iKarua ni Tui 7:1-20
7 E kaya o Ilaisa, “Moni rogoca na vosa i Jiova. Qo na ka e tukuna o Jiova: ‘Ena gauna vata qo nimataka ena matamata* e Samaria, na isau ni dua na sia* na ivakarau falawa vinaka sara ena dua na sikeli,* kei na rua na sia na ivakarau varile ena dua na sikeli.’”+
2 E kaya vua na tamata ni Kalou dina na turaganivalu e dau nuitaka na tui: “Ke dolava mada ga o Jiova na katuba ni lomalagi, ena rawa ni yaco qo?”*+ E kaya o koya: “O na raica sara ga e matamu+ ia o na sega ni kana kina.”+
3 Eratou tiko ena matamatanikoro e va na vukavuka,+ eratou veivosakitaka: “Na cava me datou tiko ga kina eke me datou mate?
4 Ke tou kaya, ‘Me datou lako ina koro,’ ni sa dausiga tu na koro,+ tou na mate e kea. Ke tou tiko ga eke tou na mate tale ga. Ia me datou lako yani ena nodra keba na kai Siria. Ke ra vakabulai kedatou, tou na bula, ia ke ra vakamatei kedatou tou sa na mate ga.”
5 Eratou cavutu ena yakavi ni sa buto, eratou curu ina nodra keba na kai Siria. Ni ratou yaco ina ibili ni nodra keba na kai Siria, sa sega ni dua e tu e kea.
6 Ni vakavuna o Jiova mera rogoca ena keba ni kai Siria na rorogo ni qiqinivalu kei na ose, na rorogo ni dua na mataivalu levu.+ Era mani veikayaka: “Raica! Sa sauma na nodra tui na Itaiti kei na nodra tui na Ijipita o tui Isireli mera valuti keda!”
7 Era tucake sara mera dro ena yakavi ni sa buto, era biuta tu mai na nodra valelaca, na ose, na asa, e toka ga na nodra keba taucoko ra qai dro mera bula.
8 Ni ratou yaco na vukavuka qo ena ibili ni keba, eratou curu sara ena dua na valelaca, eratou kana eratou gunu. Eratou kauta mai kea na siliva, na koula kei na isulu, eratou lako yani me ratou vunia. Oti eratou lesu me ratou curu ena dua tale na valelaca, eratou kauta mai kea eso na ka, eratou lako yani me ratou vunia.
9 Oti eratou veikayaka: “E sega ni dodonu na ka tou cakava tiko. Nikua na siga ni itukutuku vinaka! Ke tou lomalomarua me datou waraka na kida ni mataka, tou na totogitaki. Me datou lako, me tou lai tukutuku ena valenitui.”
10 Eratou mani lako yani eratou kacivi ratou na ivakatawa ni matamatanikoro, eratou tukuna sara vei ratou: “Keitou a lako ena nodra keba na kai Siria, ia e sega ni dua e tu kina, keitou sega ni rogoca e dua. E vesu tu ga e kea na ose kei na asa, e duri tu ga na valelaca.”
11 Era kaci sara na ivakatawa ni matamata qai tukuni ena loma ni valenitui.
12 E duri mai na tui ena bogi, e kaya vei ira na nona dauveiqaravi: “Meu tukuna mada vei kemuni na ka era cakava vei keda na kai Siria. Era kila nida sa walokai tu,+ era mani biuta na nodra keba mera lai vuni i veikau, era kaya: ‘Era na biuta mai na koro, eda na vesuki ira bulabula da qai curu ina koro.’”+
13 E kaya sara e dua na nona dauveiqaravi: “Yalovinaka, me ratou kauta eso na tamata e lima na ose e vo tiko ena koro. Raica! Era na vakataki ira ga na ilala Isireli levu era vo tiko qo. Raica! Era na vakataki ira ga na ilala Isireli levu era mate. Meda talai ira yani da qai raica.”
14 Eratou mani kauta e rua na qiqinivalu kei na ose, e talai ratou yani na tui ina nodra keba na kai Siria, e kaya: “Dou lai raica.”
15 Eratou muri ira yani me yaco ina Joritani, e robota na gaunisala na isulu kei na iyaya era kolotaka na kai Siria nira dro ena domobula. Eratou lesu yani na italai, eratou tukuna sara vua na tui.
16 Era qai lako yani na tamata mera yauta na nodra keba na kai Siria, na isau gona ni dua na sia na ivakarau falawa vinaka sara e dua na sikeli, kei na rua na sia na ivakarau varile e dua na sikeli me vaka ga na vosa i Jiova.+
17 E lesia na tui na turaganivalu e nuitaka me vakatawa na matamata, ia era butubutuki koya na tamata ena matamata mani mate kina, me vaka ga e tukuna vua na tui na tamata ni Kalou dina ni lako sobu yani vua.
18 E yaco dina me vaka na ka e tukuna na tamata ni Kalou dina vua na tui: “Ena gauna vata qo nimataka ena matamata e Samaria, na isau ni rua na sia na ivakarau varile ena dua na sikeli, kei na dua na sia na ivakarau falawa vinaka sara ena dua na sikeli.”+
19 Ia e kaya na turaganivalu vua na tamata ni Kalou dina: “Ke dolava mada ga o Jiova na katuba ni lomalagi, ena rawa ni yaco na ka* va qo?” E kaya o Ilaisa: “O na raica sara ga e matamu ia o na sega ni kana kina.”
20 E yaco dina qori vua nira butubutuki koya na tamata ena matamata, mani mate.
iVakamacala e ra
^ Se “makete.”
^ Dua na sia e tautauvata kei na 7.33 na lita. Raica na iKuri B14
^ Dua na sikeli e tautauvata kei na 11.4 na karamu (0.367 na onisi). Raica na iKuri B14.
^ Ipe., “na vosa qo.”
^ Ipe., “na vosa.”
