iKarua ni Tui 15:1-38
15 Ena ika27 ni yabaki nei Tui Jerepoami* e Isireli, sa qai tui+ o Asaraia*+ na luvei Tui Emasia+ e Juta.
2 E tui ni sa yabaki 16, e veiliutaki e Jerusalemi me 52 na yabaki. Na yaca i tinana o Jikolaia mai Jerusalemi.
3 E vakayacora tiko ga na ka e donu ena mata i Jiova me vaka na ka kece e cakava o Emasia na tamana.+
4 E sega ga ni kau tani na vanua cecere,+ era cabora tiko ga na lewenivanua na isoro kei na isoro kubou ena vanua cecere.+
5 E totogitaka na tui o Jiova, e vukavuka tiko ga+ me yacova na siga e mate kina, e duatani na vale e tiko kina,+ ni lewa tiko na vale* na luvenitui o Jocame,+ e lewai ira na lewenivanua.+
6 Na vo ni itukutuku me baleti Asaraia,+ na ka kece e cakava, e volai ena ivola ni itukutuku ni nodra gauna na tui Juta.
7 E qai davo kei ira na tukana o Asaraia, era buluti koya kei ira na tukana+ ena Koro i Tevita, e tui sara o Jocame na luvena me sosomitaki koya.
8 Ena ika38 ni yabaki nei Tui Asaraia+ e Juta, sa qai tui Isireli o Sakaraia+ na luvei Jerepoami mai Samaria, e veiliutaki me ono na vula.
9 E vakayacora na ka ca ena mata i Jiova me vaka ga era cakava na tukana. E sega ni biuta na ivalavala ca i Jerepoami na luvei Nipati e vakavuna mera valavala ca kina na Isireli.+
10 E qai bukiveretaki koya o Salumi na luvei Jepesi, e mokuti koya+ e Ipiliami.+ Ni sa vakamatei koya, e tui sara me sosomitaki koya.
11 Na vo ni itukutuku me baleti Sakaraia, e volai ena ivola ni itukutuku ni nodra gauna na tui Isireli.
12 E vakayacori kina na vosa i Jiova a tukuna vei Jeu: “Era na dabe ena idabedabe vakaturaga e Isireli+ o ira na luvemu me yacova na ikava ni itabatamata.”+ E yaco dina qori.
13 E tui o Salumi na luvei Jepesi ena ika39 ni yabaki nei Tui Usaia+ e Juta, e veiliutaki mai Samaria me dua taucoko na vula.
14 E lako cake mai Tirisa o Minemi na luvei Katai+ me lako i Samaria qai mokuti Salumi+ na luvei Jepesi e Samaria. Ni sa vakamatei koya, e tui sara me sosomitaki koya.
15 Na vo ni itukutuku me baleti Salumi kei na vere a bukia, e volai ena ivola ni itukutuku ni nodra gauna na tui Isireli.
16 Oti e biuti Tirisa o Minemi qai ravuti Tifisa, na ka kece e tu kina, kei na kena veivanua nira sega ni dolava vua na kena matamata. E ravuta, e seleseleta tale ga na yalewa bukete era tiko kina.
17 Ena ika39 ni yabaki nei Tui Asaraia e Juta, e tui Isireli sara o Minemi na luvei Katai, e veiliutaki me tini na yabaki mai Samaria.
18 E vakayacora tiko ga na ka ca ena mata i Jiova. E sega ni biuta na ivalavala ca kece i Jerepoami na luvei Nipati e vakavuna mera valavala ca kina na Isireli+ ena nona gauna kece.
19 E lako yani ena vanua o Tui Puli+ e Asiria, e mani solia vei Puli o Minemi e 1,000 na taledi* siliva me tokoni koya me vakataudeitaki vua na matanitu.+
20 E mani kumuna o Minemi na siliva mai Isireli ni lavaka vei ira na turaga rogo, era vutuniyau.+ Era dui solia e 50 na sikeli* siliva me soli vua na tui Asiria. E qai lesu na tui Asiria, e sega ni tiko tale ena vanua.
21 Na vo ni itukutuku me baleti Minemi,+ na ka kece e cakava, e volai ena ivola ni itukutuku ni nodra gauna na tui Isireli.
22 E qai davo vata kei ira na tukana o Minemi, e tui sara o Pikaya na luvena me sosomitaki koya.
23 Ena ika50 ni yabaki nei Tui Asaraia e Juta, sa qai tui Isireli mai Samaria o Pikaya na luvei Minemi, e veiliutaki me rua na yabaki.
24 E vakayacora tiko ga na ka ca ena mata i Jiova. E sega ni biuta na ivalavala ca i Jerepoami na luvei Nipati e vakavuna mera valavala ca kina na Isireli.+
25 E qai bukiveretaki koya o Pika+ na luvei Rimalaia na nona turaganivalu, e mokuti koya mai Samaria ena valececere ni valenitui, kei Arikopi kei Eraie. Era tokoni Pika e le 50 na tamata mai Kiliati, ni vakamatei koya oti e tui sara me sosomitaki koya.
26 Na vo ni itukutuku me baleti Pikaya, na ka kece e cakava, e volai ena ivola ni itukutuku ni nodra gauna na tui Isireli.
27 Ena ika52 ni yabaki nei Tui Asaraia e Juta, sa qai tui Isireli o Pika+ na luvei Rimalaia mai Samaria, e veiliutaki me 20 na yabaki.
28 E vakayacora tiko ga na ka ca ena mata i Jiova, e sega ni biuta na ivalavala ca i Jerepoami na luvei Nipati e vakavuna mera valavala ca kina na Isireli.+
29 Ena gauna i Tui Pika e Isireli, e lako yani o Tui Tikilaci-pileseri+ e Asiria me ravuti Aijoni, Epeli-pecimeaka,+ Janoa, Ketesi,+ Asori, Kiliati+ kei Kalili, na vanua kece vakaNafitalai,+ e kauti ira vakavesu na lewena i Asiria.+
30 E qai bukiveretaki Pika na luvei Rimalaia o Osia+ na luvei Ela, e mokuti koya qai vakamatea, e tui sara me sosomitaki koya ena ika20 ni yabaki i Jocame+ na luvei Usaia.
31 Na vo ni itukutuku me baleti Pika, na ka kece e cakava, e volai ena ivola ni itukutuku ni nodra gauna na tui Isireli.
32 Ena ikarua ni yabaki i Pika na luvei Rimalaia na tui Isireli, sa qai tui o Jocame+ na luvei Tui Usaia+ e Juta.
33 E tui ni sa yabaki 25, e veiliutaki e Jerusalemi me 16 na yabaki. Na yaca i tinana o Jirusa na luvei Setoki.+
34 E vakayacora tiko ga na ka e donu ena mata i Jiova me vaka e cakava o Usaia na tamana.+
35 E sega ga ni kau tani na vanua cecere, era cabora tiko ga na lewenivanua na isoro kei na isoro kubou ena vanua cecere.+ O koya ga e tara na matamata e cake ni vale i Jiova.+
36 Na vo ni itukutuku me baleti Jocame, na ka e cakava, e volai ena ivola ni itukutuku ni nodra gauna na tui Juta.
37 Ena gauna oya e tekivu talai Risini na tui Siria kei Pika+ na luvei Rimalaia o Jiova me rau valuti Juta.+
38 E qai davo kei ira na tukana o Jocame, e bulu vata kei ira na tukana ena Koro i Tevita na tukana. E tui sara o Easi na luvena me sosomitaki koya.
iVakamacala e ra
^ Kena ibalebale “Veivuke o Jiova.” E kacivi me o Usaia ena 2Tu 15:13, 2Ve 26:1-23, Ais 6:1, kei na Sak 14:5.
^ Oya o Jerepoami na iKarua.
^ Se “valenitui.”
^ Dua na taledi e tautauvata kei na 34.2 na kilokaramu (1,101 na onisi). Raica na iKuri B14.
^ Dua na sikeli e tautauvata kei na 11.4 na karamu (0.367 na onisi). Raica na iKuri B14.
