iKarua ni Tui 8:1-29

  • Vakasukai vua na marama ni Sunemi na nona qele (1-6)

  • O Ilaisa, o Penietati, kei Eseli (7-15)

  • Tui Juta o Jorami (16-24)

  • Tui Juta o Esaia (25-29)

8  E kaya o Ilaisa vua na marama e vakabula na luvena tagane:+ “Mo tucake mo lako, o iko kei na nomu lewe ni vuvale mo lai tiko vulagi ena vanua ga o rawa ni tiko kina, ni tukuna o Jiova ni na dausiga+ na vanua me vitu na yabaki.”  E tucake sara na marama me cakava na ka e tukuna na tamata ni Kalou dina. E lako yani kei na nona lewe ni vuvale mera tiko ena nodra vanua na kai Filisitia+ me vitu na yabaki.  Ni cava na vitu na yabaki e qai biuta na nodra vanua na kai Filisitia na marama qo, e lako yani me vakamasuta na tui me vakasukai vua na nona vale kei na nona qele.  E vosa tiko na tui vei Kiesai na dauveiqaravi ni tamata ni Kalou dina, e kaya: “Au kerea mo talanoataka vei au na ka lelevu kece e cakava o Ilaisa.”+  Ni se talanoataka tiko ga vua na tui na nona vakabula na mate,+ sa lako yani vua na tui na marama e vakabulai na luvena me vakamasuti koya ena vuku ni nona vale kei na nona qele.+ E kaya sara o Kiesai: “Noqu turaga na tui, qo na marama oya, qo tale ga na luvena e vakabula o Ilaisa.”  E taroga na marama oya na tui e qai talanoa vua o koya. E lesia vua e dua na vakailesilesi, e kaya: “Mo vakasuka vua na marama qo na ka kece e nona kei na vuaniqele kece mai na siga e biuta kina na vanua me yacova mai qo.”  E lako i Tamasiko o Ilaisa+ ni tauvimate tiko o Penietati+ na tui Siria. E tukuni sara vua: “E lako mai ke na tamata ni Kalou dina.”+  E kaya na tui vei Eseli:+ “Mo kauta e dua na iloloma mo lai tavaka na tamata ni Kalou dina.+ Mo tarogi Jiova vua, mo kaya, ‘Au na bula mai na mate qo?’”  E lai tavaki koya o Eseli, e kauta e dua na iloloma, na ka vivinaka kece ni Tamasiko, e vakavodoki ena 40 na kameli. E lai duri sara o koya e matana, e kaya: “E talai au mai vei kemuni na luvemuni o Penietati na tui Siria, e taroga, ‘Au na bula mai na mate qo?’” 10  E qai kaya vua o Ilaisa: “Mo lai tukuna vua, ‘O na bula dina,’ ia e vakaraitaka vei au o Jiova ni na mate dina o koya.”+ 11  E vakaraici koya tiko ga me madua kina. Oti e tagi na tamata ni Kalou dina. 12  E taroga o Eseli: “Na cava e tagica na noqu turaga?” E sauma o koya: “Au kila vinaka na ka ca o na vakayacora vei ira na Isireli.+ O na vakama na nodra vanua vakabai, o na vakamatea na nodra tagane digitaki ena iseleiwau, o na tatalaka na luvedra, o na seleseleta tale ga na nodra yalewa bukete.”+ 13  E kaya o Eseli: “Ena cakava rawa vakacava na ka qori na nomuni dauveiqaravi, ni koli wale ga?” Ia e kaya o Ilaisa: “E vakaraitaka vei au o Jiova ni o na tui Siria.”+ 14  Oti qori e biuti Ilaisa o Eseli me lako yani vua na nona turaga, e kaya mai: “Na cava e tukuna vei iko o Ilaisa?” E kaya o koya: “E tukuna vei au ni oni na bula dina.”+ 15  Ena siga tarava e taura o Eseli e dua na isulu, e tonia ena wai qai tabaka* kina na matana mani mate.+ E tui sara o Eseli me sosomitaki koya.+ 16  Ena ikalima ni yabaki i Jorami+ na luvei Eapi na tui Isireli, ni tui Juta tiko o Josafati e Juta, sa qai tui Juta o Jorami+ na luvei Tui Josafati e Juta. 17  E tui ni sa yabaki 32, e veiliutaki e Jerusalemi me walu na yabaki. 18  E muria na nodra ivalavala na tui Isireli+ me vaka ga era cakava na vuvale i Eapi,+ ni watina na luvena yalewa o Eapi,+ e cakava tiko ga na ka ca ena mata i Jiova.+ 19  Ia e sega ni via vakarusai Juta o Jiova ena vuku i Tevita na nona dauveiqaravi,+ ni a yalataka me solia vua e dua na cina,+ vei ira tale ga na luvena me sega ni mudu. 20  Ena nona gauna e vorati Juta o Itomi,+ e bulia ga e dua na nona tui.+ 21  E qai lakosiviti Sea o Jorami kei na nona qiqinivalu kece, e tucake ena bogi me ravuti ira na Itomi era wavokiti koya tu kei ira na turaga ni qiqinivalu, era mani dro na sotia ina nodra valelaca. 22  Ia e vorati Juta tiko ga o Itomi me yacova mai na siga qo. E veivorati tale ga o Lipina+ ena gauna qori. 23  Na vo ni itukutuku me baleti Jorami, na ka kece e cakava, e volai ena ivola ni itukutuku ni nodra gauna na tui Juta. 24  E qai davo vata kei ira na tukana o Jorami, e bulu vata kei ira na tukana ena Koro i Tevita.+ E tui sara o Esaia+ na luvena me sosomitaki koya. 25  Ena ika12 ni yabaki i Jorami na luvei Eapi na tui Isireli, e tui sara o Esaia na luvei Tui Jorami e Juta.+ 26  E tui o Esaia ni sa yabaki 22, e dua ga na yabaki na nona veiliutaki e Jerusalemi. Na yaca i tinana o Acalaia+ na makubui* Tui Omirai+ e Isireli. 27  E muria na nodra ivalavala na vuvale i Eapi,+ e cakava tiko ga na ka ca ena mata i Jiova me vaka na vuvale i Eapi, e veiwekani ena vuvale i Eapi ni vakawati kina.+ 28  E qai lako vata kei Jorami na luvei Eapi me rau valuti Tui Eseli e Siria mai Remoci-kiliati,+ ia era vakamavoataki Jorami na kai Siria.+ 29  E mani lesu i Jesirieli o Tui Jorami+ me bula mai na nona mavoa era vakamavoataki koya kina na kai Siria mai Rama, ni valuti Tui Eseli e Siria.+ E lako sobu i Jesirieli o Esaia na luvei Jorami na tui Juta me lai raici Jorami na luvei Eapi ni mavoa tu.*

iVakamacala e ra

Se “biuta.”
Ipe., “luvena yalewa o.”
Se “tauvimate.”