakamacala e ra
^ Na ikacivi era dau kacivi kina na ranadi ni Iciopea.
