iKarua ni Tui 1:1-18
-
Parofisaitaka o Ilaija na mate nei Esaia (1-18)
1 Ni sa mate o Eapi e vorati Isireli o Moapi.+
2 E qai lutu o Esaia mai na isogoniqara ena nona rumu ena tabavale e cake mai Samaria mani mavoa. E talai ira na nona italai, e tukuna vei ira: “Moni lai tarogi Pealisipupi na kalou ni Ekironi+ seu na bula mai na mavoa qo se sega.”+
3 Ia e vosa na agilosi i Jiova vei Ilaija*+ na turaga ni Tisipa: “Mo tucake, mo lai tavaki ira na italai nei tui Samaria, mo kaya vei ira, ‘Sa sega na Kalou e Isireli moni lai tarogi Pealisipupi kina na kalou ni Ekironi?+
4 Qo na ka e tukuna o Jiova: “O na sega ni biuta na idavodavo o davo tiko kina, ni o na mate dina ga.”’” E lako sara yani o Ilaija.
5 Nira lesu na italai vua na tui, e kaya sara vei ira: “Na cava oni lesuva mai?”
6 Era kaya vua: “E mai tavaki keimami e dua na turaga, e kaya vei keimami, ‘Moni lako, moni lesu vua na tui e talai kemuni mai, moni tukuna vua, “Qo na ka e tukuna o Jiova: ‘Sa sega na Kalou e Isireli moni lai tarogi Pealisipupi kina na kalou ni Ekironi? O na sega ni biuta na idavodavo o davo tiko kina, ni o na mate dina ga.’”’”+
7 E tarogi ira: “E vakacava na irairai ni turaga e lako cake mai me mai sotavi kemuni qai tukuna vei kemuni na vosa qo?”
8 Era kaya vua: “E vakaisulu vutinimanumanu na turaga qo,+ e vakabeleti kulinimanumanu na tolona.”+ E kaya sara: “Qori o Ilaija na turaga ni Tisipa.”
9 E mani tala na tui vei Ilaija e dua na turaga ni le 50 kei na nona le 50. Ni lako cake yani vua, e dabe toka o Ilaija ena dela ni ulunivanua. E kaya vua: “O iko na tamata ni Kalou dina,+ e tukuna na tui, ‘Mo lako sobu mai.’”
10 Ia e kaya o Ilaija vua na turaga ni le 50: “Keu tamata ni Kalou, me lako sobu mai lomalagi na bukawaqa+ me yameci iko kei ira na nomu le 50.” E mani lako sobu mai lomalagi na bukawaqa qai yameci koya kei ira na nona le 50.
11 E tala tale na tui e dua na turaga ni le 50 kei na nona le 50. E lai kaya vua: “O iko na tamata ni Kalou dina, qo na ka e tukuna na tui, ‘Mo lako sobu mai vakatotolo.’”
12 Ia e kaya vei ira o Ilaija: “Keu tamata ni Kalou dina, me lako sobu mai lomalagi na bukawaqa me yameci iko kei ira na nomu le 50.” E mani lako sobu mai lomalagi na bukawaqa ni Kalou qai yameci koya kei ira na nona le 50.
13 E tala tale na tui na ikatolu ni nodra turaga na le 50 kei na nona le 50. Ia e lako cake na ikatolu ni nodra turaga na le 50, e tekiduru e mata i Ilaija qai vakamasuti koya, e kaya: “Kemuni na tamata ni Kalou dina, me talei mada ga e matamuni na noqu bula kei na nodra bula na le 50 na nomuni dauveiqaravi qo.
14 E lako sobu mai lomalagi na bukawaqa qai yameci rau na turaga ni le 50 kei na nodrau le 50, ia qo me talei mada ga e matamuni na noqu bula.”
15 E kaya sara vei Ilaija na agilosi i Jiova: “Mo lako sobu vata kei koya. Kua ni rerevaki koya.” E duri o Ilaija me lako sobu vata kei koya vua na tui.
16 E kaya vua na tui o Ilaija, “Qo na ka e tukuna o Jiova: ‘O talai ira na italai vei Pealisipupi na kalou ni Ekironi.+ Sa sega na Kalou e Isireli?+ Na cava o sega ni taroga kina na nona vosa? O na sega sara ni biuta na idavodavo o davo tiko kina, ni o na mate dina ga.’”
17 E mani mate me vaka na vosa i Jiova e tukuna o Ilaija, ia ni sega na luvena, e tui sara o Jorami*+ me sosomitaki koya, ena ikarua ni yabaki i Jorami+ na luvei Josafati na tui Juta.
18 Na vo ni itukutuku me baleti Esaia,+ na ka e cakava, e volai ena ivola ni itukutuku ni nodra gauna na tui Isireli.
