Nodra Cakacaka na Yapositolo 22:1-30
22 “Kemuni na taciqu kei na tamaqu, ni rogoci au mada meu vakamacala.”+
2 Nira rogoca tale ni vosa vakaIperiu vei ira, era sa qai vakanomodi ga, e kaya:
3 “O yau na Jiu,+ au sucu e Tarisu e Silisia,+ ia au vuli ena koro qo, e noqu qasenivuli o Kamelieli.+ Au vakavulici meu muria sara ga vakavoleka na nodra Lawa na noda qase.+ Au dau gumatua ena noqu qarava na Kalou me vakataki kemuni ga ena gauna qo.+
4 Au vakararawataki ira era muria Na Sala me yacova sara nodra mate, au vesuki ira na tagane kei na yalewa mera bala i valeniveivesu.+
5 Ena vakadinadinataka qo na bete levu kei ira na qase era lewe ni matabose. Niu a kauta nodra ivola vei ira na wekada mai Tamasiko, au mani lako meu lai kauti ira mai na vesuki tiko e kea mera mai totogitaki e Jerusalemi.
6 “Ia niu volekati Tamasiko yani, rauta na sigalevu tutu, e qai cila vakavolivoliti au vakasauri e dua na rarama levu mai lomalagi,+
7 au bale sara ga ina qele, au rogoca tale ga e dua na domo ni kaya vei au: ‘Saula, Saula, na cava o vakararawataki au tiko kina?’
8 Au sauma yani: ‘O cei o kemuni, Turaga?’ E qai kaya vei au: ‘O yau o Jisu na kai Nasareci, o koya o vakacacana tiko.’
9 Eratou raica dina na rarama na tagane keitou salavata, eratou sega ga ni rogoca na domo e vosa vei au.
10 Au mani kaya: ‘Na cava meu cakava Turaga?’ E kaya vei au na Turaga: ‘Tucake, lako i Tamasiko, ena qai lai tukuni vei iko e kea na ka kece sa lesi mo vakayacora.’+
11 Niu sega ni raica rawa e dua na ka ena serau ni rarama ya, era tuberi au gona o ira keitou salavata me yaco sara i Tamasiko.
12 “E tiko e kea e dua na tagane na yacana o Ananaiasa, e dokai ni dau muria na Lawa. E vinaka na kena irogorogo vei ira na Jiu kece e kea.
13 E lako mai vei au, e mai tu e yasaqu qai kaya: ‘Saula na taciqu, mo rai!’ Au rai yani vua ena gauna vata ya.+
14 E kaya o koya: ‘Sa digitaki iko na nodra Kalou na tukada mo kila na lomana, mo raici koya na yalododonu,+ mo rogoca tale ga na domona,
15 mo nona ivakadinadina ena nomu tukuna vei ira na tamata kece ga na ka o raica kei na ka o rogoca.+
16 Na cava tale o waraka? Tucake mo papitaiso, mo vuya laivi na nomu ivalavala ca+ ena nomu masuta na yacana.’+
17 “Ia niu lesu i Jerusalemi,+ au qai raivotu ena gauna sara ga au masu tiko kina ena valenisoro,
18 au raica na Turaga ni kaya vei au: ‘Vakatotolo mo biuti Jerusalemi, era na sega ni taleitaka nomu tukuni au tiko.’+
19 Au qai kaya: ‘Turaga, era kila vinaka o ira qo niu dau balati ira na vakabauti kemuni i valeniveivesu, au dau kuitataki ira tale ga ena veivalenilotu.+
20 Gauna tale ga e vakadavei kina na dra i Sitiveni na nomuni ivakadinadina, au a duri sara tu ga e kea ena noqu vakadonuya, au yadrava tale tu ga na nodra isulu e sau na vakamatei koya.’+
21 Ia e qai kaya vei au: ‘Lako, niu na talai iko ina veimatanitu era tu vakayawa.’”+
22 Era vakarogoci koya tiko me yacova nona cavuta na vosa ya, era qai qolouvaka: “Me kau tani e vuravura na tamata va qo, e sega ni yaga me bula!”
23 Ena nodra kaikaila, nodra viritaka nodra isulu e sau, kei na nodra ceburaka i macawa na kuvu,+
24 e vakarota kina na komada ni mataivalu me kau o Paula ina keba ni mataivalu, qai kaya ni dodonu me kuitalaki, me vakatarogi tale ga me macala kina na vu ni nodra maue.
25 Nira sa vesuki koya me kuita, e qai kaya o Paula vua na turaganivalu e tucake tu e kea: “Vakacava, e tara vei kemuni moni kuitataka e dua na kai Roma ni se sega mada ni lewai?”+
26 Ni rogoca ya na turaganivalu, e lako vua na komada ni mataivalu qai kaya: “Na cava oni nanuma me caka vua? Ni kai Roma na turaga qo.”
27 Mani lako vei Paula na komada ni mataivalu qai kaya vua: “Tukuna mada vei au, O iko na kai Roma?” E sauma: “Io.”
28 E qai kaya na komada ni mataivalu: “Au sauma e dua na ilavo levu meu wili kina meu kai Roma.” Mani kaya o Paula: “Ia o yau au kai Roma ena gauna ga au sucu mai kina.”+
29 Sega ni bera nodra biubiu na tagane era vakarau kuitataki koya me tukutuku, e rere tale ga na komada ni mataivalu ni kila ni kai Roma dina, ni sa vesuki koya tu ena sinucodo.+
30 Ena siga tarava, ni via kila na vuna era beitaki koya kina na Jiu, e mani sereki koya qai vakaroti ira na iliuliu ni bete kei ira kece na lewe ni Sanadrini mera soqoni vata mai. Oti, sa qai kauti Paula sobu me lai duri tu e lomadonu.+
