iKarua ni Samuela 6:1-23
6 E soqoni ira tale na sotia digitaki kece e Isireli o Tevita, era le 30,000.
2 E qai lako yani o Tevita kei ira kece na tamata era tiko vata kei koya i Pealijuta mera kauta mai kea na Kato ni Kalou dina,+ na vanua e masuti kina na yaca i Jiova ni lewe vuqa,*+ e toka e cake vei rau na jerupi.+
3 Ia era vakavodoka na Kato ni Kalou dina ena dua na kareti vou+ me kau mai na vale i Epinatapi+ e tiko e delana, erau liutaka tiko na kareti vou o Usa kei Eio, o rau na luvei Epinatapi.
4 Era kauta sara na Kato ni Kalou dina mai na vale i Epinatapi e tiko e delana, qai liutaka tiko na Kato o Eio.
5 E marau tiko o Tevita kei ira kece na vuvale ni Isireli ena mata i Jiova nira vakayagataka na veimataqali ivakatagi e caka ena kau junipa, na api, eso tale na ivakatagi vakawa,+ na tibereli,+ na sibali,+ kei na so tale na iyaya ni vakatagi.
6 Ia nira yaco ina rara ni butu covuata nei Nakoni, e dodoka na ligana o Usa qai taura+ na Kato ni Kalou dina, ni voleka ni vakalutuma na bulumakau.
7 E waqa sara ga na cudru i Jiova vei Usa qai mokuti koya+ e kea na Kalou dina ena nona veibeci,+ mani mate e kea volekata na Kato ni Kalou dina.
8 E rarawataka o Tevita ni yaviti Usa o Jiova ena dela ni cudru, e qai vakatokai na vanua oya me o Peresiusa* me yacova mai na siga qo.
9 E qai rerevaki Jiova+ o Tevita ena siga oya, e kaya: “Ena kau mai vakacava vei au na Kato i Jiova?”+
10 E sega ni via kauta o Tevita na Kato i Jiova ena vanua e tiko kina o koya ena Koro i Tevita.+ E kauta ga o Tevita ina vale i Opeti-itomi+ na kai Kaca.
11 E tiko ga na Kato i Jiova ena vale i Opeti-itomi na kai Kaca me tolu na vula, e vakalougatataki Opeti-itomi tiko ga o Jiova kei ira kece na nona vuvale.+
12 E tukuni sara vei Tui Tevita: “E vakalougatataka o Jiova na vuvale i Opeti-itomi kei na ka kece e nona ena vuku ni Kato ni Kalou dina.” E lako sara o Tevita me kauta mai na Kato ni Kalou dina ena vale i Opeti-itomi me kauta cake ena marau levu+ ina Koro i Tevita.
13 Nira kalawa vakaono na colata tiko+ na Kato i Jiova, e cabora o koya e dua na bulumakau tagane kei na dua na manumanu yagovinaka.
14 E meke wavoki tiko ena nona kaukaua taucoko o Tevita ena mata i Jiova, e tokara tiko o Tevita e dua na efoti lineni.+
15 E kauta cake tiko o Tevita kei na vuvale taucoko ni Isireli na Kato+ i Jiova nira kaila ena reki,+ era uvuca tale tiko ga na davui.*+
16 Ia ni yaco na Kato i Jiova ena Koro i Tevita, e rai sobu mai na katubaleka o Maikali+ na luvei Saula qai raici Tui Tevita ni ladelade qai meke wavoki tiko e mata i Jiova, e beci koya sara e lomana.+
17 Era mani kauta i loma na Kato i Jiova ra qai biuta ena kena vanua ena loma ni valelaca e birika o Tevita me biu kina.+ Oti e cabora o Tevita na isoro kama+ kei na isoro ni veiyaloni+ ena mata i Jiova.+
18 Ni cabora oti o Tevita na isoro kama kei na isoro ni veiyaloni, e qai vosa vakalougatataki ira na tamata ena yaca i Jiova ni lewe vuqa.
19 E vota tale ga vei ira kece na tamata, vei ira taucoko na ilala levu ni Isireli, na tagane kei na yalewa mera yadua na ibuli madrai e vaka na mama, na keke vuaniniuniu, kei na ibuli vuanivaini rabaraba sigani, oti era veisukayaki na tamata ina nodra dui vale.
20 Ni lesu o Tevita me vosa vakalougatataka na nona vuvale, e qai lako mai o Maikali+ na luvei Saula me tavaki koya. E kaya: “E lagilagi dina na tui ni Isireli ni luvata na nona isulu nikua e matadra na goneyalewa bobula ni nona vakailesilesi, me vaka ga ni luvata na nona isulu e dua na tamata ululala!”+
21 E kaya sara vei Maikali o Tevita: “Au soqo tiko ena mata i Jiova, o koya e digitaki au, e lesi au meu liutaki ira na tamata i Jiova na Isireli,+ e sega ni digitaki tamamu kei ira kece na lewe ni nona vuvale. Au na marau gona ena mata i Jiova,
22 au na beci au sara ni vakatauvatani kei na ka qo, au na vakalolovirataki au sara. Ia era na vakalagilagi au na goneyalewa bobula o tukuna tiko.”
23 E mani sega ni vakaluveni o Maikali+ na luvei Saula me yacova na siga e mate kina.
