Nodra Cakacaka na Yapositolo 27:1-44
27 Ni sa lewai me keimami soko i Itali,+ era qai soli Paula kei na so tale na kaivesu vua e dua na turaganivalu na yacana o Juliase ena mataivalu i Akusito.
2 Keimami vodo ena dua na waqa e Atiramitio e vakarau soko tiko ena ikelekele ni waqa era tiko ena baravi ni yasana o Esia. E veitomani ena soko qo o Arisitako,+ e dua na turaga ni Masitonia e vakaitikotiko e Cesalonaika.
3 Keimami kele yani i Saitoni ena siga tarava. Dua na ka nona kauaitaki* Paula o Juliase, e vakatarai koya sara me lako vei ira na nona itokani mera vakacegui koya.
4 Ni tomani na ilakolako, keimami soko raviti Saipurusi ni bau malumu toka kina na cagi, me vaka ni liwa kaukaua sara tiko.
5 Oti keimami qai soko kosova na wasawasa ena baravi kei Silisia kei Pamifilia, kele sara yani na neimami waqa ena ikelekele ni waqa e Maira, ena yasana o Lisia.
6 E lai raica e kea na turaganivalu e dua na waqa ni Alekisadria e soko i Itali, mani vakarota me keimami vodo kina.
7 E berabera dina neimami soko, ni oti e vica na siga keimami sa qai yaco i Nito. Ia e dua na ka neimami sasaga ni saqati keimami voli na cagi kaukaua. Keimami sokoravita na yanuyanu o Kiriti e Salimoni me bau malumu kina neimami soko.
8 Sega ni ka rawarawa na muri baravi qo, keimami yacova sara yani na vanua e vakatokai o Toba Malumu, e toka volekata ga na koro o Lasea.
9 Ni sa dede na neimami tiko e kea, e leqataki ke tomani na ilakolako ni sa oti tale ga na Siga ni Veibuluti,*+ e mani vakaraitaka o Paula na nona nanuma
10 vei ira: “Raveiwekani, au raica rawa ni soko qo ena yaco kina na leqa, ena leqa kina noda waqa, na iusana, na noda bula sara mada ga.”
11 Ia e sega ni rogoci Paula na turaganivalu, e rogoci kavetani ga kei na itaukei ni waqa.
12 E sega ni toba vinaka ni vakaruru ena vulaililiwa na toba qo, era mani kaya e levu mera biubiu mai kea mera soko i Finisia, e dua na toba e Kiriti e tadrava na vuaira kei na cevaira, mera lai vakaruru e kea ena vulaililiwa.
13 Ni liwa malua mai na ceva era nanuma ni sa na rawa na nodra inaki, era yavia sara nodra ikelekele ra sokoravita yani na baravi kei Kiriti.
14 Sega ni dede sa laba mai e dua na cagi kaukaua na yacana na Uruakulo.*
15 E roba na waqa na cagi kaukaua qo, keimami sega ni saqata rawa na matanicagi, keimami sa mani sorova me savu tu ga yani.
16 Keimami vakaruru ena dua na yanuyanu lailai o Kuta ni malumu kina na cagi, ia se dredre ga na neimami vueta na velovelo ina muaimuri ni waqa.
17 Ia ni vakavodoki rawa i waqa, keimami sa qai vesuvesuka na dago ni waqa me kaukaua kina, ni keimami leqataka de voca na waqa ena nukutoso kei Siratisi,* keimami seresereka na dali ni laca me keimami ciri yani.
18 Ni suaigelegele vakalevu na waqa ena cagi kaukaua, era mani vakamamadataka na kena iusana ena siga tarava.
19 Ena ikatolu ni siga, era sa qai balata i wai eso na iyaya ni soko.
20 E vica vata na siga neimami sega ni raica na matanisiga kei na kalokalo, sega tale ga ni mudu na cagi kaukaua, sa oti vakadua kina na vakanuinui ni keimami na bula.
21 Ni sa dede nodra sega tu ni kana, e qai tucake o Paula ena kedra maliwa, e kaya: “Raveiwekani, ke oni a rogoca ga na noqu ivakasala meda se kua mada ni seredali mai Kiriti, ke sega ni yacovi keda na leqa sa mai yaco tu qo.+
22 Au uqeti kemuni moni yaloqaqa, ena sega ni dua ena vakaleqai na nona bula, ena ca ga na waqa.
23 Ena bogi qo a mai tu e yasaqu e dua na agilosi+ ni Kalou e taukeni au, na Kalou au dau qarava qai sokaloutaka,
24 e kaya: ‘Kua ni rere Paula. O na lai tu ena mata i Sisa.+ Raica, na Kalou ena vakabulai ira kece oni soko vata tiko.’
25 O koya gona moni yaloqaqa raveiwekani, niu vakabauta ni na vakayacora sara ga na Kalou na ka sa tukuni vei au.
26 Eda na kasa ga ena dua na yanuyanu.”+
27 Ena ika14 ni bogi e tavutavulaka voli kina na neimami waqa na biau voravora ni Wasa o Atiria, era vakila ena lomalomanibogi na kaimua ni sa voleka e dua na yanuyanu.
28 Era mani vakarautaka na titobu ni wai, era raica ni katu 20,* vakalailai tale i liu era se baci vakarautaka na titobu ni wai, era raica ni katu 15.*
29 Ena nodra leqataka de keimami kasa ena veivatu, era mani balata e va na ikelekele ena muaimuri ni waqa, ra qai diva me totolo mai na rarama.
30 Era sa qai vakalutulututaka i wai na velovelo na kaimua ena nodra via dro, era cakava vakailawaki mera nanuma na leweniwaqa nira bala ikelekele tiko ena muailiu ni waqa.
31 E kaya o Paula vei koya na turaganivalu kei ira na sotia: “Oni na bula ke ra tiko ga e waqa na tagane qo.”+
32 Era mani gutuva na dali ni velovelo na sotia me lutu yani.
33 Ni sa voleka na rarama, sa qai uqeti ira kece o Paula mera kana, e kaya: “Sa ika14 ni siga nikua na nomuni nanamaki voli kei na nomuni sega ni bau kania e dua na ka.
34 Au uqeti kemuni gona moni kana mada ni na yaga vei kemuni, ni na sega ni yali e dua na drauniulumuni.”
35 Ni cavuta oti qo, e taura e dua na madrai, vakavinavinakataka vua na Kalou e matadra kece, tikica, sa qai kania.
36 Era sa qai nuidei kece, ra kana sara.
37 Keimami le 276 kece na tiko e waqa.
38 Nira sa mamau, era sa qai vakamamadataka na waqa ena nodra balata i wai na witi.+
39 Ni sa siga na vanua, era sega ni taura rawa na vanua ya,+ era raica ga na toba kei na kena matasawa. E mani lomadra mera saga mera vakasa na waqa i matasawa.
40 Era gutuva na ikelekele me lutu yani i wai, ena gauna vata ya era sereka kina na ivesu ni iuli, ra vakarewataka na laca lailai e muailiu, ra qai savu yani i matasawa.
41 Ena nodra savu ya, e qai tao ga ni sa kasa na waqa ena nuku cere, na vanua erau sota kina e rua na kui, e coba kina na muailiu qai sega ni yavala rawa, ia e kakaseresere na muaimuri.+
42 Sa ra qai via vakamatei ira na kaivesu na sotia de ra qalobula ra qai dui dro.
43 Ia e vinakata na turaganivalu me vakabulai Paula, mani tarovi ira ena ka era via cakava. E vakaroti ira na rawa ni qalo mera rika i wai mera liu yani i vanua,
44 ia o ira na kena vo mera vakayagataka na kau kei na so tale na ka era kunea e waqa me nodra iqaloqalo. Keimami mani cabebula kece i vanua.+
iVakamacala e ra
^ Se “nona lomana na kainona.”
^ Ena vula na Tisri e dau tekivu kina na vulaiuca, e dau voravora tale ga na wasawasa.
^ Se na vuaicake.
^ Raica na iVakamacala ni Vosa.
