iKarua ni Veigauna 36:1-23
36 Era kauti Jioasi na luvei Josaia+ na lewenivanua mera buli koya me tui mai Jerusalemi me sosomitaki tamana.+
2 E tui o Jioasi ni sa yabaki 23, e veiliutaki e Jerusalemi me tolu na vula.
3 Ia e vakasivoi koya mai Jerusalemi na tui Ijipita, e totogitaka na vanua ena 100 na taledi siliva* kei na dua na taledi koula.+
4 E qai buli Eliakimi na tuakai Jioasi o tui Ijipita me tui Juta kei Jerusalemi, e veisautaka na yacana me o Jioiakimi, ia o Niko+ e tauri Jioasi na tacina me kauti koya i Ijipita.+
5 E tui o Jioiakimi+ ni sa yabaki 25, e veiliutaki e Jerusalemi me 11 na yabaki. E vakayacora tiko ga o koya na ka ca ena mata i Jiova na nona Kalou.+
6 E lako cake o Tui Nepukanesa+ e Papiloni me valuti koya, e vesuki koya ena ivesu kopa me kauti koya i Papiloni.+
7 E kauta i Papiloni o Nepukanesa eso na iyaya mai na vale i Jiova qai biuta ena nona valenitui e Papiloni.+
8 Na vo ni itukutuku me baleti Jioiakimi, na ka vakasevaki e cakava kei na itukutuku ca e kune me baleti koya, e volai ena nodra iVola na Tui Isireli kei Juta, e tui sara o Jioakini na luvena me sosomitaki koya.+
9 E tui o Jioakini+ ni sa yabaki 18, e veiliutaki e Jerusalemi me tolu na vula tini na siga qai vakayacora tiko ga na ka ca ena mata i Jiova.+
10 Ena itekivu ni yabaki,* e talatala o Tui Nepukanesa me kau mai o koya i Papiloni+ kei na iyaya talei ni vale i Jiova.+ E mani buli Setekaia na taci tamana me tui Juta kei Jerusalemi.+
11 E tui o Setekaia+ ni sa yabaki 21, e veiliutaki e Jerusalemi me 11 na yabaki.+
12 E vakayacora tiko ga na ka ca ena mata i Jiova na nona Kalou. E sega ni vakamalumalumutaki koya e mata i Jeremaia na parofita,+ e vosa ni vakarota o Jiova.
13 E talaidredre tale ga vei Tui Nepukanesa+ e vakavuna me bubului ena yaca ni Kalou, e domoqa tiko ga, e lomaqa qai sega ni via lesu vei Jiova na Kalou ni Isireli.
14 O ira kece na iliuliu ni bete kei ira na lewenivanua era sega sara ga ni yalodina, era muria na nodra itovo vakasevaki kece na veimatanitu, era vakadukadukalitaka na vale i Jiova+ e vakatabuya o koya e Jerusalemi.
15 E vakasalataki ira tiko ga o Jiova na Kalou i tukadra ni talai ira na nona italai, e vakasalataki ira wasoma ni lomani ira na nona tamata kei na vanua e dau tiko kina.
16 Ia era vakasewasewani ira tiko ga na italai ni Kalou dina,+ era beca na nona vosa,+ era vakalialiai ira na nona parofita+ qai cudruvi ira o Jiova,+ e sega tale nira vakabulai rawa.
17 E mani kauta mai na nodra tui na Kalitia+ me valuti ira, e vakamatea o koya na nodra cauravou ena iseleiwau+ ena nodra valenisoro,+ e sega ni lomana na nodra cauravou se goneyalewa, qase se malumalumu.+ E solia na Kalou na ka kece i ligana.+
18 E kauta tale ga o koya i Papiloni na ka kece, na iyaya lelevu kei na iyaya lalai ena vale ni Kalou dina, na iyau ena vale i Jiova, kei na iyau ni tui kei ira na nona turaga vakaitutu.+
19 E vakama na vale ni Kalou dina,+ e basuka na bai e Jerusalemi,+ e vakama na kena valececere vakabai kece kei na kena iyaya vakamareqeti kece me vakarusa.+
20 E kauti ira vakabobula i Papiloni na kena vo era bula mai na iseleiwau,+ mera qaravi koya+ kei ira na luvena me yacova ni veiliutaki na matanitu* o Perisia,+
21 me vakayacori kina na vosa i Jiova ena gusu i Jeremaia+ me rekitaka mada na vanua na kena siga ni vakacecegu.+ Ena gauna kece e lala tu kina e vakacegu tiko ga, me cava mada e 70 na yabaki.+
22 Ena imatai ni yabaki i Tui Sairusi+ e Perisia, me vakayacori kina na vosa i Jiova ena gusu i Jeremaia,+ ni uqeta o Jiova na loma i Tui Sairusi e Perisia, me kacivaka e dua na ivakaro ena nona matanitu taucoko, e vola tale ga,+ e kaya:
23 “Qo na ka e tukuna o Tui Sairusi e Perisia, ‘Sa solia vei au o Jiova na Kalou ni lomalagi na matanitu kece e vuravura,+ e lesi au tale ga meu tara e dua na nona vale e Jerusalemi, e Juta.+ O koya ga e tiko vata kei kemuni na nona tamata, me tokoni koya mada ga o Jiova na nona Kalou, me lako cake o koya.’”+
