Nodra Cakacaka na Yapositolo 26:1-32

  • Vakamacalataki koya o Paula e mata i Akaripa (1-11)

  • Vakamacalataka o Paula nona tavuki (12-23)

  • Ka e tukuna o Fesito kei Akaripa (24-32)

26  E kaya vei Paula o Akaripa:+ “Sa rawa ni o vakamacala.” E dodoka yani na ligana o Paula qai tekivu vakamacala me sauma kina nodra veibeitaki:  “Me baleta na ka kece era beitaki au kina na Jiu,+ au marautaka niu mai tu e matamuni nikua, Tui Akaripa, meu sauma nodra veibeitaki,  vakabibi ni oni buta vinaka ena ivakarau kece vakaJiu kei na ka keimami dau veiletitaka. Au kerea kina moni yalovinaka moni rogoci au mada.  “Na ivakarau ni noqu bula, tekivu niu se itabagone, niu se bula vata kei ira na kainoqu, kei na noqu dau tiko e Jerusalemi, era kila kece na Jiu+  keimami bula vata ena gauna ya, era rawa tale ga ni vakadinadinataka vei kemuni ke ra vinakata, niu dau muria sara ga vakamatailalai na lawa ni neimami lotu,+ niu a Farisi.+  Ia qo au sa mai veilewaitaki ena noqu vakanuinui ina vosa ni yalayala ni Kalou vei ira na tukai keimami.+  Nira via raica tale ga na lewe ni neimami yavusa e 12 na vakayacori ni vosa ni yalayala qo, era gumatua kina ena nodra veiqaravi tabu vua na Kalou ena siga kei na bogi. Ia na inuinui qo kemuni na Tui, era sa mai beitaki au kina na Jiu.+  “Na cava sa rui dredre kina vei kemuni moni vakabauta ni vakaturi ira na mate na Kalou?  O yau, au nanuma ni dodonu meu saqati ira vakaukaua na lewe ni ilawalawa era vakatokai ena yaca i Jisu na kai Nasareci. 10  Qo sara ga na ka au cakava mai Jerusalemi. Au balati ira i valeniveivesu e levu na yalosavasava+ nira solia vei au na veivakadonui na iliuliu ni bete.+ Ena gauna e tau kina vei ira na itotogi mate, au dau tokona sara ga. 11  Au totogitaki ira wasoma ena valenilotu kece, au vakasaurarataki ira mera cakitaka e matanalevu na nodra vakabauta. Ena levu tale ga ni noqu katakatataki ira, au lako sara kina meu lai vakararawataki ira na tiko ena koro tale eso. 12  “Niu cakava tiko qo, ena noqu ilakolako i Tamasiko ena nodra veivakadonui kei na nodra ivakaro na iliuliu ni bete, 13  au mani raica e gaunisala ena sigalevu tutu, kemuni na Tui, e dua na rarama e kaukaua cake sara mai na rarama ni matanisiga mai lomalagi, e cila vakavolivoliti au kei ira na salavata kei au.+ 14  Ni keimami sa bale kece ina qele, au qai rogoca e dua na domo ni kaya vei au ena vosa vakaIperiu: ‘Saula, Saula, na cava o vakacacani au tiko kina? Ena lako vakaca ga vei iko na nomu caqeta tiko na matanimoto.’* 15  Au qai kaya: ‘O cei o kemuni, Turaga?’ E tukuna vei au na Turaga: ‘O yau o Jisu, o koya o vakacacana tiko. 16  Tucake mada e yavamu. Au sa vakatakilai au qo vei iko, meu digitaki iko mo noqu dauveiqaravi mo tukuna tale ga na veika o sa raica kei na veika au na vakaraitaka vei iko me baleti au.+ 17  Au na vakabulai iko mai vei ira qo kei ira na veimatanitu tale eso au na talai iko kina,+ 18  mo dolava na matadra,+ mo vagolei ira mai na butobuto+ ina rarama,+ mai na lewa i Setani+ ina veidusimaki ni Kalou me vosoti kina na nodra ivalavala ca,+ mera taukena tale ga na ivotavota e votai vei ira na sa vakasavasavataki ena nodra vakabauti au.’ 19  “O koya gona, Tui Akaripa, au sega ni talaidredre ina raivotu vakalomalagi. 20  Au lai tukuna ga e liu vei ira e Tamasiko,+ Jerusalemi,+ na vanua kece e Jutia, vei ira tale ga ena veimatanitu mera veivutuni ra lesu vua na Kalou, ra qai cakava na ka e vakaraitaka nira sa veivutuni.+ 21  Qo na vuna era tauri au kina na Jiu ena valenisoro ra qai saga mera vakamatei au.+ 22  Ia ena veivuke ni Kalou au vosa tiko kina me yacova mai qo vei ira na tauvanua kei ira na turaga, au tukuna tiko ga na ka era kaya na Parofita kei na ka e kaya o Mosese ni na yaco+ 23  ni na vakararawataki mada na Karisito,+ e imatai tale ga me vakaturi mai na mate,+ ena vunautaka na rarama vei ira na Jiu kei ira na lewe ni veimatanitu.”+ 24  Ni se vosa tiko o Paula me sauma na nodra veibeitaki, e kaya yani vakadomoilevu o Fesito: “Sa ca na ulumu Paula! Na levu ni nomu vuku sa lai ca tale kina na ulumu!” 25  Ia e kaya o Paula: “E sega ni ca na uluqu, kemuni Fesito na kovana, au tukuna ga na ka e dina kei na ka e dodonu. 26  E kila vinaka na tui na ka qo, ya na vuna au vosa doudou tiko kina, au vakadeitaka ni kila vinaka na ka qo, ni sega ni caka vakavuni.+ 27  Kemuni Tui Akaripa, oni vakabauti ira na Parofita? Au kila ni oni vakabauti ira.” 28  Ia e kaya vei Paula o Akaripa: “Sa voleka ni o rawai au meu lotu vaKarisito.” 29  E qai kaya o Paula: “Se voleka se yawa, e noqu masu vua na Kalou ni sega ni o kemuni ga, ia o ira kece era rogoci au nikua mera vakataki au, mera kua ga ni vakataki au ena sinucodo qo.” 30  Sa qai tucake na tui, na kovana, kei Perinaise, kei ira na turaga era dabe vata tiko. 31  Nira sa biubiu era sa qai veitalanoataka na ka e yaco: “E sega ni dua na ka e cakava na tamata qo me mate se vesu kina.”+ 32  E qai kaya o Akaripa vei Fesito: “Ke sega ni kerea na tamata qo me rogoci koya tale o Sisa ke sa sere.”+

iVakamacala e ra

E dua na mataqali moto e dau qisori kina na manumanu.