iKarua ni Tui 2:1-25

  • Kau cake o Ilaija ena cagi kaukaua (1-18)

    • Taura o Ilaisa na isulu ni parofita nei Ilaija (13, 14)

  • Vakasavasavataka o Ilaisa na wai ni Jeriko (19-22)

  • Vakamatei ira na gonetagane e rua na bea mai Peceli (23-25)

2  Ni vakarau kauti Ilaija+ cake i lomalagi* o Jiova ena cagi kaukaua,+ erau biuti Kilikali*+ mai o Ilaija kei Ilaisa.+  E tukuna o Ilaija vei Ilaisa: “Au kerea mo tiko eke, ni talai au o Jiova i Peceli.” Ia e kaya o Ilaisa: “Me vaka ni bula dina tiko o Jiova o bula tale tiko ga o iko, au na sega ni biuti iko.” Erau lako sobu sara i Peceli.+  Era mani lako yani vei Ilaisa na luvedra na parofita* mai Peceli, era kaya vua: “O kila tiko ni na kauta tani nikua o Jiova na nomu turaga me kua ni lewai iko?”+ E kaya o koya: “Au sa kila tiko. Moni tiko lo ga.”  E tukuna vua o Ilaija: “Ilaisa, au kerea mo tiko eke, ni talai au o Jiova i Jeriko.”+ Ia e kaya o koya: “Me vaka ni bula dina tiko o Jiova o bula tale tiko ga o iko, au na sega ni biuti iko.” Erau mani lako i Jeriko.  Era lako yani vei Ilaisa na luvedra na parofita era tiko mai Jeriko, era kaya vua: “O kila tiko ni na kauta tani nikua o Jiova na nomu turaga me kua ni lewai iko?” E kaya: “Au sa kila tiko. Moni tiko lo ga.”  E tukuna vua o Ilaija: “Au kerea mo tiko eke, ni talai au o Jiova ina Joritani.” Ia e kaya o koya: “Me vaka ni bula dina tiko o Jiova o bula tale tiko ga o iko, au na sega ni biuti iko.” Erau mani lako yani.  Era lako yani e 50 na luvedra na parofita mera lai vakararai tu mai vakayawa, ni rau duri volekata tu na Joritani o rau na rua.  E taura sara o Ilaija na nona isulu ni parofita,+ e lobia qai mokuta kina na wai mani tawase ina imawi kei na imatau, rau qai takosova na vanua mamaca.+  Ni rau yaco ga i tai, e kaya sara o Ilaija vei Ilaisa: “Mo kerea na ka meu cakava vei iko ni bera niu kau tani vei iko.” E qai kaya o Ilaisa: “Au kerea me vakaruataki*+ mada ga vei au na yalo e tiko vei iko.”+ 10  E kaya o koya: “E dredre na ka o kerea. Ke o raica niu sa kau tani vei iko, ena sobuti iko, ke sega ena sega ga.” 11  Ni rau lako tiko erau veivosaki tale tiko ga, vakasauri ga e tawasei rau e dua na qiqi bukawaqa kei ira na ose bukawaqa,+ e lako cake sara i lomalagi* o Ilaija ena cagi kaukaua.+ 12  E rai tiko ga o Ilaisa, e qolouvaka: “I tamaqu, i tamaqu! Na qiqi nei Isireli kei ira na nona dauvodo ose!”+ Ni sega tale ni raici koya, e taura ga na nona isulu qai dresuka rua.+ 13  Oti qori e tomika na isulu ni parofita+ nei Ilaija e lutu mai vua, e lesu tale me lai duri ena bati ni Joritani. 14  E mani taura na isulu ni parofita nei Ilaija a lutu mai vua qai mokuta kina na wai, e kaya: “I vei o Jiova na Kalou i Ilaija?” Ni mokuta na wai e tawase ina imawi kei na imatau, e takoso sara o Ilaisa.+ 15  Nira raici koya yani vakayawa na luvedra na parofita era tiko e Jeriko, era kaya: “Sa sobuti Ilaisa na yalo tabu a sobuti Ilaija.”+ Era lako yani mera tavaki koya, ra qai tekicuva vua ina qele. 16  Era kaya vua: “Era tiko qo e 50 na tagane yaga kei ira na nomuni dauveiqaravi. Yalovinaka, mera lai vaqara na nomu turaga. De kauti koya cake na yalo* i Jiova qai biuti koya ena dua na ulunivanua se dua na buca.”+ Ia e kaya o Ilaisa: “Moni kua ni talai ira.” 17  Era cikevi koya tiko ga mani madua kina, e kaya sara: “Ni talai ira.” Era tala sara e 50 na tagane, era vaqaqara tiko ga me tolu na siga ia era sega ni kunei koya. 18  Nira lesu yani vua, sa tiko mai Jeriko.+ E mani kaya vei ira: “Au a tukuna moni kua ni lako.” 19  Sa dede toka era kaya vei Ilaisa na lewenikoro: “Sa toka vinaka na koro qo me vaka ga e raica tiko na noqu turaga,+ ia na wai ga e ca, na qele tale ga e sega ni vua.”* 20  E kaya o koya: “Moni kauta mai vei au e dua na boulu lailai vou, moni biuta kina na masima.” Era mani kauta yani vua. 21  E lako sara yani o koya ina soniwai qai biuta kina na masima,+ e kaya: “Qo na ka e tukuna o Jiova, ‘Au sa vakasavasavataka na wai qo. Ena sega tale ni vakavuna na mate se yava.’”* 22  E savasava tiko ga na wai me yacova mai qo me vaka na ka e tukuna o Ilaisa. 23  E qai biuta na vanua oya o Ilaisa me lako cake i Peceli. Ni muria tiko na sala, era lako mai na koro eso na gonetagane, era vakalialiai koya sara,+ era kaya tiko ga vua: “Lako cake ulucou! Lako cake ulucou!” 24  Oti e raivuki e raici ira, e cudruvi ira ena yaca i Jiova. Erau lako mai veikau e rua na bea yalewa,+ rau qai basuraka e 42 na gone.+ 25  E lako tiko ga o Ilaisa me yaco i Ulu i Kameli,+ mai kea e qai lesu i Samaria.

iVakamacala e ra

Se “macawa.”
Qo e sega ni o Kilikali volekati Jeriko, o Kilikali qo e tiko ena veitokaitua volekati Peceli.
“Na luvedra na parofita” e rairai dusia e dua na koronivuli era vakavulici kina na parofita, se dua na nodra isoqosoqo na parofita.
Se rua na iwasewase.”
Se “macawa.”
Se “cagi.”
Se rawa ni, “vakavuna na lutudole.”
Se rawa ni, “lutudole.”