iKarua ni Tui 16:1-20
16 Ena ika17 ni yabaki i Pika na luvei Rimalaia, sa qai tui o Easi+ na luvei Tui Jocame e Juta.
2 E tui o Easi ni sa yabaki 20, e veiliutaki e Jerusalemi me 16 na yabaki. E sega ni cakava na ka e donu ena mata i Jiova na nona Kalou me vaka e cakava o Tevita na tukana.+
3 Ia e muria na nodra ivalavala na tui Isireli,+ e cabora mada ga na luvena ena bukawaqa+ me vaka na nodra ivalavala vakasevaki na veimatanitu+ e cemuria o Jiova e matadra na Isireli.
4 E cabora tale tiko ga na isoro kei na isoro kubou ena vanua cecere,+ ena veidelana, kei na ruku ni kau bulabula kece.+
5 E qai lako cake o Tui Risini e Siria kei Pika na luvei Rimalaia na tui Isireli me rau valuti Jerusalemi.+ Erau viribaiti Easi, ia erau sega ni valuta rawa na koro.
6 Ena gauna oya e vakasukai Elaci+ vei Itomi o Tui Risini e Siria, oti e cemuri ira na Jiu* mai Elaci. Era curu yani e Elaci na kai Itomi mera tiko kina me yacova mai na siga qo.
7 E mani tala eso na italai o Easi vei Tui Tikilaci-pileseri+ e Asiria, e kaya: “O yau na nomu dauveiqaravi kei na luvemu. Mo lako cake mai mo vakabulai au mai na liga i tui Siria kei na liga i tui Isireli erau valuti au tiko.”
8 E qai kauta mai o Easi na siliva kei na koula e kune ena vale i Jiova kei na valeniyau ena valenitui qai vakauta vua na tui Asiria me vaqumi koya kina.+
9 E rogoca o tui Asiria na nona kerekere mani lako cake i Tamasiko me valuta qai kauti ira vakavesu na lewena i Kiri,+ e vakamatei Risini tale ga.+
10 E qai lako o Tui Easi me tavaki Tui Tikilaci-pileseri e Asiria mai Tamasiko. Ni raica na icabocabonisoro e tiko e Tamasiko, e mani vakauta o Tui Easi vei Uraija na bete na peleni ni icabocabonisoro e vakaraitaka na kena itaratara kei na kena icakacaka.+
11 E tara o Uraija+ na bete na icabocabonisoro+ me vaka na idusidusi kece e vakauta yani o Tui Easi mai Tamasiko. E vakaotia qori o Uraija na bete ni bera ni lesu mai Tamasiko o Tui Easi.
12 Ni lesu mai Tamasiko na tui e raica sara na icabocabonisoro, e torova yani na icabocabonisoro me vakacaboisoro kina.+
13 E cabora tiko ga ena icabocabonisoro qori na nona isoro kama kei na nona isoro kakana, e livia tale ga kina na nona isoro livi qai kureitaka kina na dra ni nona isoro ni veiyaloni.
14 E tokia na icabocabonisoro kopa+ e tiko ena mata i Jiova mai na kena vanua donuya na mata ni vale, ena maliwa ni nona icabocabonisoro kei na vale i Jiova, e lai biuta ena yasana ina vualiku ni nona icabocabonisoro.
15 E vakaroti Uraija+ na bete o Tui Easi: “Mo vakama ena icabocabonisoro levu na isoro kama ena mataka+ vaka tale ga kina na isoro kakana+ ena yakavi, na nona isoro kama na tui kei na nona isoro kakana, vaka kina na nodra isoro kama na lewenivanua, na nodra isoro kakana kei na nodra isoro livi. Mo kureitaka tale ga kina na dra kece ni isoro kama kei na dra kece ni isoro tale eso. Ia na icabocabonisoro kopa au na qai lewa na ka me caka kina.”
16 E vakayacora o Uraija na bete na ka kece e vakarota o Tui Easi.+
17 E talaka tale ga vakamatailalai o Tui Easi na lalaga ni qiqi+ qai kauta tani mai kina na beseni,+ e biuta sobu na Wasawasa e toka e dakudratou na bulumakau kopa+ e taura tiko qai biuta ena dua na raravatu.+
18 E kauta tani mai na vale i Jiova na ivakaruru ni Siga ni Vakacecegu e tu e lomanivale kei na katuba e dau muria na tui, e cakava qori ena vuku i tui Asiria.
19 Na vo ni itukutuku me baleti Easi, na ka e cakava, e volai ena ivola ni itukutuku ni nodra gauna na tui Juta.+
20 E qai davo kei ira na tukana o Easi, e bulu vata kei ira na tukana ena Koro i Tevita, e tui sara o Esekaia*+ na luvena me sosomitaki koya.
