iKarua ni Veigauna 14:1-15

  • Mate o Apaija (1)

  • Tui Juta o Esa (2-8)

  • Vakadruka o Esa e dua na milioni na kai Iciopea (9-15)

14  E davo vata kei ira na tukana o Apaija, era buluti koya ena Koro i Tevita,+ e tui sara o Esa na luvena tagane me sosomitaki koya. Ena nona gauna e vakacegu na vanua me tini na yabaki.  E vakayacora o Esa na ka e vinaka qai donu ena mata i Jiova na nona Kalou.  E kauta laivi o koya na icabocabonisoro tani+ kei na vanua cecere, e vorolaka na vatu ni sokalou,+ e musuka na duru ni sokalou.*+  E qai kaya vei ira na Juta mera vaqarai Jiova na Kalou i tukadra mera muria na Lawa kei na ivakaro.  E mani kauta tani o koya mai na koro kece e Juta na vanua cecere kei na itutu ni ka boivinaka,+ e sautu tiko ga na matanitu ena nona lewa.  E tara eso na koro vakabai e Juta+ ni vakacegu tu na vanua, e sega ni dua e valuti koya ena yabaki kece qori ni solia vua o Jiova na vakacegu.+  E kaya vei ira na Juta: “Meda tara na koro qo, meda viria wavoki na bai kei na valececere,+ na matamata,* kei na ivakadei. Se noda tiko ga na vanua nida qarai Jiova na noda Kalou. Eda vaqaqara, e solia vei keda o koya na vakacegu ena veiyasana.” Era mani tara vakaoti na koro.+  Na mataivalu nei Esa era le 300,000 mai Juta, era vakaisasabai lelevu kei na moto. Era le 280,000 na Penijamini era tamataivalu qaqa, era vakaisasabai lalai,* era vakaiyaragi ena dakaititi.*+  Oti e lako o Sira na kai Iciopea kei na mataivalu era le 1,000,000 kei na 300 na qiqinivalu+ me valuti ira. Ni yaco i Maresa,+ 10  e lako sara o Esa me valuti koya, era tuva vakaivalu ena Buca o Sifaca e Maresa. 11  E qai masu o Esa vei Jiova na nona Kalou,+ e kaya: “Kemuni Jiova, e rawarawa vei kemuni moni vukei ira na le levu se o ira na malumalumu.+ Moni vukei keimami Jiova na neimami Kalou ni keimami vakararavi* vei kemuni,+ ena yacamuni ga keimami valuti ira kina na ilala levu qo.+ Kemuni Jiova oni neimami Kalou. Me kua ni qaqa vei kemuni na tamata.”+ 12  E mani vakadrukai ira na kai Iciopea o Jiova e mata i Esa kei na matadra na Juta, era dro na kai Iciopea.+ 13  E cicimuri ira o Esa kei ira na tiko vata kei koya me yaco sara i Kera,+ era bale tiko ga na kai Iciopea me sega ni dua e bula, ni vakarusai ira o Jiova kei na nona mataivalu. Oti oya era kauta e levu sara na itokinivalu. 14  Era ravuta tale ga na koro kece e vakavolivoliti Kera, nira domobulataki Jiova, era yauta na iyau ena koro kece ni levu sara na iyau mera yauta mai kina. 15  Era samuta tale ga na nodra valelaca na vakamanumanu ra qai yauta e levu sara na qelenisipi kei na kameli, oti era lesu i Jerusalemi.

iVakamacala e ra

Ipe., “rua na kena katuba.”
Na isasabai lalai era dau taura na dauvanataka na dakaititi.
Ipe., “butuka na dakaititi.”
Ipe., “ni keimami ravi.”