Nodra Cakacaka na Yapositolo 23:1-35
23 E wanonovi ira na lewe ni Sanadrini o Paula qai kaya: “Kemuni na wekaqu, e savasava sara tu ga na noqu lewaeloma ena mata ni Kalou+ me yacova mai nikua.”
2 Ni rogoca ya o Ananaiasa na bete levu, e qai vakaroti ira na tucake volekati Paula mera sabaka na gusuna.
3 E qai kaya vua o Paula: “Ena yaviti iko na Kalou, o iko na lalaga boro vulavula. O dabe mo lewai au me vaka ena Lawa, o qai beca tale na Lawa ena nomu vakarota meu lausaba?”
4 Era qai kaya na tucake voleka tu: “O karaca tiko na bete levu ni Kalou?”
5 E kaya o Paula: “Kemuni na wekaqu, au sega ni kila ni bete levu. Ni volai, ‘Mo kua ni vosavakacacataki koya e liutaki kemuni.’”+
6 Ni kila o Paula ni dua na kena iwase era Setoki e dua tale era Farisi, e qai kaya ena domolevu vei ira na lewe ni Sanadrini: “Kemuni na wekaqu, o yau qo na Farisi,+ au luve ni Farisi. Au mai lewai tiko qo ena vuku ni inuinui ni veivakaturi.”
7 Nona cavuta qo era veisei sara ga kina na Farisi kei na Setoki, ra mai tawase kina na lewenibose.
8 Era kaya na Setoki ni sega na veivakaturi, e sega na agilosi, kei na kabula vakayalo tale eso, ia ya na ka era vakabauta dei na Farisi.+
9 E mani tubu na kaikaila, era tucake eso na nodra vunivola na Farisi, e kaukaua nodra veiba, era kaya: “Keimami sega ni raica e dua nona cala na tamata qo, ia o cei e kila de vosa vua e dua na kabula vakayalo, se agilosi+—.”
10 Ni sa katakata na veileti e leqataka tale na komada ni mataivalu de ra buturaki* Paula, mani tala eso na sotia mera dreti koya mai na kedra maliwa qai kauti koya sara ina keba ni mataivalu.
11 Ia ena bogi ya, e mai tu e yasana na Turaga qai kaya vua: “Mo yaloqaqa!+ Ni o sa tukuni au vakamatata e Jerusalemi, o na lai tukuni au tale ga i Roma.”+
12 Ni siga na vanua era sa qai bukivere na Jiu era qai bubuluitaka mera cudruvi ke ra kana se gunu ni bera nira vakamatei Paula.
13 E 40 vakacaca na tagane era wili tiko ena bubului kei na bukivere qo.
14 Era lako vei ira na iliuliu ni bete kei ira na qase, ra qai kaya: “Keimami bubuluitaka me keimami cudruvi ke keimami kania e dua na ka ni bera ni keimami vakamatei Paula.
15 O kemuni kei na Sanadrini, ni tukuna vua na komada ni mataivalu me kauti Paula sobu mai vei kemuni, me nanumi kina ni oni via vaqaqa vinaka na nona kisi. Ia ni bera ni yaco mai, keimami sa na vakarau tu me keimami vakamatei koya.”
16 Ia e rogoca nodra bukivere na luvena tagane na ganei Paula. E curu sara ina keba ni mataivalu me lai tukuna vei Paula.
17 E mani kaciva o Paula e dua na turaganivalu qai kaya vua: “Kauta na cauravou qo vua na komada ni mataivalu me vakasavuya vua e dua na itukutuku.”
18 Sa qai kauti koya na turaganivalu ya vua na komada qai kaya: “E kacivi au na kaivesu o Paula qai kerei au meu kauta mai na cauravou qo ni via tukuna vei kemuni e dua na ka.”
19 E taura na ligana na komada ni mataivalu, e kauti koya vakatikitiki qai tarogi koya: “Na cava o via tukuna vei au?”
20 E kaya na cauravou: “Era sa duavata na Jiu mera kerei kemuni moni kauti Paula sobu ina Sanadrini nimataka, me nanumi kina nira via kila dina na veika e baleti koya.+
21 Ia moni kua ni vakalaiva mera rawai kemuni, ni 40 vakacaca na nodra tagane era sa waraki Paula tu e gaunisala, era sa bubului oti mera cudruvi ke ra kana se gunu ni bera nira vakamatei koya,+ era sa vakarau tu qo, era waraka tiko nomuni veivakadonui.”
22 Sa qai laiva na komada ni mataivalu me lako na cauravou, ia e vakaroti koya ga: “Kua ni lai tukuna vua e dua ni o sa mai tukuna vei au na ka qo.”
23 Sa qai kaciva e rua na turaganivalu qai kaya vei rau: “Drau vakarautaka e 200 na sotia mera lako vakadodonu i Sisaria ena ikatolu ni aua* ena bogi. Me 70 tale ga na dauvodo ose, kei na 200 era dau vala ena moto.
24 Me vakarautaki tale ga na ose me vodo kina o Paula me kauti koya vakavinaka yani vei Filikesa na kovana.”
25 E mani va qo na lewe ni nona ivola:
26 “Kilotiu Laisiasa, vei kemuni Filikesa na kovana. Ni bula vinaka!
27 Era vesuka na tagane qo na Jiu, ra voleka sara ni vakamatea. Ia au yaco totolo yani kei ira na noqu sotia qai vakabulai koya+ niu rogoca ni kai Roma.+
28 Niu via kila na vuna era beitaki koya tiko kina, au mani kauti koya sobu ina nodra Sanadrini.+
29 Au qai raica nira beitaki koya tiko ena veika e vauca na nodra Lawa,+ ia e sega ni beitaki ena dua na ka me mate se vesu kina.
30 Ia ni mai tukuni vei au nira bukiveretaki koya,+ au sa talai koya yani kina qo vei kemuni, au vakaroti ira na beitaki koya tiko mera cavuta ga e matamuni na nodra veibeitaki.”
31 Era mani kauti Paula na sotia+ i Anitipatiri ena bogi me vaka e vakaroti vei ira.
32 Ena siga tarava era tukuna na sotia vei ira na dauvodo ose mera kauti Paula, ra suka o ira ina nodra keba.
33 Era yaco yani i Sisaria na dauvodo ose, lai soli na ivola vua na kovana, ra soli Paula tale ga vua.
34 Ni wilika oti na ivola, e taroga se yasayasa cava e cavutu mai kina, e taura rawa sara ni kai Silisia.+
35 E kaya o koya, “Au na rogoca vinaka na nomu kisi nira yaco mai na beitaki iko.”+ E qai vakarota me yadravi tiko ena vale vakatui nei Eroti.
