Nodra Cakacaka na Yapositolo 5:1-42
5 E volitaka tale ga e dua na tikiniqele e dua na turaga na yacana o Ananaiasa kei Savaira na watina.
2 Ia e vunitaka e dua na iwase ni ilavo e rawa mai kina, e kila tale ga qo o watina, qai kauta na kena vo me lai solia vei ratou na yapositolo.+
3 Mani kaya o Pita: “Ananaiasa, cava e vakadoudoutaki iko kina o Setani mo lasutaka+ na yalo tabu,+ mo qai vunitaka e dua na iwase ni isau ni tikiniqele?
4 Ni se bera ni volitaki na qele, a sega ni nomu tu ga na kena lewa? Ia ni sa volitaki, sega beka ni o lewa tiko ga na kena ilavo? Na cava e uqeta na lomamu mo cakava kina na ka qo? O sega ni lasutaka na tamata, o lasutaka sara ga na Kalou.”
5 E cibati koya sara ga o Ananaiasa mani mate. Dua na ka nodra rere o ira na rogoca na kena itukutuku.
6 Era qai tucake na cauravou, era vivigi koya ena isulu, era kauti koya i tuba qai buluta.
7 Oti e rauta ni tolu na aua sa qai lako mai o watina, e sega ni kila na ka e yaco.
8 Qai kaya vua o Pita: “Tukuna mada vei au, qo na levu ni ilavo drau volitaka kina na tikiniqele?” Sauma o yalewa: “Io, qori sara ga.”
9 E mani kaya o Pita: “Na cava drau nakita kina mo drau vakatovolea na yalo i Jiova?* Raica, era sa tu e matanikatuba o ira na buluti watimu, era na kauti iko yani.”
10 Gauna vata ya e cibati koya yani e yavana mani mate sara. Nira lesu mai na cauravou, era raica ni sa mate tale tu ga. Era kauti koya, ra lai buluti koya ena yasa i watina.
11 Dua na ka nodra rere na lewe ni ivavakoso kece kei ira na rogoca na kena itukutuku.
12 Ia eratou tomana voli ga na yapositolo na nodratou cakamana kei na nodratou cakava na ka e veivakurabuitaki vei ira na lewenivanua,+ eratou dau soqoni vata tale ga ena lomavata ena Varada i Solomoni.+
13 Eso vei ira era sega sara ga ni doudou mera tomani ratou na tisaipeli, ia e levu na lewenivanua era dokai ratou.
14 Kena ikuri, e tubu tiko ga na kedra wiliwili era vakabauta na Turaga, e levu na tagane kei na yalewa.+
15 Era kauti ira mai na tauvimate, era vakadavori ira ena idavodavo lalai kei na ibe ena yasa sara ga ni nodra sala lelevu, me bau vakaruguta mada ga eso na iyaloyalo kei Pita ni tavali.+
16 Era tabili tale ga mai na ilala levu ena koro volekati Jerusalemi. Era kauti ira mai na tauvimate kei ira na curumi yalo velavela, era qai vakabulai kece.
17 Ia e tucake na bete levu kei ira na Setoki* era tiko vata kei koya ni sa tuburi ira mai na yalovuvu.
18 Era vesuki ratou na yapositolo ra qai biuti ratou ina valeniveivesu.+
19 Ia ena bogi e dolava na katuba ni valeniveivesu+ na agilosi i Jiova,* e kauti ratou mai tuba qai kaya:
20 “Dou lako, dou lai duri ena valenisoro, dou tukuna tiko ga vei ira na lewenivanua na ka e baleta na bula qo.”
21 Ni ratou rogoca oti qo, eratou curu ina valenisoro ni kida na mataka, eratou veivakavulici sara.
Ni yaco yani na bete levu kei ira na nona ilala, eratou kaciva sara na Sanadrini kei ira kece na qase era luvei Isireli, oti eratou talatala i valeniveivesu me ratou kau mai na yapositolo.
22 Ni ratou yaco yani na yadra, eratou sa yali e valeniveivesu na yapositolo, ratou mani lesu me ratou lai tukutuku.
23 Eratou kaya: “Keitou raica ni loka vinaka tu na valeniveivesu, era duri tu e mata ni katuba na yadra, ia ni keitou dolava yani, e sega ni dua e tu kina.”
24 Ni rogoca qo na ivakatawa ni valenisoro kei ira na iliuliu ni bete, era veilecayaki sara ga ra qai vaqaqa se na tini i vei na ka e yaco ya.
25 Ia e lako mai e dua qai kaya vei ira: “Raica, o iratou dou biuta i valeniveivesu eratou sa vunau tale tiko vei ira na lewenivanua ena valenisoro, eratou veivakavulici tale ga.”
26 E qai lako yani na ivakatawa kei ira nona yadra ra qai kauti ratou mai, era sega ga ni voravora vei ratou nira rerevaki ira na lewenivanua de ra vakaviriki ira ena vatu.+
27 Era mani kauti ratou mai me ratou mai duri ena mata ni Sanadrini qai vakatarogi ratou na bete levu.
28 E kaya: “Keimami a vakaroti kemudou matua mo dou muduka nomudou veivakavulici tiko ena yaca qori,+ raica, dou sa vakasinaiti Jerusalemi ena nomudou ivakavuvuli, dou qai saga me tarogi vei keimami na dra ni tamata qo.”+
29 Mani sauma o Pita kei ratou na vo ni yapositolo: “E dodonu me keitou talairawarawa ga vua na Kalou ni iliuliu, sega vua na tamata.+
30 Na nodra Kalou na tukada a vakaturi Jisu, o koya dou vakamatea, dou qai vakaliliga ena kau.*+
31 A vakacerecerei koya na Kalou ena ligana imatau+ me iLiuliu Levu,+ me iVakabula,+ mera veivutuni kina na Isireli, me vosoti tale ga na nodra ivalavala ca.+
32 O keitou na ivakadinadina ni ka qo,+ vaka kina na yalo tabu,+ e solia na Kalou vei ira era talairawarawa vua ni nodra iliuliu.”
33 Dua na ka nodra cudru nira rogoca ya, era vinakata sara ga mera vakamatei ratou.
34 Ia e tucake ena Sanadrini e dua na Farisi na yacana o Kamelieli,+ e qasenivuli ni Lawa, ra dau dokai koya na lewenivanua kece. E vakarota me ratou kau mada vakalekaleka i tuba na yapositolo.
35 E qai kaya vei ira: “Kemuni na Isireli, ni qarauna vinaka na ka oni via cakava vei ratou qo.
36 A basika ena dua na gauna o Ceuta, e kaya ni dua na ka o koya, era muri koya sara e dua na ilala e rauta nira le 400. Ia e qai vakamatei, ra dui se o ira na muri koya tiko, mai tini botoilevu yani na nodra sasaga.
37 Oti, e basika o Jutasa na kai Kalili ena gauna ni volayaca, e vakamuai ira e dua na ilala levu mera muri koya. Ia e qai mate, ra dui veiseyaki kina na muri koya voli.
38 O koya gona, au kaya vei kemuni moni kua ni vakasagai ira qo, ni laivi ira ga. Ke vu vakatamata na nodra sasaga se nodra cakacaka, ena tini koso ga,
39 ia ke vakavuna na Kalou, oni na sega ni tarova rawa.+ De oni sega ni kila ni oni sa veivala tiko kei na Kalou.”+
40 Era mani rogoci koya ena vuku ni nona ivakamacala, ia era kacivi ratou na yapositolo, warolaki ratou,+ ra qai vakaroti ratou me ratou kua tale ni vosa ena yaca i Jisu, oti era sa qai laivi ratou me ratou lako.
41 Eratou mani biubiu mai na matadra na Sanadrini. Dua na ka nodratou marau+ ni vakadonuya na Kalou me ratou vakacacani ena vuku ni yaca i Jisu.
42 Ena veisiga, ena valenisoro kei na veivale tale ga,+ eratou sega ni cegu ena nodratou veivakavulici kei na nodratou vunautaka na itukutuku vinaka kei Jisu, o koya na Karisito.+
iVakamacala e ra
^ Se “vunikau.”
