Nodra Cakacaka na Yapositolo 16:1-40
16 Sa qai yaco yani o Paula i Tapi kei Lisitira.+ E tiko e kea e dua na tisaipeli na yacana o Timoci,+ e luvena e dua na marama vakabauta e Jiu, ia e kai Kirisi o tamana,
2 e rogo vinaka o koya vei ira na veitacini e Lisitira kei Ikoniona.
3 E vinakata o Paula me rau lako vata, e kauti koya qai lai ciliva ena vukudra na Jiu era tiko e kea+ nira kila kece tu ni kai Kirisi o tamana.
4 Ni ratou lakova na koro eratou vakadewataka vei ira mera muria sara na ivakaro era sa vakadonuya na yapositolo kei ira na qase era tiko mai Jerusalemi.+
5 O koya gona, e vakadeitaki tiko ga nodra vakabauta na lewe ni ivavakoso qai tubu tiko ga e veisiga na kedra iwiliwili.
6 Ia eratou muri i Firijia kei na vanua o Kalatia,+ ni sega ni vakatara na yalo tabu me ratou tukuna na vosa ena yasana o Esia.
7 Ni ratou gole sobu i Misia eratou sasaga me ratou lako i Picinia.+ A sega ni vakatara qo o Jisu ena veidusimaki ni yalo tabu.
8 Eratou siviti Misia ratou gole sobu sara i Tiroa.
9 E qai raivotu o Paula ena bogi, e raica ni tucake tu e dua na kai Masitonia qai vakamasuti koya tiko: “Lako mai Masitonia mo mai vukei keimami.”
10 Ni raica oti ga na raivotu ya, keitou sasaga sara i Masitonia, keitou kila ni vakaroti keitou na Kalou me keitou lai vunautaka vei ira na itukutuku vinaka.
11 Keitou mani soko mai Tiroa keitou gole vakadodonu i Samoceresa. Ena siga tarava keitou gole sara i Niapoli,
12 mai kea keitou gole i Filipai,+ e koloni vakaRoma, e koro rogo ena yasayasa o Masitonia. Keitou tiko kina me vica na siga.
13 Ena Siga ni Vakacecegu keitou lako ina taudaku ni matamatanikoro volekata na uciwai, na vanua keitou nanuma ni dau caka kina na masu, keitou dabe qai vunau vei ira na marama era soqoni tiko e kea.
14 E vakarorogo tiko e dua na marama ni koro o Ceatira,+ e dau qarava na Kalou, o Litia na yacana, e dau volitaka na ka lokaloka. E dolava na lomana o Jiova* me rogoca na veika e tukuna tiko o Paula.
15 Ni sa papitaiso o koya kei ira na lewe ni nona vuvale,+ e vakamasuti keitou: “Ke dou nanuma niu yalodina vei Jiova,* dou mai tiko ena noqu vale.” E cikevi keitou sara ga me keitou lako kina.
16 Ni keitou lako tiko ina vanua e dau caka kina na masu, keitou sota sara kei na dua na goneyalewa bobula daurairai e curumi timoni.+ E vakavutuniyautaki ira nona turaga ena nona dau tukuna na ka se bera ni yaco.
17 E vakamuri keitou tiko ga kei Paula qai dau kailavaka: “O iratou na tamata qo eratou dauveiqaravi ni Kalou Cecere Duadua,+ eratou tukuna tiko vei kemuni na sala moni vakabulai kina.”
18 E cakava tiko qo me vica na siga. E sosa sara ga o Paula ena ka qo, e raivuki qai kaya vua na timoni: “Au vakaroti iko ena yaca i Jisu Karisito mo lako tani mai vua.” Ena gauna vata ya e lako tani kina.+
19 Ia nira raica na nona turaga ni sa sega na ka e dau vakavutuniyautaki ira,+ era qai tauri Paula kei Sailasa ra yarataki rau ina makete* vei ira na iliuliu.+
20 Era kauti rau yani vei ratou na vakailesilesi ni mataveilewai, era kaya: “Erau vakavuleqa vakalevu ena noda koro na tamata qo,+ ni rau Jiu,
21 erau vakatetea tiko na ivakarau e sega ni tara vei keda na kai Roma meda muria.”
22 Era duavata na lewenivanua mera saqati rau. Eratou dresulaka nodrau isulu na vakailesilesi ni mataveilewai, ratou qai vakarota me rau kuitataki ena kau.+
23 Ni oti nodra kuitataki rau vakalevu era balati rau i valeniveivesu, ra vakaroti koya na ovisa ni valeniveivesu me yadravi rau matua.+
24 Ena vuku ni ivakaro oya, e biuti rau ena lomadonu ni valeniveivesu qai vesuka matua na yavadrau ena ivesu kau.*
25 Ia ena lomaloma ni bogi, erau masu rau qai vakacaucautaka na Kalou ena sere o Paula kei Sailasa,+ era vakarogoci rau tiko na kaivesu.
26 E qai yaco vakasauri e dua na uneune levu, e yavala sara ga kina na yavu ni valeniveivesu. Era tadola vata vakasauri na katuba kece, e tasere tale ga na kedra ivesu kece.+
27 E yadra sara ga na ovisa ni valeniveivesu, qai raica nira sa tadola tu na katuba, mani ucuna mai nona iseleiwau me vakarau vakamatei koya ni nanuma nira sa dro na kaivesu.+
28 Ia e qai kaila yani o Paula: “Kua ni vakamavoataki iko, keimami se tu kece qo!”
29 Sa qai kerea na ovisa ni valeniveivesu me kau yani na cina, e cici yani i loma, e sautaninini qai cuva e matadrau o Paula kei Sailasa.
30 E kauti rau mai tuba qai kaya: “Kemudrau na turaga, na cava meu cakava meu bula kina?”
31 Erau kaya: “Vakabauta na Turaga o Jisu o na bula, o iko kei ira na lewe ni nomu vuvale.”+
32 Erau sa qai tukuna vua kei ira kece na tiko ena nona vale na vosa i Jiova.*
33 E qai kauti rau ena lomaloma ni bogi ga ya mani savata nodrau mavoa. E papitaiso sara, era papitaiso tale ga na lewe ni nona vuvale.+
34 E kauti rau sara i nona vale qai vakarautaka na kedrau kakana. Dua na ka nona marau kei ira na lewe ni nona vuvale ni sa mai vakabauta na Kalou.
35 Ni sa siga na vanua, eratou sa qai tala na vakailesilesi ni mataveilewai eso na ovisa mera lai kaya: “Sereki rau na tamata qori.”
36 Mani vakadewataka na itukutuku ya na ovisa ni valeniveivesu vei Paula, e kaya: “Eratou sa talatala mai na vakailesilesi ni mataveilewai mo drau sereki. O koya gona, drau curu i tuba drau lako sara ena vakacegu.”
37 E qai kaya vei ira o Paula: “O keirau qo na kai Roma, ia era kuitataki keirau e matanalevu,+ ra qai balati keirau i valeniveivesu, sega mada ga ni dua na cala keirau beitaki kina.* Vakacava eratou sa via sereki keirau lo? Sega ni rawa! Me ratou lako sara ga mai ratou mai kauti keirau i tuba.”
38 Era lai tukutuku na ovisa vei ratou na vakailesilesi ni mataveilewai. Dua na ka nodratou rere na vakailesilesi ni mataveilewai ni ratou rogoca ni rau kai Roma.+
39 Eratou mani lako ratou qai vakamasuti rau. Ni rau kau oti mai tuba, eratou qai kerei rau me rau biuta na koro.
40 Ia erau biuta mai na valeniveivesu rau lako sara ina vale nei Litia. Ni rau raici ira na veitacini erau vakayaloqaqataki ira,+ rau gole sara.
iVakamacala e ra
^ Qo na rara e dau caka kina na veivoli, era dau soqoni tale ga kina na lewenivanua.
^ Na iyaya ni veivakatotogani, e kau na dagona qai qaraqara tu me curu kina na yava kei na liga i koya e vakatotogani.
^ Se “ni keirau veilewaitaki.”
