iKarua ni Tui 25:1-30
25 Ena ikaciwa ni yabaki ni veiliutaki nei Setekaia, ena ikatini ni vula ena ikatini ni siga ni vula, e lako o Tui Nepukanesa+ mai Papiloni kei na nona mataivalu kece me valuti Jerusalemi.+ E keba volekata qai tara wavolita+ e dua na bainivalu,
2 e viribaiti na koro me yacova na ika11 ni yabaki nei Tui Setekaia.
3 Ena ikaciwa ni siga ena ikava ni vula, e tatara vakaca+ na dausiga ena koro, e sega na kedra kakana na lewenivanua.+
4 E botei+ na bai ni koro, era mani dro ena bogi na sotia ena maliwa ni bai ruarua volekata na nona basenikau na tui, nira wavokita tu na koro na Kalitia, e lako sara na tui ina Arapa.+
5 Ia era cicimuria na tui na mataivalu ni Kalitia ra qai toboki koya ena buca dravuisiga e Jeriko, era veiseyaki mai yasana na nona mataivalu kece.
6 Era vesuka sara na tui+ ra qai kauti koya cake vei tui Papiloni e Ripila, era mani lewai koya.
7 Era vakamatei ratou na luvei Setekaia e matana, e vakamatabokotaki Setekaia o Nepukanesa, e vesuki koya ena ivesu kopa qai kauti koya i Papiloni.+
8 Ena ikalima ni vula ena ikavitu ni siga ni vula, ena ika19 ni yabaki nei Tui Nepukanesa na tui Papiloni, e yaco yani i Jerusalemi+ o Nipusaretani+ na iliuliu ni yadra, na dauveiqaravi nei tui Papiloni.
9 E vakama na vale i Jiova,+ na valenitui,+ kei na vale kece e Jerusalemi,+ e vakama tale ga na nodra vale kece na turaga dokai.+
10 Era basuka na bai taucoko e voliti Jerusalemi na mataivalu taucoko ni Kalitia era salavata yani kei na iliuliu ni yadra.+
11 O ira na lewenivanua era vo tu ena koro, o ira na dro vei tui Papiloni kei ira na vo ni lewenivanua+ e kauti ira vakavesu o Nipusaretani na iliuliu ni yadra.
12 Ia e biuta tu mai na iliuliu ni yadra eso na lewenivanua dravudravua sara mera samaki vaini, mera vakavorakitaki mera cakacaka wale.+
13 Era vorolaka vakamatailalai na Kalitia na duru kopa+ e tu ena vale i Jiova, na qiqi+ kei na Wasawasa kopa+ e tu ena vale i Jiova, ra qai kauta na kena kopa i Papiloni.+
14 Era kauta tale ga na sedre, na isivi, na ikotinivauvau ni cina, na bilo, kei na iyaya kopa kece e dau vakayagataki ena valenisoro.
15 E kauta na iliuliu ni yadra na itawatawa ni bukawaqa, na boulu koula dina+ kei na kena e siliva dina.+
16 Na duru ruarua, na Wasawasa, kei na qiqi a cakava o Solomoni me baleta na vale i Jiova, e sega ni kilai rawa na bibi+ ni kopa ni iyaya kece qori.
17 E 18 na kiupiti* na cere+ ni dua na duru, e kopa na iukuuku e toka e muana, na cere ni iukuuku qori e tolu na kiupiti, e kopa taucoko+ na lawalawa kei na pomekaraneti e wavokita na iukuuku. E va tale ga qori na ikarua ni duru kei na kena lawalawa.
18 Na iliuliu ni yadra e kauti Siraia+ tale ga na iliuliu ni bete, o Sefanaia+ na ikarua ni bete, kei na tolu na ivakatawa ni katuba.+
19 E kauta mai na koro e dua na vakailesilesi e lewai ira na sotia, e lima na nona itokani voleka na tui eratou tiko ena koro, vaka kina na nona vunivola na turaganivalu e dau soqoni ira vakaivalu na lewenivanua, kei na 60 na lewenivanua e laurai ena koro.
20 E tauri ira o Nipusaretani+ na iliuliu ni yadra qai kauti ira vei tui Papiloni e Ripila.+
21 E mokuti ira o tui Papiloni, e vakamatei ira e Ripila ena vanua o Emaci.+ E mani kau vakavesu o Juta mai na nona vanua.+
22 Ia o Tui Nepukanesa e Papiloni e lesi Kitalaia+ na luvei Eikami+ na luvei Safani+ me lewai ira na lewenivanua e biuti ira tu mai ena vanua o Juta.+
23 Ni ratou rogoca kece na turaganivalu kei ira na nodratou tamata ni sa lesi Kitalaia o tui Papiloni, eratou lako sara vei Kitalaia e Misipa. Qo o Isimeli na luvei Necanaia, o Joenani na luvei Karea, o Siraia na luvei Tanumeci na kai Nitofa, kei Jesanaia na luvena e dua na kai Meaka, kei ira na nodratou tamata.+
24 E bubului o Kitalaia vei ratou kei ira na nodratou tamata, e kaya vei ira: “Ni kua ni rere moni nodra dauveiqaravi na Kalitia. Ni tiko ena vanua moni qarava na tui Papiloni, oni na vinaka kina.”+
25 Ena ikavitu ni vula e lako yani o Isimeli+ na luvei Necanaia na luvei Ilisama na kawa vakatui* kei na tini na tagane, eratou qai mokuti Kitalaia mani mate kina kei ira na Jiu kei ira na Kalitia era tomani koya mai Misipa.+
26 Oti qori era lako sara i Ijipita+ na lewenivanua kece, o ira na gone kei ira na qase, kei ira na turaganivalu, nira rerevaki ira na Kalitia.+
27 Ena ika37 ni yabaki ni nona kau vakavesu o Tui Jioakini+ e Juta, ena ika12 ni vula ena ika27 ni siga ni vula, e qai sereki Tui Jioakini e Juta mai valeniveivesu+ o Tui Ivili-mirotaki e Papiloni ena yabaki e tui kina.
28 E vosa vinaka vua qai vakatikora na nona idabedabe vakaturaga me cecere mai na nodra idabedabe vakaturaga na tui era tiko vata kei koya e Papiloni.
29 E mani luvata o Jioakini na nona isulu ni valeniveivesu, e kana tiko ga e matana ena gauna kece ni nona bula.
30 E dau solia mai na tui na kena ivotavota kakana ena veisiga ena gauna kece ni nona bula.
iVakamacala e ra
^ Dua na kiupiti e tautauvata kei na 44.5 na sedimita (17.5 na idi). Raica na iKuri B14.
^ Ipe., “na kawa ni matanitu.”
