Aisea 59:1-21
59 Raica! E sega ni lekaleka na liga i Jiova me veivakabulai,+Se bibi na daligana me dredre ni rogo.+
2 Sega, na nomuni cala ga e tawasei kemuni vua na nomuni Kalou,+Na nomuni ivalavala ca e vunia kina na matana vei kemuni,E sega ni via rogoci kemuni.+
3 Ni dukadukali na qeteqete ni ligamuni ena dra+Kei na iqaqaloniligamuni ena cakacala.
E vosa lasu na tebenigusumuni,+ e vosaminiminitaka na yamemuni na ka tawadodonu.
4 E sega ni dua e tagica na ka dodonu,+E sega ni dua e dina ni lai veilewai.
Era nuitaka na ka tawayaga,*+ era tukuna na ka e sega na betena.
Era kunekunetaka na ca ra qai vakasucuma na ka rarawa.+
5 Era saulaka na yaloka ni gata poisoni,Era talia na viritalawalawa.+
O koya e kania na kedra yaloka ena mate,Na yaloka sa voro ena saulaki me gata batigaga.
6 Na nodra viritalawalawa ena sega ni isulu,Se ra ubi ira ena ka era cakava.+
Na nodra cakacaka e veivakaleqaiE tu e ligadra na ivalavala voravora.+
7 Na yavadra e ciciva na ca,Era kusata mera vakadavea na dra e sega ni cala.+
Era vakananuma na ka ca,Na rusa kei na rarawa e tu ena nodra sala.+
8 Era sega ni kila na sala ni vakacegu,E sega ni kune na lewadodonu ena nodra gaunisala.+
Era vakavevea na nodra sala,O koya e muria ena sega ni kila na vakacegu.+
9 Oya na vuna e yawaki keda kina na lewadodonu,E sega ni toboki keda na ivalavala dodonu.
Eda nuitaka tiko ga na rarama, ia raica! e buto ga,Na siga rarama, ia eda lako tiko ga ena butobuto.+
10 Eda yamoca na bai me vakataki ira na mataboko,Me vakataki ira e sega na matadra, eda vakayayamo tiko ga.+
Eda tarabe ena sigalevu tutu me vaka ena yakavi buto.
Eda maliwai ira na kaukaua, eda vaka na mate.
11 Eda kudru kece tiko ga me vaka na bea,Eda kiru tale ga me vaka na ruve.
Eda nuitaka na lewadodonu ia e sega,Na veivakabulai, ia e yawaki keda.
12 Ni levu na neimami talaidredre e matamuni,+E tukuni keimami na neimami dui cala.+
Ni tiko vei keimami na neimami talaidredre,Keimami kila vinaka na neimami cala.+
13 Keimami cala, keimami cakitaki Jiova,Keimami vakanadakuya na neimami Kalou.
Keimami veivosakitaka na veivakasaurarataki kei na veivorati,+Keimami kunekunetaka, keimami vosaminiminitaka na ka lasu e loma i keimami.+
14 E vakasukai i muri na lewadodonu,+Kei na ivalavala dodonu e tu vakayawa,+Ni sa bale na dina ena rara,Kei na ka dodonu, e sega ni curu rawa.
15 Sa yali na dina,+O koya e gole tani mai na ka ca e koveraki.
E raica qo o Jiova, e rarawa,*Ni sega na lewadodonu.+
16 E raica o koya ni sega na tamata,E kurabuitaka ni sega ni dua me veivuke,E mani veivakabulai* ga e ligana,E tokoni koya na nona yalododonu.
17 E qai tokara o koya na yalododonu me vaka na isulunivaluKei na isala ni bula* e uluna.+
E tokara na isulu ni veisausaumi+E ovici koya ena yalogu me vaka na kote.*
18 Ena saumi ira me vaka na ka era cakava:+
Na cudru vei ira na veisaqati, na itotogi vei ira na kena meca.+
Ina veiyanuyanu ena saumi ira lesu.
19 O ira mai na idromudromu ni siga era na doka na yaca i JiovaKei ira mai na icabecabe ni siga na nona lagilagi,Ni na lako mai o koya me vaka na tacoka ni uciwai,E uqeta na yalo i Jiova.
20 “Ena lako+ i Saioni o koya e dauveivoli lesu,+Vei ira na Jekope era saumaki mai na nodra cala,”+ e kaya o Jiova.
21 “Ia o yau, qo na noqu veiyalayalati kei ira,”+ e kaya o Jiova. “Na yaloqu e tokoni iko kei na noqu vosa au tauca e gusumu, ena sega ni yali mai gusumu, mai gusudra na luvemu* se mai gusudra na makubumu,”* e kaya o Jiova, “ena gauna qo me tawamudu.”
iVakamacala e ra
^ Se “ka wale.”
^ Ipe., “ca e matana.”
^ Se “qaqa.”
^ Se “na isulu balavu tabaleka.”
^ Se “qaqa.”
^ Ipe., “kawa.”
^ Ipe., “kawa ni nomu kawa.”
