iKarua ni Tui 23:1-37
23 E talatala sara na tui mera kacivi yani o ira kece na qase ni Juta kei Jerusalemi.+
2 Oti qori e lako cake na tui ina vale i Jiova kei ira kece na lewe i Juta, o ira kece na lewe i Jerusalemi, o ira na bete, o ira na parofita kei ira kece na lewenivanua, o ira na gone kei ira na qase. E wilika sara vei ira mera rogoca na vosa kece e tukuni ena ivola+ ni veiyalayalati+ e kune ena vale i Jiova.+
3 E tucake tu na tui ena yasa ni duru me veiyalayalati* ena mata i Jiova,+ me muri Jiova, me talairawarawa ina nona ivakaro, ina nona veivakadreti, kei na nona lawa ena lomana taucoko kei na nona vinaka* taucoko me vakayacora na vosa ni veiyalayalati e volai tu ena ivola qo. Era duavata kei na veiyalayalati+ na lewenivanua taucoko.
4 E qai vakaroti Ilikaia+ na bete levu na tui, o ira na bete lalai kei ira na ivakatawa ni katuba mera kauta mai na valenisoro i Jiova na iyaya kece e caka me nei Peali, me baleta na duru ni sokalou*+ kei na kalokalo kece ni lomalagi. E vakama ena taudaku kei Jerusalemi ena baba o Kitironi, e kauta sara na kena dravusa i Peceli.+
5 E tarova na nodra veiqaravi na bete ni kalou lasu era lesia na tui Juta mera dau cabora na isoro kubou ena vanua cecere ena koro kece e Juta kei na vanua volekati Jerusalemi, vaka kina o ira era dau cabora na isoro kubou vei Peali, ina matanisiga, ina vula, ina matakalokalo na sotiaki kei na kalokalo kece ni lomalagi.+
6 E kauta mai tuba o koya na duru ni sokalou*+ mai na vale i Jiova me kau ina ibili kei Jerusalemi ina Buca o Kitironi qai vakama+ ena Buca o Kitironi, e qaqia me dravusa qai kaburaka na kena dravusa ena nodra ibulubulu na lewenivanua.+
7 E basuka tale ga na nodra vale na tagane saqamua+ ni valenisoro e tiko ena vale i Jiova, na vanua era talia tiko kina na marama na laca ni burekalou me baleta na duru ni sokalou.*
8 E qai kauti ira tani na bete kece era tiko ena koro e Juta, e vakatawayagataka na vanua cecere era dau cabora kina na bete na isoro kubou mai Kipa+ me yaco sara i Pieri-sepa.+ E basuka tale ga na vanua cecere ena matamata e tiko ena matamata nei Josua, na turaganikoro, e tiko ena imawi ni curu yani e dua ena matamatanikoro.
9 Era sega ni veiqaravi ena icabocabonisoro i Jiova e Jerusalemi+ o ira na bete ni vanua cecere, ia era kania na madrai sega ni vakaleveni kei ira na tacidra.
10 E vakatawayagataki Tofeci+ tale ga e tiko ena nodra Buca na Luvei Inomi,*+ me kua ni dua e cabora kina na luvena tagane se luvena yalewa ena bukawaqa vei Moleke.+
11 E tarova o koya na ose era cabora* na tui Juta ina matanisiga mera kua ni curu ena vale i Jiova volekata na rumu* nei Necanimeleki na vakailesilesi, e tiko ena varada, e qai vakama na qiqi ni matanisiga.+
12 E basuka tale ga na tui na icabocabonisoro era tiko ena delanivale+ nei Easi ena tabavale e cake era cakava na tui Juta, kei na icabocabonisoro e cakava o Manasa ena rara ruarua ni vale i Jiova.+ E qaqia qai kaburaka na kena dravusa ena buca o Kitironi.
13 E vakatawayagataka na tui na vanua cecere e tiko e mata i Jerusalemi, ena ceva* ni Ulunivanua o Rusa* a tara o Solomoni na tui Isireli vei Asetoreci na nodra kalou yalewa vakasisila na kai Saitoni, vei Kimosi na nodra kalou vakasisila na kai Moapi, kei Milikomi+ na nodra kalou vakasevaki na Amoni.+
14 E vorovorolaka na vatu ni sokalou, e tatalaka na duru ni sokalou*+ qai vakasinaita na kena vanua ena sui ni tamata.
15 E basuka tale ga na icabocabonisoro e Peceli, na vanua cecere a cakava o Jerepoami na luvei Nipati e vakavuna mera valavala ca kina na Isireli.+ Ni basuka oti na icabocabonisoro qori kei na vanua cecere, e vakama na vanua cecere, e qaqia me dravusa qai vakama na duru ni sokalou.*+
16 E vuki o Josaia e raica sara na ibulubulu e tiko ena ulunivanua, e mani vakarota me lai kau mai na sui mai na ibulubulu qai vakama ena icabocabonisoro me vakatawayagataka me vaka na vosa i Jiova a tukuna na tamata ni Kalou dina, o koya a tukuna me yaco+ na ka qo.
17 E kaya sara: “Na ibulubulu vatu cava au raica tiko qo?” Era kaya vua na lewenikoro: “Na nona ibulubulu na tamata ni Kalou dina mai Juta,+ a tukuna na ka kece oni cakava qo ena icabocabonisoro e Peceli.”
18 E kaya o koya: “Biuta me vakacegu. Me kua ni dua e yavalata na suina.” Era mani sega ni yavalata na suina, kei na sui ni parofita a lako mai Samaria.+
19 E kauta tani tale ga o Josaia na vale ni sokalou kece ni vanua cecere era tiko ena koro e Samaria,+ era tara na tui Isireli me vakacudruya na Kalou, e cakava kina me vaka na ka kece a cakava mai Peceli.+
20 E qai cabori ira kece na bete ni vanua cecere era tiko e kea ena dela ni icabocabonisoro, e vakama tale ga kina na sui+ ni tamata. Oti qori e lesu i Jerusalemi.
21 E vakaroti ira na lewenivanua kece na tui: “Moni marautaka na Lakosivia+ vei Jiova na nomuni Kalou me vaka e volai ena ivola ni veiyalayalati qo.”+
22 E sega ni dua na Lakosivia me tautauvata kei na kena qo mai na nodra gauna na turaganilewa era lewa e Isireli, se na nodra gauna kece na tui Isireli kei ira na tui Juta.+
23 Ena ika18 ni yabaki i Tui Josaia e vakayacori kina na Lakosivia qo vei Jiova mai Jerusalemi.
24 Ia o ira na dauvakacuru, na daukilakila,+ na matakau terafimi,*+ na matakau vakasisila,* kei na ka vakasisila kece e laurai ena vanua o Juta kei Jerusalemi, e kauti ira tani tale ga o Josaia me vakayacora kina na vosa ni Lawa+ e volai ena ivola e kunea o Ilikaia na bete ena vale i Jiova.+
25 E sega ni dua na tui e liu vua me vakataki koya, ni lesu vei Jiova ena lomana taucoko, nona vinaka taucoko*+ kei na nona kaukaua taucoko me vaka na Lawa kece e vola o Mosese, e sega ni dua e taravi koya me vakataki koya.
26 Ia e waqa tiko ga na cudru i Jiova ni cudruvi Juta, ena vuku ni ka beci kece a cakava o Manasa me vakacudrui koya kina.+
27 E kaya o Jiova: “Au na kauti Juta tani tale ga mai mataqu+ me vaka ga noqu kauti Isireli tani,+ au na sega ni vakadonuya na koro au digitaka, o Jerusalemi kei na vale au a tukuna kina, ‘Ena tiko ga e kea na yacaqu.’”+
28 Na vo ni itukutuku me baleti Josaia, na ka kece a cakava, e volai ena ivola ni itukutuku ni nodra gauna na tui Juta.
29 Ena nona gauna, e lako o Fero Niko na tui Ijipita me tavaki tui Asiria volekata na Uciwai na Uferetisi, e mani lako o Tui Josaia me valuti koya, ia ni raici koya ga o Niko e vakamatei koya e Mekito.+
30 Era kauta na yagona na nona dauveiqaravi ena dua na qiqi mai Mekito me kau i Jerusalemi, era buluti koya ga ena nona ibulubulu. Era qai kauti Jioasi na luvei Josaia na lewenivanua mera lumuta me tui me sosomitaki tamana.+
31 E tui o Jioasi+ ni sa yabaki 23, e veiliutaki e Jerusalemi me tolu na vula. Na yaca i tinana o Emutali+ na luvei Jeremaia mai Lipina.
32 E tekivu vakayacora na ka ca ena mata i Jiova me vaka ga na ka kece era cakava na tukana.+
33 E vesuki koya o Fero Niko+ e Ripila+ ena vanua o Emaci me kua ni veiliutaki mai Jerusalemi, qai lavaka mera sauma na lewenivanua e 100 na taledi* siliva kei na dua na taledi koula.+
34 E buli Eliakimi tale ga na luvei Josaia o Fero Niko me tui me sosomitaki Josaia na tamana, e veisautaka na yacana me o Jioiakimi, ia e kauti Jioasi i Ijipita+ qai lai mate e kea.+
35 E solia vei Fero o Jioiakimi na siliva kei na koula, ia e lavaka na ivakacavacava ena vanua me solia na siliva e vakarota o Fero. E lavaka vei ira na lewenivanua yadua na siliva kei na koula me soli vei Fero Niko.
36 E tui o Jioiakimi+ ni sa yabaki 25, e veiliutaki e Jerusalemi+ me 11 na yabaki. Na yaca i tinana o Siputa na luvei Petaia mai Ruma.
37 E vakayacora tiko ga na ka ca ena mata i Jiova+ me vaka ga na ka kece era cakava na tukana.+
iVakamacala e ra
^ Se “veiyalayalati tale.”
^ Ipe., “nona neʹphesh kece.” Raica na iVakamacala ni Vosa.
^ Raica na iVakamacala ni Vosa.
^ Raica na iVakamacala ni Vosa.
^ Raica na iVakamacala ni Vosa.
^ Raica na iVakamacala ni Vosa, “Qiena.”
^ Ipe., “solia.”
^ Se “rumunikana.”
^ Ipe., “imatau.” Oya ena ceva, ni dua e qara ina tokalau.
^ Oya na Ulunivanua ni Veiolive, vakabibi na yasayasa ena ceva e kilai tale ga me Ulunivanua ni Veivakacalai.
^ Raica na iVakamacala ni Vosa.
^ Raica na iVakamacala ni Vosa.
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Se “kalou ni dua na itikotiko.”
^ Ipe., “nona neʹphesh kece.” Raica na iVakamacala ni Vosa.
^ Dua na taledi e tautauvata kei na 34.2 na kilokaramu (1,101 na onisi). Raica na iKuri B14.
