iKarua ni Tui 20:1-21
20 E tauvimate ena gauna oya o Esekaia, e voleka sara ni mate.+ E lako yani vua o Aisea na parofita na luvei Emosi, e kaya vua, “Qo na ka e tukuna o Jiova: ‘Mo tatau mada vei ira na lewe ni nomu vuvale, ni o na mate, o na sega ni bula tale.’”+
2 E mani vuki i lalaga o koya, e masu sara vei Jiova:
3 “Au masuti kemuni Jiova, moni nanuma na noqu lako voli e matamuni ena yalodina, ena lomaqu taucoko, au vakayacora tale ga na ka e vinaka e matamuni.”+ E qai tabalaka na tagi o Esekaia.
4 Ni bera ni lako o Aisea ena raranivale e loma e vosa vua o Jiova, e kaya:+
5 “Mo lesu mo tukuna vei Esekaia na nodra iliuliu na noqu tamata, ‘Qo na ka e tukuna o Jiova na Kalou i Tevita na nomu qase: “Au sa rogoca na nomu masu. Au sa raica na wainimatamu.+ Ia au na vakabulai iko.+ Ena ikatolu ni siga o na lako cake ina vale i Jiova.+
6 Au na kuria na nomu bula me 15 na yabaki, au na vakabulai iko kei na koro qo mai na liga i tui Asiria,+ au na taqomaka na koro qo ena vukuqu, ena vuku i Tevita tale ga na noqu dauveiqaravi.”’”+
7 E kaya sara o Aisea: “Moni kauta mai e dua na ibuli lolo rabaraba sigani.” Era mani kauta ra buluta kina na bo, sa qai bula mai vakamalua o Esekaia.+
8 E tarogi Aisea o Esekaia: “Na cava na ivakatakilakila+ ni na vakabulai au o Jiova, niu na lako cake tale ga ina vale i Jiova ena ikatolu ni siga?”
9 E kaya o Aisea: “Qo na ivakatakilakila mai vei Jiova ni na vakayacora o Jiova na ka e tukuna: O vinakata me toso i liu na yaloyalo me tini na ikabakaba,* se suka i muri me tini na ikabakaba?”+
10 E kaya o Esekaia: “E rawarawa me toso i liu na yaloyalo me tini na ikabakaba, ia me kua ni suka i muri na yaloyalo me tini na ikabakaba.”
11 E masu sara o Aisea na parofita vei Jiova qai vakasuka o koya na yaloyalo me tini na ikabakaba ena ikabakaba nei Easi ni sa lako sobu oti na yaloyalo ena ikabakaba.+
12 Ena gauna oya e vakau ivola kei na iloloma vei Esekaia na tui Papiloni o Pirotakipaletani na luvei Paletani, ni rogoca ni a tauvimate o Esekaia.+
13 E kidavaki* ratou o Esekaia qai vakaraitaka vei ratou na nona valeniyau taucoko,+ na siliva, na koula, na waiwai vakaisaluaki kei na waiwai vinaka, na nona valeniyaragi, kei na ka kece e laurai ena nona valeniyau. E sega ni dua na ka e vo me sega ni vakaraitaka vei ratou o Esekaia ena nona vale* kei na nona matanitu kece.
14 Oti oya e lako yani o Aisea na parofita vei Tui Esekaia, e tarogi koya: “Na cava eratou kaya na tagane qo, eratou lako mai vei?” E mani kaya o Esekaia: “Eratou lako mai na dua na vanua yawa, mai Papiloni.”+
15 E taroga tale o koya: “Na cava eratou raica ena nomu vale?”* E kaya o Esekaia: “Eratou raica na ka kece e tiko ena noqu vale.* E sega ni dua na ka e vo meu sega ni vakaraitaka vei ratou ena noqu valeniyau.”
16 E kaya sara o Aisea vei Esekaia: “Mo rogoca na vosa i Jiova,+
17 ‘Raica! Sa roro mai na gauna ena kau kina i Papiloni na ka kece e tu ena nomu vale* kei na ka kece era maroroya tu na nomu qase me yacova mai na siga qo.+ Ena sega ni vo e dua na ka,’ e kaya o Jiova.
18 ‘Era na kau eso na luvemu tagane era na tubu mai vei iko,+ era na lai vakailesilesi ni valenitui e Papiloni.’”+
19 E kaya sara o Esekaia vei Aisea: “E vinaka na vosa i Jiova o tukuna.”+ E tomana: “E vinaka ke tiko ga na vakacegu kei na tikovinaka* ena noqu gauna.”+
20 Na vo ni itukutuku me baleti Esekaia, na nona kaukaua kece, na nona cakava na tobuniwai,+ na kena isalisaliniwai, ni vakadrodroya tale ga na wai ina koro,+ e volai ena ivola ni itukutuku ni nodra gauna na tui Juta.
21 E qai davo vata kei ira na tukana o Esekaia,+ e tui sara o Manasa+ na luvena me sosomitaki koya.+
iVakamacala e ra
^ De vakayagataki na ikabakaba me tukuna na gauna, me vaka na kaloko matanisiga.
^ Se “valenitui.”
^ Se “rogoci.”
^ Se “valenitui.”
^ Se “valenitui.”
^ Se “valenitui.”
^ Se “dina.”
