Nodra Cakacaka na Yapositolo 18:1-28

  • Vunau o Paula mai Korinica (1-17)

  • Lesu i Anitioki e Siria (18-22)

  • Biubiu o Paula me lako i Kalatia kei Firijia (23)

  • Vukei na tagane gusumacala o Apolosa (24-28)

18  Oti ya e biuti Aceni me lako i Korinica.  E qai sotava e dua na Jiu na yacana o Akuila,+ e kai Ponito, kei Pirisila na watina. Erau se qai lako ga mai Itali ni a vakarota o Kilotiu vei ira kece na Jiu mera biuti Roma. Mani lako vei rau o Paula,  lai tiko sara ena nodrau vale me ratou cakacaka vata,+ ni ratou daucula valelaca kece.  E dau vunau ena valenilotu+ ena siga ni vakacecegu kece,+ e rawai ira na Jiu kei ira na kai Kirisi mera vakabauta.  Ni rau siro mai Masitonia o Sailasa+ kei Timoci,+ sa qai ogaoga sara o Paula ena nona vunautaka na vosa vei ira na Jiu me vakadinadinataka kina ni o Jisu na Karisito.+  E ceburaka nona isulu+ ena vuku ni nodra veivorati kei na nodra vosavakacaca, qai kaya vei ira: “Sa na tarogi ga vei kemuni na nomuni dra.+ Au na sega ni beitaki ena nona dra e dua.+ Tekivu qo au sa na lako vei ira na lewe ni veimatanitu.”+  Mani gole sara ina nona vale e dua na turaga na yacana o Taitusi Jusitu, e dau qarava na Kalou, e toka tarava na valenilotu na nona vale.  Ia e qai vakabauta na Turaga na ivakatawa ni valenilotu o Kirisipo,+ era vakabauta tale ga o ira kece na lewe ni nona vuvale. Era vakabauta tale ga e levu na kai Korinica era rogoca na itukutuku vinaka ra qai papitaiso.  E qai kaya tale na Turaga vei Paula ena raivotu ena bogi: “Kua ni rere, vunau tiko ga, kua ni galu, 10  niu tiko vata kei iko,+ ena sega ni dua e tarai iko me vakamavoataki iko, ni levu na noqu tamata ena koro qo.” 11  Mani tiko e kea me yabaki dua vula ono, e vakavulici ira ena vosa ni Kalou. 12  Ia ena gauna e mata* kina o Kalio ena yasana o Akaia,* era qai lomavata na Jiu mera vorati Paula, ra kauti koya sara ina idabedabe ni veilewai 13  era kaya: “O ka qo e uqeti ira na lewenivanua mera qarava na Kalou ena kena iqaraqaravi e veisaqasaqa kei na lawa.” 14  Ni vakarau vosa o Paula, sa vosa yani vei ira na Jiu o Kalio: “Kemuni na Jiu, ke dua dina nona cala se cakava e dua na ka e torosobu, au na tu vakarau sara ga meu rogoci kemuni. 15  Ia ke oni beitaki koya ena vuku ni vosa, na yaca, kei na nomuni lawa,+ qori e nomuni moni qai lewa. Au sega ni via vakatulewa ena ka qori.” 16  Mani vakatalai ira mai na idabedabe ni veilewai. 17  Era sa qai tauri Sosiceni,+ na ivakatawa ni valenilotu, ra qai mokulaki koya ena mata ni idabedabe ni veilewai. Ia e sega ni kauaitaka vakalailai o Kalio na ka era cakava. 18  Ni oti e vica tale na siga nona tiko e kea, sa qai vakamoce o Paula vei ira na veitacini me soko i Siria kei rau o Pirisila kei Akuila. E kotiva vakalekaleka na drauniuluna mai Kenikiria+ ena vuku ni nona bubului. 19  Ni ratou yaco i Efeso e biuti rau e kea o Paula, lai curu sara ina valenilotu qai veivosaki vata kei ira na Jiu.+ 20  Era kerei koya me tiko tale mada, ia e sega ni vakadonuya, 21  e vakamoce ga vei ira qai kaya: “Au na lesu tale mai vei kemuni ke inaki i Jiova.”* E biuti Efeso sara me soko 22  sobu i Sisaria. E lako cake* me lai vakabula ina ivavakoso, sa qai gole sobu i Anitioki.+ 23  E tiko e kea ena loma ni dua na gauna, sa qai biubiu me lako ina yasana o Kalatia kei Firijia+ me vakayaloqaqataki ira na tisaipeli kece.+ 24  Ena gauna ya, e yaco yani kina i Efeso e dua na Jiu na yacana o Apolosa,+ e kai Alekisadria, e tagane gusumacala, e bau kila vinaka tale ga na iVolatabu. 25  A vakavulici* ena sala i Jiova,* qai gumatua ena veiuqeti ni yalo tabu me tukuna, me vakavulica tale ga vakadodonu na veika me baleti Jisu, ia se kila ga na veipapitaisotaki i Joni. 26  E vosa ena doudou o koya ena valenilotu. Ni rau rogoci koya o Pirisila kei Akuila+ erau kauti koya sara, rau qai vakamacalataka vakadodonu vua na sala ni Kalou. 27  Oti ya sa qai via lako i Akaia o Apolosa, era mani volavola na veitacini vei ira na tisaipeli mera ciqomi koya ena marau. Ni yaco yani e vukei ira sara vakalevu na veiwekani era sa mai vakabauta ena vuku ni loloma soli wale ni Kalou. 28  E gumatua ni vakadinadinataka e matanalevu nodra cala na Jiu, e vakaraitaka tale ga mai na iVolatabu ni o Jisu na Karisito.+

iVakamacala e ra

Na kovana ni Roma ni dua na yasana. Raica na iVakamacala ni Vosa.
Vanua qali vakaRoma ena ceva kei Kirisi, na kena koroturaga o Korinica.
Raica na iKuri A5.
Kena irairai i Jerusalemi.
E vakaibalebaletaki eke na veivakavulici e tukuni ga e gusu.
Raica na iKuri A5.