iKarua ni Tui 17:1-41

  • Tui Isireli o Osia (1-4)

  • Vakamalumalumutaki o Isireli (5, 6)

  • Kau vakavesu o Isireli nira vukitani (7-23)

  • Era kau na vulagi ina veikoro e Samaria (24-26)

  • Era duidui lotu mai Samaria (27-41)

17  Ena ika12 ni yabaki nei Tui Easi e Juta, e tui Isireli mai Samaria o Osia+ na luvei Ela, e veiliutaki me ciwa na yabaki.  E vakayacora tiko ga na ka ca ena mata i Jiova, e sega ga ni vakataki ira na tui Isireli era bula e liu vua.  E lako cake o Tui Salimanisa e Asiria me valuti koya,+ e qai mai nona dauveiqaravi o Osia, e tekivu soli iloloma* vua.+  Ia e kila na tui Asiria ni bukivere o Osia ni tala eso na italai vei Tui So e Ijipita+ qai sega ni kauta cake na iloloma vei tui Asiria me vaka ena veiyabaki sa sivi. E mani sogoti Osia o tui Asiria, e vesuki koya ena valeniveivesu.  E lakova na vanua taucoko o tui Asiria mani yaco i Samaria, e viribaita me tolu na yabaki.  Ena ikaciwa ni yabaki i Osia, e valuti Samaria o tui Asiria.+ E qai kauti ira vakavesu na Isireli+ i Asiria, e vakatikori ira e Ela kei Apori volekata na uciwai na Kosani+ kei na nodra koro na kai Mitia.+  E yaco qo nira valavala ca na Isireli vei Jiova na nodra Kalou, o koya e kauti ira cake mai na vanua o Ijipita ena lewa i Fero na tui Ijipita.+ Era qarava eso tale na kalou,+  era muria na nodra ivalavala na veimatanitu e cemuria o Jiova e matadra na Isireli, era muria na ivakarau era bulia na tui Isireli.  Era vakayacora na Isireli na ka e sega ni donu vei Jiova na nodra Kalou. Era tara tiko ga na vanua cecere ena nodra koro kece,+ mai na valeniyadra me yacova na koro vakabai.* 10  Era vakaduria tiko ga na nodra vatu ni sokalou kei na duru ni sokalou*+ ena delana cecere kece kei na ruku ni kau bulabula kece,+ 11  era dau cabora na isoro kubou ena vanua cecere kece me vaka era cakava na veimatanitu e kauti ira vakavesu o Jiova e matadra.+ Era vakayacora tiko ga na ka ca mera vakacudrui Jiova. 12  Era qarava tiko ga na matakau vakasisila*+ e tukuna vei ira o Jiova: “Moni kua ni cakava qo!”+ 13  E vakasalataki ira tiko ga na Isireli kei ira na Juta o Jiova ena gusudra na nona parofita kece kei ira kece na dauraivotu,+ e kaya: “Moni vakanadakuya na nomuni ivakarau ca!+ Moni muria na noqu ivakaro kei na noqu lewa me vaka na lawa kece au vakaroti ira kina na tukamuni, au tukuna tale ga vei kemuni ena gusudra na noqu dauveiqaravi na parofita.” 14  Ia era sega ni rogoca, era domoqa tiko ga me vaka na tukadra era sega ni vakabauti Jiova na nodra Kalou.+ 15  Era beca tiko ga na nona lewa kei na nona veiyalayalati+ kei na tukadra kei na nona veivakadreti e vakasalataki ira kina,+ era muria tiko ga na matakau macawa+ era lai macawa kina,+ nira muria na veimatanitu wavoliti ira e vakarota o Jiova mera kua ni muria.+ 16  Era biuta tiko ga na ivakaro kece i Jiova na nodra Kalou ra qai bulia na matakau kaukamea, e rua na luvenibulumakau+ kei na dua na duru ni sokalou,+ era cuva ina veikalokalo ni lomalagi,+ era qaravi Peali.+ 17  Era cabora tale ga na luvedra tagane kei na luvedra yalewa ena bukawaqa,+ era cakaisausau,+ era lai taroga na daurairai, ra qai soli* ira tiko ga mera cakava na ka ca ena mata i Jiova mera vakacudrui koya. 18  E mani cudruvi ira vakalevu na Isireli o Jiova qai kauti ira tani e matana.+ E sega ni vakavoca e dua, na yavusa duadua ga o Juta. 19  E sega mada ga ni muria o Juta na ivakaro i Jiova na nodra Kalou,+ era muria tale ga na ivalavala era muria na Isireli.+ 20  E biuti ira kece na kawa i Isireli o Jiova, e vakamadualaki ira qai soli ira e ligadra na dauvakacaca me yacova ni biuti ira tani e matana. 21  E kaliraki Isireli tani o koya mai na vuvale i Tevita, era qai buli Jerepoami na luvei Nipati me tui.+ Ia e vakavuna o Jerepoami mera kua ni muri Jiova na Isireli, e vakavuna mera valavala ca vakalevu. 22  Era muria tiko ga na Isireli na ivalavala ca kece e cakava o Jerepoami.+ Era sega ni biuta 23  me yacova ni kauti Isireli tani mai matana o Jiova, me vaka e tukuna ena gusudra kece na nona dauveiqaravi na parofita.+ E mani kau vakavesu o Isireli mai na nona vanua i Asiria,+ era tiko kina me yacova na siga qo. 24  Oti e kau tamata mai o tui Asiria mai Papiloni, mai Kuca, mai Ava, mai Emaci kei Sifavemi+ me vakatikori ira ena koro e Samaria mera sosomitaki ira na Isireli, era taukeni Samaria sara, era vakaitikotiko ena kena koro. 25  Era sega ni sokaloutaki Jiova nira tekivu vakaitikotiko e kea. E mani tala vei ira o Jiova na laione,+ e vakamatea eso na tamata. 26  E tukuni vei tui Asiria: “Na veimatanitu oni kauta vakavesu moni vakatikora ena koro e Samaria era sega ni kila na ivakarau ni nona qaravi na Kalou ni vanua. E mani tala tiko ga vei ira na laione, e vakamatei ira tiko ni sega ni dua e kila na ivakarau ni nona qaravi na Kalou ni vanua.” 27  E vakarota sara o tui Asiria: “Me lesu i kea e dua na bete oni a kauta vakavesu mai kea, me lai tiko kina me vakavulici ira ena ivakarau ni nona qaravi na Kalou ni vanua.” 28  E mani lako e dua na bete era kauta vakavesu mai Samaria me lai tiko e Peceli,+ e qai vakavulici ira mera sokaloutaki Jiova.+ 29  Ia era dui bulia na veimatanitu na nodra kalou era qai biuta ena vale ni sokalou ena vanua cecere era tara na kai Samaria, era dui cakava qori na veimatanitu ena koro era tiko kina. 30  Era mani buli Sukocipinoci o ira na kai Papiloni, era buli Nakali o ira na kai Kuca, era buli Esima o ira na kai Emaci,+ 31  era buli Nipasi kei Taritaki o ira na Avimi. Era dau vakama na luvedra na kai Sifavemi ena bukawaqa vei Etirameleki kei Anameleki, na nodra kalou na kai Sifavemi.+ 32  Era sokaloutaki Jiova, ia era lesi ira na lewenivanua wale me nodra bete ni vanua cecere, era qai qaravi ira ena vale ni sokalou ena vanua cecere.+ 33  Era sokaloutaki Jiova, ia era qarava na nodra dui kalou me vaka na ivakarau ni nodra sokalou na veimatanitu era kau vakavesu kina.+ 34  Era muria na ivakarau ni nodra sokalou e liu me yacova mai na siga qo. E sega ni dua vei ira e qaravi Jiova, e sega ni dua e muria na nona lewa, na nona vakatulewa, na Lawa, kei na ivakaro e vakarota o Jiova vei ira na luvei Jekope, e veisautaka na yacana me o Isireli.+ 35  Ni veiyalayalati kei ira o Jiova,+ e vakaroti ira: “Moni kua ni sokaloutaka* eso tale na kalou, moni kua ni cuva vei ira se qaravi ira, se vakacaboisoro vei ira.+ 36  Ia moni sokaloutaki*+ Jiova ga, o koya e kauti kemuni cake mai na vanua o Ijipita ena kaukaua levu kei na ligana e dodo tu,+ moni cuva vua, moni vakacaboisoro ga vua. 37  Moni muria vinaka tiko ga na lewa, na vakatulewa, na Lawa, kei na ivakaro e vola me baleti kemuni,+ moni kua ni qarava* eso tale na kalou. 38  Moni kua ni guilecava na noqu veiyalayalati kei kemuni,+ moni kua ni qarava* eso tale na kalou. 39  Moni sokaloutaki* Jiova ga na nomuni Kalou, ni o koya ga ena vakabulai kemuni mai na ligadra kece na kemuni meca.” 40  Ia era sega ni talairawarawa, era muria na ivakarau ni nodra sokalou e liu.+ 41  Era rerevaki Jiova na veimatanitu qo,+ era qarava tale ga na nodra ivakatakarakara ceuti. Era muria na luvedra kei na makubudra na ka era cakava na tukadra me yacova mai na siga qo.

iVakamacala e ra

Na “iloloma” qo e rairai dua na mataqali ivakacavacava.
Oya ena vanua kece, e lewe lailai se lewe levu.
Raica na iVakamacala ni Vosa.
Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
Ipe., “volitaki.”
Ipe., “rerevaka.”
Ipe., “rerevaki.”
Ipe., “rerevaka.”
Ipe., “rerevaka.”
Ipe., “rerevaki.”