iKarua ni Tui 22:1-20
22 E tui o Josaia+ ni sa yabaki walu, e veiliutaki e Jerusalemi me 31 na yabaki.+ Na yaca i tinana o Jitita na luvei Ataia mai Posikaci.+
2 E cakava na ka e donu ena mata i Jiova, e muria na ivalavala kece i Tevita na tukana,+ e sega ni gole tani ina imatau se ina imawi.
3 Ena ika18 ni yabaki i Tui Josaia, e talai Safani na vunivola, na luvei Asalaia, na luvei Mesulame o koya na tui ina vale i Jiova,+ e kaya:
4 “Mo lako cake vei Ilikaia+ na bete levu, me kumuna kece na ilavo e kau yani ina vale i Jiova+ era kumuna na ivakatawa ni katuba vei ira na lewenivanua.+
5 Mera solia vei ira na lesi mera raica na cakacaka ena vale i Jiova, mera qai solia vei ira na cakacaka ena vale i Jiova mera vakavinakataka na ka e ca* ena vale,+
6 vei ira na liga maqosa, vei ira na matai kei ira na matai ni vatu, mera volia kina na kau kei na vatu sa ta oti me vakavinakataki kina na vale.+
7 Ia me kua ni vaqaqai na ilavo e soli vei ira nira nuitaki.”+
8 Oti e kaya o Ilikaia na bete levu vei Safani na vunivola:+ “Au sa kunea na ivola ni Lawa+ ena vale i Jiova.” E mani solia na ivola o Ilikaia vei Safani, e wilika sara o koya.+
9 E lako vua na tui o Safani na vunivola me tukutuku vua: “Era sa sova na nomuni dauveiqaravi na ilavo e kune ena vale, era sa solia vei ira na lesi mera raica na cakacaka ena vale i Jiova.”+
10 E tukuna tale ga o Safani na vunivola vua na tui: “E solia vei au e dua na ivola+ o Ilikaia na bete.” E wilika sara o Safani vua na tui.
11 Ni rogoca ga na tui na ka e tukuni ena ivola ni Lawa, e dresulaka sara na nona isulu.+
12 E qai vakaroti Ilikaia na bete na tui, o Eikami+ na luvei Safani, o Akipori na luvei Maikaia, o Safani na vunivola kei Asaia na dauveiqaravi ni tui:
13 “Dou lai tarogi Jiova ena vukuqu, ena vukudra na lewenivanua, kei na vukudra na lewe i Juta kece me baleta na ka e tukuni ena ivola e kune qo, ni waqa vakalevu vei keda na cudru i Jiova+ nira sega ni muria na tukada na ka e tukuni ena ivola qo mera cakava na ka kece e volai tu kina me baleti keda.”
14 E lako sara o Ilikaia na bete, o Eikami, o Akipori, o Safani kei Asaia vei Ulita na parofita yalewa.+ O Ulita e wati Salumi na luvei Tikiva na luvei Ariasi e dau maroroya na isulu, e vakaitikotiko mai Jerusalemi ena iKarua ni Yasana, eratou vosa sara vua.+
15 E tukuna vei ratou: “Qo na ka e tukuna o Jiova na Kalou ni Isireli, ‘Dou tukuna vei koya e talai kemudou mai vei au:
16 “Qo na ka e tukuna o Jiova, ‘Au na kauta mai na ca ena vanua qo kei ira na lewena, na ka kece e tukuni ena ivola e wilika na tui Juta.+
17 Nira sa biuti au mera lai cabora na isoro kubou vei ira na kalou tale eso+ mera vakacudrui au kina ena cakacaka kece ni ligadra,+ e waqa sara ga na noqu cudru ena vanua qo ena sega ni boko rawa.’”+
18 Ia qo na ka mo dou tukuna vua na tui Juta e talai kemudou mai mo dou tarogi Jiova, “Qo na ka e kaya o Jiova na Kalou ni Isireli: ‘Ena vuku ni vosa o rogoca,
19 ni vakarorogo* na lomamu mo vakamalumalumutaki iko+ ena mata i Jiova, ni o rogoca na ka au tukuna me baleta na vanua qo kei ira na lewena, mera domobulataki ra qai vosavakacacataki, o dresulaka sara na nomu isulu+ o tagi e mataqu, au sa rogoci iko tale ga, e kaya o Jiova.
20 Qo na vuna au na kauti iko kina vei ira na nomu qase,* o na davo ena vakacegu ina nomu ibulubulu, ena sega ni raica na matamu na ca au na kauta mai ina vanua qo.’”’” Eratou lai tukutuku sara vua na tui.
