iKarua ni Tui 6:1-33
6 Era tukuna na luve ni parofita+ vei Ilaisa: “Raica! Sa oso mai na vanua eda tiko kina.
2 Yalovinaka me keimami lako mada ina Joritani. Me keimami yadua mai kea na tolonikau, me keimami tara e dua na vanua meda tiko kina.” E kaya o koya: “Moni lako.”
3 E kaya e dua: “Yalovinaka, oni na lako vata kei keimami na nomuni dauveiqaravi?” E kaya o koya: “Au na lako.”
4 E mani lako vata kei ira, nira yaco ena Joritani era ta kau sara.
5 Ni ta kau tiko e dua vei ira, e lutu i wai na yame ni matau qai kailavaka: “Oilei noqu turaga, e kerei mada ga mai qori!”
6 E kaya na tamata ni Kalou dina: “E lutu i vei?” E vakaraitaka sara vua na vanua. E taya o koya e dua na tikinikau qai viritaka e kea me vude mai na yame ni matau.
7 E kaya o Ilaisa: “Mo taura cake mai.” E dodoka yani na ligana me taura mai.
8 Ia e lai valuti ira na Isireli na tui Siria.+ E kere ivakasala vei ira na nona dauveiqaravi, e kaya: “Eda na lai keba vata ena vanua o ka.”
9 E mani talatala na tamata ni Kalou dina+ vua na tui Isireli, e kaya: “Qarauna moni kua ni lakova na vanua qo, nira na lako sobu mai kina na kai Siria.”
10 E qai talatala na tui Isireli ina vanua e vakasalataka vua na tamata ni Kalou dina. E vakasalataki koya tiko ga o Ilaisa, e sega ni torova o koya na vanua oya ena vica na gauna.*+
11 E vakacudruya vakalevu na tui* Siria na ka qo, e kacivi ira mai na nona dauveiqaravi qai tukuna vei ira: “Ni tukuna vei au! O cei vei keda e tokoni tui Isireli tiko?”
12 E kaya sara e dua na nona dauveiqaravi: “Sega ni dua vei keimami, noqu turaga na tui! O Ilaisa ga na parofita e tiko e Isireli, e tukuna tiko vua na tui Isireli na ka oni dau tukuna ena nomuni rumunimoce.”+
13 E kaya o koya: “Moni lai raica na vanua e tiko kina, meu tala eso mera vesuki koya mai.” E qai tukuni vua: “E tiko mai Tocani o koya.”+
14 E tala sara eso na ose kei na qiqinivalu kei na dua na mataivalu levu, era lako yani ena bogi mera wavokita na koro.
15 Ni yadra vakamataka na dauveiqaravi ni tamata ni Kalou dina me curu i tuba, e raica ni wavokita tu na koro e dua na mataivalu, na ose kei na qiqinivalu. E kaya sara vei Ilaisa na nona dauveiqaravi: “Oilei noqu turaga! Na cava me daru cakava?”
16 Ia e kaya o koya: “Mo kua ni rere!+ Era lewe levu era tiko vata kei kedaru, era lewe lailai ga era tiko vata kei ira.”+
17 E masu sara o Ilaisa, e kaya: “Kemuni Jiova, au kerea moni dolava na matana me rai rawa.”+ E dolava sara o Jiova na matana na dauveiqaravi, e rai o koya, e raica! Sa oso wale ga na ulunivanua ena ose kei na qiqinivalu bukawaqa,+ era wavokiti Ilaisa kece tu.+
18 Nira lako sobu yani vua na kai Siria, e masu sara vei Jiova o Ilaisa, e kaya: “Au kerea moni vakamatabokotaki ira na lewe ni matanitu qo.”+ E mani vakamatabokotaki ira me vaka e kerea o Ilaisa.
19 E kaya vei ira o Ilaisa: “E sega ni gaunisala qo, e sega tale ga ni koro. Moni muri au mai, au na kauti kemuni vua na turaga oni vaqara tiko.” Ia e kauti ira i Samaria.+
20 Nira yaco i Samaria e kaya o Ilaisa: “Kemuni Jiova, ni dolava na matadra mera rai rawa.” E dolava sara o Jiova na matadra, era raica nira sa tu e loma i Samaria.
21 Ni raici ira ga na tui Isireli, e kaya sara vei Ilaisa: “Tamaqu, meu mokuti ira, meu mokuti ira?”
22 Ia e kaya o koya: “Moni kua ni mokuti ira. Oni dau mokuti ira oni kauta vakabobula ena nomuni iseleiwau kei na nomuni dakaititi? Moni solia vei ira na madrai kei na wai, mera kana mera gunu,+ ra qai lesu vua na nodra turaga.”
23 E mani vakarautaka vei ira o koya e dua na magiti levu, era kana era gunu, oti qai talaci ira mera lesu vua na nodra turaga. Era sega tale ni butuka yani na vanua o Isireli na ilala daukabakoro ni Siria.+
24 Oti e kumuni ira kece na nona mataivalu* o Penietati na tui Siria mera lako cake mera viribaiti Samaria.+
25 E dausiga vakalevu+ o Samaria, era viribaita tiko ga me yacova ni volitaki kina e dua na ulu ni asa+ ena 80 na tikinisiliva kei na duanaikava na ivakarau kepi* na deniruve ena 5 na tikinisiliva.
26 Ia ni taubale tiko ena delanibai na tui Isireli, e qoqolou yani vua e dua na yalewa: “Moni vukei keirau mada noqu turaga na tui!”
27 E kaya o koya: “Ke sega ni vukei iko o Jiova, au na qai vukei iko vakacava? Mai na rara ni butu covuata? Mai na ikeliniwaini se waiwai?”
28 E taroga na tui: “Na cava e leqa vei iko?” E kaya o koya: “E tukuna vei au na yalewa qo, ‘Solia mai na luvemu me daru kania nikua, daru qai kania na luvequ nimataka.’+
29 Keirau mani saqara na luvequ, keirau kania.+ Au kaya vua ena siga tarava, ‘Solia mai na luvemu me daru kania.’ Ia e vunitaka na luvena.”
30 Ni rogoca ga na tui na ka e tukuna na yalewa, e dresulaka na nona isulu.+ Ni taubale tiko ena delanibai, era raica na tamata ni sa dara tu e loma na isulutaga.*
31 E qai kaya o koya: “Me vakayacora mada ga vei au na Kalou me kuria tale ga, ke se tiko ga nikua vei Ilaisa na luvei Safati na uluna!”+
32 Ia e dabe tiko o Ilaisa ena nona vale, era dabe tale tiko ga e kea na qase. E tala na tui e dua me liu vua, ia ni bera ni yaco yani na italai, e kaya o Ilaisa vei ira na qase: “Oni sa raica ni talatala mai na luve ni daulaba qo+ me tamusuka na uluqu? Raica ni yaco mai na italai moni sogota na katuba, moni biliga yani vua na katuba. Vakacava, e sega ni muri koya mai na rorogo ni yava i nona turaga?”
33 Ni se vosa tiko ga vei ira, sa lako yani vua na italai, e kaya na tui: “Qo na ka ca mai vei Jiova. Na cava tale meu waraki Jiova tiko kina?”
iVakamacala e ra
^ Se “sega ga ni vakadua se vakarua.”
^ Ipe., “na loma i tui.”
^ Ipe., “keba.”
^ Dua na kepi e tautauvata kei na 1.22 na lita (1.11 na ivakarau mamaca). Raica na iKuri B14.
^ Se “loma, volekata na yagona.”
