iKarua ni Tui 10:1-36
10 Era tiko mai Samaria e 70 na tagane era luvei Eapi.+ E mani vola o Jeu eso na ivola me vakau i Samaria vei ira na turaga ni Jesirieli, vei ira na qase,+ kei ira na susugi ira na luvei Eapi,* e kaya:
2 “Ni yaco yani vei kemuni na ivola qo, era tiko vata kei kemuni na luvedra na nomuni turaga, na qiqinivalu, na ose, e dua na koronivalu kei na iyaragi.
3 Moni digitaka e dua e vinaka duadua vei ira na luve ni nomuni turaga e ganita vinaka,* me vakadaberi ena idabedabe vakaturaga i tamana. Moni qai valataka na vuvale ni nomuni turaga.”
4 Ia dua na ka nodra rere, era kaya: “Raica! Ke rau sega mada ga ni tu rawa e matana e rua na tui,+ eda na tudei vakacava?”
5 E mani vakauitukutuku vei Jeu o koya e lewa tiko na valenitui, o koya e lewa tiko na koro, o ira na qase, kei ira na veiqaravi tiko: “Keimami nomuni dauveiqaravi ga, keimami na cakava na ka kece oni tukuna. Keimami na sega ni bulia e dua na tui. Moni cakava ga na ka e vinaka e matamuni.”
6 E vola tale vei ira na ikarua ni ivola, e kaya: “Ke oni tokoni au moni muria na ka au tukuna, moni kauta mai na uludra na luvei nomuni turaga, moni lako mai vei au e Jesirieli ena gauna vata qo nimataka.”
Ia o ira na 70 na luvena na tui, era tiko vata kei ira na turaga dokai ena koro era susugi ira.
7 Nira taura ga na ivola, era kauti ira sara na luvenitui ra qai vakamatei ira, era le 70 na tagane,+ era biuta na uludra ena basikete mera vakauta vua i Jesirieli.
8 E curu i loma na italai me tukuna vua: “Era sa kauta mai na uludra na luvenitui.” E kaya o koya: “Moni binia me rua na ibinibini ena matamatanikoro me yacova na mataka.”
9 Ni lako yani o koya ena mataka, e duri e matadra kece na tamata, e kaya: “Oni sega ni cala.* Io, au bukiveretaka na noqu turaga au qai vakamatei koya,+ ia o cei e vakamatei ira kece qo?
10 Moni kila tiko ni na sega ni daro*+ e dua na malanivosa i Jiova e cavuta o Jiova me cudruvi kina na vuvale i Eapi, ni o Jiova ga e vakayacora na ka e tukuna ena gusu i Ilaija na nona dauveiqaravi.”+
11 E mokuti ira kece tale ga na vo tiko ena vuvale i Eapi mai Jesirieli o Jeu kei ira kece na nona turaga dokai, o ira na nona itokani, kei ira na nona bete,+ e sega tale ni vakavoca vua e dua me bula.+
12 E qai tucake o koya me lako i Samaria. E donuya sara na vale ni vesu sipi.*
13 E sotavi ira e kea na taci Tui Esaia+ e Juta o Jeu, e kaya vei ira, “O cei o kemuni?” Era kaya: “O keimami qo na taci Esaia, keimami lako sobu tiko me keimami taroga se ra bulabula vinaka tiko na luvenitui kei na luve ni ranadi.”*
14 E mani kaya o koya: “Moni vesuki ira bulabula!” Era mani vesuki ira bulabula ra qai vakamatei ira volekata na mataniwai ena vale ni vesu sipi, era le 42 na tamata. E sega sara ni vakabula e dua.+
15 Ni biuta mai na vanua qori erau sota sara kei Jionatapi+ na luvei Rekapi+ ni lako tiko yani me tavaki koya. Ni kidavaki* koya, e kaya vua: “E duavata* kei au na lomamu me vaka ga ni duavata na lomaqu kei na lomamu?”
E kaya o Jionatapi: “E vaka kina.”
“Ke vaka kina mo dodoka mai na ligamu.”
E mani dodoka yani vua na ligana, e dreti koya sara o Jeu ina nona qiqinivalu.
16 E kaya: “Me daru lako vata mo raica niu sega ni taleitaki ira na saqati* Jiova.”+ Erau vakavodoki koya sara ena nona qiqinivalu.
17 E qai yaco o Jeu i Samaria, e mokuti ira kece na vo tiko ena vuvale i Eapi e Samaria me vakawabokotaki ira+ me vaka na vosa i Jiova e tukuna vei Ilaija.+
18 E soqoni ira tale ga na tamata kece o Jeu qai kaya vei ira: “E qaravi Peali ga vakalailai o Eapi+ ia o Jeu ena qaravi koya vakalevu.
19 Moni kacivi ira kece mai vei au na parofita i Peali,+ o ira kece era sokaloutaki koya, kei ira kece na nona bete.+ Me kua sara ni dua e yali, niu sa vakarautaka e dua na isoro levu vei Peali. Ena sega ni bula o koya e yali.” Ia e lawaki tiko o Jeu me vakamatei ira na sokaloutaki Peali.
20 E kaya tale o Jeu: “Moni kacivaka* e dua na soqo bibi vei Peali.” Era kacivaka sara.
21 Oti oya e vakauitukutuku o Jeu e Isireli taucoko, era mani lako kece yani na dau sokalou vei Peali. Era lako kece yani, e sega ni dua e vo. Era curu ina vale* i Peali,+ e osodrigi na vale i Peali mai na dua na yasana ina dua tale.
22 E kaya vei koya e lewa tiko na rumu ni isulu: “Mo kauta mai na isulu mera dara kece na dau sokalou vei Peali.” E kauta sara yani vei ira na isulu.
23 Erau curu yani ena vale i Peali o Jeu kei Jionatapi+ na luvei Rekapi. E tukuna sara o Jeu vei ira na sokaloutaki Peali: “Ni vakaraica vinaka me kua ni maliwai kemuni tiko eke e dua e sokaloutaki Jiova, o ira ga na sokaloutaki Peali.”
24 Era qai curu yani mera cabora na isoro kei na isoro kama. Sa lesia tu o Jeu e 80 na tagane mera tiko e tuba, e tukuna: “Ke dro e dua na tamata au solia e ligamuni, o na mate me kena isosomi.”
25 Ni cabora oti ga o Jeu na isoro kama, e kaya sara vei ira na yadra* kei ira na turaganivalu: “Ni curu mai moni mokuti ira! Me kua ni dro e dua.”+ Era mokuti ira sara ena iseleiwau o ira na yadra kei ira na turaganivalu, era qai kolotaka i tuba na yagodra mate, era cakava tiko ga qori me yacova na tikina tabu* ni vale i Peali.
26 Era kauta mai tuba na duru ni sokalou+ ena vale i Peali me vakamai yadudua.+
27 Era basuka na vatu ni sokalou+ i Peali, era basuka na vale i Peali,+ era cakava me valelailai me yacova mai na siga qo.
28 E vakawabokotaki Peali gona o Jeu e Isireli.
29 Ia e sega ni biuta o Jeu na ivalavala ca i Jerepoami na luvei Nipati e vakavuna mera valavala ca kina na Isireli, oya na luvenibulumakau koula e tiko mai Peceli kei Tani.+
30 E mani kaya o Jiova vei Jeu: “Ni o muria vinaka na ka e donu e mataqu ni o vakayacora na ka kece e lomaqu ina vuvale i Eapi,+ era na dabe ena idabedabe vakaturaga e Isireli na luvemu me yacova na ikava ni itabatamata.”+
31 Ia e sega ni qarauna o Jeu me muria na Lawa i Jiova na Kalou ni Isireli ena lomana taucoko.+ E sega ni vakanadakuya na ivalavala ca i Jerepoami e vakavuna mera valavala ca kina na Isireli.+
32 Ena gauna oya e tekivu vakalailaitaki Isireli o Jiova. E ravuti ira tiko ga o Eseli ena vanua kece e Isireli,+
33 mai na tokalau ni Joritani, na vanua kece o Kiliati, o ira na Kata, o ira na Rupeni kei ira na Manasa,+ mai Aroeri volekata na Buca* o Arinoni, me yaco i Kiliati kei Pasani.+
34 Na vo ni itukutuku me baleti Jeu, na ka kece e cakava, kei na nona kaukaua kece, e volai ena ivola ni itukutuku ni nodra gauna na tui Isireli?
35 E qai davo vata kei ira na tukana o Jeu, era mani buluti koya e Samaria, e tui sara o Jioasi+ na luvena me sosomitaki koya.
36 E 28 taucoko na yabaki na dede ni nona veiliutaki o Jeu e Isireli mai Samaria.
iVakamacala e ra
^ Ipe., “ira na susugi Eapi.”
^ Se “cakadodonu.”
^ Se “Oni yalododonu.”
^ Ipe., “lutu ina qele.”
^ Qo beka na vanua e vesu kina na sipi me koti.
^ Se “marama.”
^ Se “vosa vakalougatataki.”
^ Ipe., “dodonu.”
^ Se “niu gumatua ni totaki.”
^ Ipe., “vakatabuya.”
^ Se “burekalou.”
^ Ipe., “daucici.”
^ Ipe., “na koro,” de vale taqomaki vinaka.
^ Se “Waimaca o Arinoni.”
