Aisea 44:1-28
44 “Ia qo mo vakarorogo Jekope na noqu dauveiqaravi,O iko tale ga Isireli au digitaka.+
2 Qo na ka e kaya o Jiova,Na Dauveibuli e buli iko,+E vukei iko mai na katonigone:*
‘Kua ni rere Jekope na noqu dauveiqaravi,+Kei iko Jesuruni*+ au digitaka.
3 Niu na sova na wai vua e karamaca,+Kei na uciwai drodro ena qele mamaca.
Au na sova na yaloqu vua na luvemu,+Kei na noqu veivakalougatataki vei ira na nomu kawa.
4 Era na tubu me vaka na co drokadroka,+Me vaka na veipopila ena bati ni uciwai.
5 Ena kaya e dua: “Au nei Jiova.”+
E dua tale ena vakatokai koya ena yaca i JekopeE duatani tale ena vola e ligana: “E nei Jiova.”
Ena vakatokai ena yaca i Isireli.’
6 Qo na ka e tukuna o Jiova,Na Tui Isireli,+ o koya tale ga e voli koya lesu,+ o Jiova ni lewe vuqa:*
‘O yau na kena imatai kei na kena iotioti.+
E sega ni dua tale na Kalou, o yau ga.+
7 O cei e tautauvata kei au?+
Me kacivaka, me tukuna, me vakadinadinataka vei au!+
Mai na gauna au lesi ira kina na tamata e liu,Mera tukuna na ka ena yacoKei na ka se bera ni yaco.
8 Moni kua ni rere,Moni kua ni taqaya.+
Au a sega ni tukuna yadua vei kemuni e liu se vakaraitaka?
O kemuni na noqu ivakadinadina.+
E dua tale na Kalou, se o yau ga?
Sega, e sega ni dua tale na Uluvatu,+ au sega ni kila e dua.’”
9 O ira kece na ceuta na ivakatakarakara e sega na kedra yaga,E tawayaga na nodra ka vakamareqeti.+
Era vakadinadinataki ira vakataki ira, era* sega ni rai se kila e dua na ka,+Ia o ira na bulia mera madua.+
10 O cei e bulia na kalou se cakava na matakau kaukameaE sega na kena yaga?+
11 Raica! O ira kece na nona itokani era vakamaduataki!+
O ira na matai era tamata ga.
Mera soqoni kece mera tucake.
Era na domobula, era na vakamaduataki vata.
12 Na matai ni kaukamea e vakatakata na kaukamea ena qilaiso ena nona iyaya ni cakacaka.*
E tukitukia ena itukiE cakava qori ena kaukaua ni ligana.+
Ni viakana mai, e yali na nona kaukauaE sega ni gunu wai, e oca sara.
13 Na dausivisivi e dodoka na wa ni vakarau, e vola na kena ibulibuli ena joke damudamu.
E karia ena ikarinikau qai vola ena kabasi.
E bulia me vaka na ibulibuli ni tamata,+Me matavinaka vaka na tamata,Me biu e lomanivale.*+
14 E dua me dau taya sobu na sitari.
E digia e dua na mataqali vunikau, na oki,E qarava vinaka me kaukaua vei ira na vo ni kau ni veikau.+
E tea na vuniloreli, ia na uca e vakatubura.
15 E qai vakayagataka na tamata me nona buka.
E tatalai ena dua na kena iwase.
E vakawaqa me vavi madrai kina.
E bulia tale ga e dua na kalou me cuva kina.
E cakava me ivakatakarakara ceuti qai cuva kina.+
16 E vakama o koya e dua na kena veimama,Ena kena veimama qori e tavuna kina na lewe ni manumanu me kania, me mamau kina.
E tatalai tale ga kina, e kaya:
“Maleka dina! Au sa katakata niu raica na yameyame ni buka.”
17 Ia na kena vo e bulia kina e dua na kalou, me nona ivakatakarakara ceuti.
E cuva kina, e qarava.
E masuta, e kaya:
“Mo vakabulai au ni o noqu kalou.”+
18 Era lecava, era sega ni kila e dua na ka,+Ni ubi tu na matadra mera kua ni raica,Kei na lomadra mera sega ni yalomatua.
19 E sega ni dua e bau vakasamataka e lomanaSe kila, se yalomatua me kaya:
“Au vakama e veimama me buka,Au vavi madrai ena kena qilaiso, au tavuna kina na lewe ni manumanu meu kania.
Ia na kena vo, meu bulia kina e dua na ka vakasevaki?+
Meu qarava e dua na tolo* ni vunikau?”
20 E kana dravusa.
E vakacalai koya na veivakaisini ni lomana.
E sega ni vakabulai koya rawa, se kaya:
“E sega ni tiko ena ligaqu imatau na ka lasu?”
21 “Mo nanuma qo Jekope, kei iko Isireli,Ni o noqu dauveiqaravi.
Au buli iko, o iko na noqu dauveiqaravi.+
O iko Isireli, au na sega ni guilecavi iko.+
22 Au na tabonaka na nomu cala me vaka na o,+Kei na nomu ivalavala ca me vaka na o vavaku.
Mo lesu mai vei au, niu na voli iko lesu.+
23 Moni kaila ena marau na lomalagiNi vakayacora qo o Jiova!
Moni kaila ena qaqa na vanua titobu e vuravura!
Moni kaila ena marau na veiulunivanua,+Na veikau kei na kau kece e tu kina!
Ni sa voli Jekope lesu o Jiova,Qai vakaraitaka vei Isireli na nona lagilagi.”+
24 Qo na ka e tukuna o Jiova, o koya e voli iko lesu,+E buli iko ni o tiko ena loma ni katonigone:
“O yau o Jiova au cakava na ka kece.
Au tevuka vakataki au na lomalagi,+Au tevuka na vuravura.+
O cei a tiko vata kei au?
25 Au vakaseva na nodra ivakatakilakila na dauvosa wale,*O yau ga au vakalialiai ira na daurairai,+O koya e vakasesei ira na tamata vuku
E vukica na nodra vuku me lialia.+
26 O koya e vakayacora na vosa ni nona dauveiqaravi,E vakayacora kece na ka era tukuna na nona italai,+O koya e tukuna me baleti Jerusalemi, ‘Ena tawani,’+Kei na koro e Juta, ‘Era na tara tale,+Au na vakavinakataka tale na kena irusarusa,’+
27 O koya e tukuna ina wasa titobu, ‘Mo maca mai,Au na vakamacara na nomu uciwai kece,’+
28 O koya e tukuna me baleti Sairusi,+ ‘E noqu ivakatawa o koya,Ena vakayacora taucoko na ka kece au vinakata,’+O koya e tukuna me baleti Jerusalemi, ‘Ena tara tale,’Kei na valenisoro, ‘Ena vakadavori na kemu yavu.’”+
iVakamacala e ra
^ Se “mai na gauna o sucu kina.”
^ Kena ibalebale “O Koya e Yalododonu,” na icavuti vakarokoroko kei Isireli.
^ Qo na mataivalu vakalomalagi.
^ Oya na ivakatakarakara.
^ Se “nona matau.”
^ Se “ena burekalou.”
^ Se “na tolo madu.”
^ Se “o ira na parofita lasu.”
