Nodra Cakacaka na Yapositolo 28:1-31
28 Ni keimami sa cabebula i vanua, keimami qai kila ni yaca ni yanuyanu ya o Melita.+
2 Era kauaitaki keimami dina na itaukei ni yanuyanu qo.* Era mai vakawaqa buka, era ciqomi keimami tale ga ena vuku ni tau ni uca kei na batabata.
3 Ia e lai tomika mai o Paula e vica na tikinikau qai biuta ena buka sa waqa tu. Ena katakata ni buka e dolo mai kina e dua na gata poisoni qai viviga na ligana.
4 Nira raica na itaukei ni sa lili tu e liga i Paula na gata poisoni qo, era sa qai veikayaka: “E daulaba dina o ka qo. E sa cabebula mai wasawasa, ia e sega ni laivi koya me bula o Lewadodonu.”
5 E qai kuretaka na gata ya ina buka o Paula, e sega ni dua na leqa e yacovi koya.
6 Era namaka tiko me vuvuce mai na yagona se me qiqi matemate vakasauri. Ni sa dede mai nodra wawa ra sega tale ga ni raica me yacovi koya na leqa, sa qai veisau tale nodra vakasama ena nodra kaya ni kalou.
7 E toka voleka ga e kea na itikotiko nei Pupiliu, e dua na turaga kilai ena yanuyanu qai vaqele levu. E ciqomi keimami qai qaravi keimami voli ena yalo ni veinanumi dina ena loma ni tolu na siga.
8 A davo voli na tamai Pupiliu ni tauvi koya na katakata kei na cokadra, e lako vua o Paula qai masulaki koya, tabaki koya e ligana, mai bula vinaka yani.+
9 Ni yaco oti ya, era lako tale ga vua na vo ni lewenivanua ena yanuyanu era tauvimate, ra mani vakabulai.+
10 Dua na ka nodra vakavinavinaka, era kauta mai e levu sara na iloloma. Ni keimami sa vakarau seredali, era sa qai usana mai na ka keimami gadreva.
11 Oti tale e tolu na vula keimami soko ena dua na waqa ni Alekisadria a mai vakaruru ena yanuyanu ena vulaililiwa, qo na ka e volai toka ena muailiu ni waqa, “Luvei Seusi.”
12 Keimami lai kele siga tolu toka ena wavu o Sairakuse,
13 mai kea keimami soko wavoki sara me yaco i Rijio. Oti e dua na siga keimami sa qai muria yani e dua na batinicagi mai na ceva, keimami yaco sara i Putioli ena ikarua ni siga.
14 Keitou sota e kea kei na so na veitacini, keitou mani kerei me keitou tiko tale mada me vitu na siga. Mai kea keitou qai lako i Roma.
15 Nira rogoca na keitou itukutuku na veitacini, era sa qai mai tavaki keitou sara ena Makete i Apio kei na Buretolu. Ni raici ira o Paula, e vakavinavinakataka sara ga na Kalou, e vakayaloqaqataki tale ga.+
16 Ni keimami yaco yani i Roma, e vakatarai me tiko duadua ga o Paula me yadravi koya tiko e dua na sotia.
17 Ia ni oti e tolu na siga e kacivi ira na nodra vakailesilesi na Jiu. Nira sa soqoni vata mai, e kaya vei ira: “Raveiwekani, au sega ni cakava e dua na ka meu saqati ira kina na lewenivanua se meu beca nodra ivakarau na tukada,+ ia era vesuki au mai Jerusalemi ra soli au sara ina ligadra na kai Roma.+
18 Nira vakatarogi au oti,+ era vinakata sara mera sereki au nira sega ni raica e dua na yavu meu vakamatei kina.+
19 Ia nira cata na Jiu, au sa kerea ga kina me rogoci au o Sisa.+ Au sega ni cakava qo meu beitaka kina na noqu vanua.
20 Qo na vuna au vinakata kina meda sota meu rawa ni vosa vei kemuni, ena vuku ni inuinui e baleti Isireli au mai vesu tu kina ena sinucodo qo.”+
21 Era qai kaya vua: “Keimami se sega ni taura e dua na ivola mai Jutia me baleti iko, se me lako mai e dua na wekada me mai vakasavuya se tukuna e dua na ka ca me baleti iko.
22 Ia keimami nanuma ni vinaka me keimami rogoci iko sara ga, ni keimami kila ni dau vosavakacacataki na matalotu qo+ ena veivanua kece ga.”+
23 Era mani lokuca e dua na siga mera sota kei koya, ra qai lako yani vakalewe levu ina nona icili. E vakamacalataka vei ira ena nona vunautaka sara vakavinaka na veika e vauca na Matanitu ni Kalou, me uqeti ira ena veika e baleti Jisu+ ena Lawa e vola o Mosese+ kei na nodra ivola na Parofita.+ E vakamacala tiko mai na mataka me yacova sara ni sa karobo.
24 Eso era vakabauta na ka e tukuna, eso tale era sega ni vakabauta.
25 Nira se duiyaloyalo tiko ga, era mani biubiu. E qai cavuta na vosa qo o Paula:
“E donu vinaka na nona a tukuna na parofita o Aisea vei ira na tukamuni ena veiuqeti ni yalo tabu,
26 e kaya: ‘Lako vei ira qo mo kaya: “Oni na rogoca sara ga, ia oni na sega ni kila, oni na raica dina, ia oni na sega sara ga ni kunea.+
27 Ni sega ni malele mai na lomadra na tamata qo, e didivara na daligadra, era sogota tale ga na matadra, mera kua ni rai e matadra, se rogo e daligadra, mera kila e lomadra na kena ibalebale ra qai saumaki mai meu vakabulai ira.”’+
28 Moni kila gona, ni sa kacivaki yani ina veimatanitu na veivakabulai ni Kalou,+ era na vakatudaliga dina kina.”+
29 * ——
30 E vakaitikotiko voli ga o Paula ena vale e sauma me rua na yabaki,+ qai dau vakacegui ira kece na lako yani vua,
31 e vunautaka vei ira na Matanitu ni Kalou, e vakavulici ira tale ga ena veika me baleta na Turaga o Jisu Karisito ena doudou+ qai sega ni dua e tarovi koya.
