Aisea 3:1-26
3 Raica! Na Turaga dina o Jiova ni lewe vuqa,*E kauta tani e Jerusalemi kei Juta na ka ni veivuke kece kei na ka me bula kina,Na ka ni veivuke kece na madrai kei na wai,+
2 Na tamata qaqa kei na tamataivalu,Na turaganilewa kei na parofita,+ na daurairai kei na qase,
3 Na turaga ni le 50,+ na tamata dokai, na daunivakasala,Na daucakaiba kei na dauvakatevoro.+
4 Au na lesi ira na gonetagane me nodra turaga,Ia o koya e veilecayaki ena liutaki ira.
5 Era na veivakasaurarataki na tamata,Na tamata yadua vua na wekana.+
Na gone ena vorata na qase,Kei na tamata wale ena beca na turaga.+
6 Era na dui tauri tacina ena vale nei tamana, e kaya:
“E tiko na nomu isulu, mo neitou iliuliu,Mo lewa na irusarusa levu sa tu qo.”
7 Ia ena vosa o koya ena siga oya:
“Au na sega ni vadretitaka* na nomu mavoa,E sega na kakana kei na isulu ena noqu vale.
Moni kua ni lesi au meu liutaki ira na lewenivanua.”
8 Ni sa tarabe o Jerusalemi,Sa bale o Juta,Nira saqati Jiova ena nodra vosa kei na nodra ivalavala,Era talaidredre e matana lagilagi.+
9 Na irairai ni matadra e beitaki ira ga,Era tukuna na nodra ivalavala ca me vakataki Sotoma,+Era sega ni via vunitaka.
Era rarawa nira vakaleqai ira ga vakataki ira!
10 Moni tukuna vei ira na yalododonu ni na yacovi ira na ka vinaka,Era na vakaicovitaki ena ka era cakava.*+
11 Ena rarawa na tamata ca!
Ena yacovi koya na ka ca,Na ka e cakava na ligana ena caka tale vua!
12 Era vakasaurarataki ira na noqu tamata o ira na iliuliu ni cakacaka,E lewai ira na yalewa.
Kemuni na noqu tamata, era vakasesei kemuni na nomuni iliuliu,Era vakaseva na sala o lakova.+
13 Sa vakarau tu o Jiova me vakamacalataka na nona kisi,E tucake me tauca na lewa vei ira na lewe ni veivanua.
14 O Jiova ena lewai ira na nodra qase kei na nodra turaga na nona tamata.
“Oni vakama na loganivaini,Na ka oni butakoca vua na dravudravua e tiko ena nomuni vale.+
15 Sa dua na ka moni qaqi ira na noqu tamataMoni butuqaqia ena qele na matadra na dravudravua?”+ e kaya na Turaga Cecere Duadua o Jiova ni lewe vuqa.
16 E kaya o Jiova: “Nira qaciqacia na goneyalewa ni Saioni,Era lako voli nira vakaduria na uludra,*Era matawedewede, era yabe vakamamatauna,Me rogo na tataqiriqiri ni qato ni yavadra,
17 Ena vakatubura tale ga o Jiova na kobo ena uludra na goneyalewa ni Saioni,Ena vakaraitaka o Jiova na yadredra.+
18 Ena siga oya ena kauta tani o Jiova na totoka ni qato ni yavadra,Na lawa ni drauniuludra kei na nodra iukuuku e vaka na vula,+
19 Na sau, na qato, na iubinimatadra,
20 Na iubiniulu, na sinucodo ni yava, na ioro,Na itawatawa ni ivakaboi kei na itataqomaki,*
21 Na mama ni liga kei na mama ni ucu,
22 Na isulu ni soqo, na kote ligaleka, na iovi, kei na taga ni ilavo,
23 Na iloilo vakaitautauri+ kei na isulu lineni,*Na ivauniulu kei na iubinimata.
24 Ena sosomitaka na iboi ni waiwai vakaisaluaki+ na ka boi ca,Ena sosomitaka na beleti na dali,Ena sosomitaka na ulu tali vinaka na ulucou,+Ena sosomitaka na isulu saulevu na isulutaga,+Ena sosomitaka na matavinaka na we ni kama.*
25 Era na bale ena iseleiwau na nomu tamata,Kei ira na nomu tamata qaqa ena ivalu.+
26 Ena lolosi na nona matamata, ena rarawa,+Ena dabe ena qele, ena vakalalai.”+
iVakamacala e ra
^ Qo na mataivalu vakalomalagi.
^ Se “sega ni vakaotia.”
^ Ipe., “kania na vua ni nodra ivalavala.”
^ Ipe., “vakatudomo (itilotilo).”
^ Se “iukuuku qanivivili.”
^ Se “na isulu e loma.”
^ Qo na ivakatakilakila e vakamai e yagona na bobula se na kaivesu.
