iKarua ni Samuela 14:1-33

  • O Joapi kei na marama ni Tikoa (1-17)

  • Kila o Tevita na inakinaki nei Joapi (18-20)

  • Vakadonui me lesu mai o Apisalome (21-33)

14  E kila o Joapi na luvei Seruaia+ ni malele tiko na lomana na tui vei Apisalome.+  E talatala sara o Joapi i Tikoa+ me kacivi mai kina e dua na marama qaseqase qai kaya vua: “Yalovinaka, mo dara na isulu ni lolosi me vaka e dua e lolosi tiko, mo kua ni lumu ena waiwai.+ Mo vaka sara ga e dua na marama e lolositaka vakabalavu e dua sa mate.  Mo lako vua na tui qai tukuna qo.” E tukuna sara vua o Joapi na ka me lai kaya.  E lako vua na tui na marama ni Tikoa, e cuva ina qele qai davo vakatoboicu, e kaya: “Ni vukei au, kemuni na tui!”  E kaya na tui: “Na cava e leqa?” E kaya na marama: “Oilei, au sa yada, sa mate na watiqu.  E rua tiko na luvena tagane na nomuni dauveiqaravi, rau qai veivala ena were. E sega ni dua me tataro, e mokuti kena ikarua e dua vei rau mani mate.  Ia era lako kece yani na lewe ni vuvale mera cudruva na nomuni dauveiqaravi, era kaya tiko, ‘Soli koya mai a mokuti tacina me keimami vakamatei koya ena vuku ni bula i tacina a vakamatea,+ ke mani vakawabokotaki kina na kawa!’ Era na bokoca na qilaiso waqa au vakavoca tiko,* me kua ni dua na yaca se kawa e vo vei watiqu e dela i vuravura.”  E kaya sara na tui vua na marama qo: “Lako i nomu vale, au na qai vakataulewa ena vukumu.”  E mani kaya na marama ni Tikoa qo vua na tui: “Kemuni na noqu turaga na tui me bale ga vei au kei na vuvale i tamaqu na cala qo, me kua ni cala kina na tui kei na nona itikotiko vakaturaga.” 10  E qai kaya na tui: “Ke dua e vosa tale vei iko, kauti koya mai vei au, ena sega tale ni vakararawataki iko.” 11  E qai kaya na marama: “Kemuni na tui, moni nanumi Jiova mada ga na nomuni Kalou, me kua kina ni veivakarusai o koya e nona itavi me sauma na dra,+ me kua tale ga ni vakamatea na luvequ.” E kaya sara vua na tui: “Me vaka ni bula dina tiko o Jiova,+ ena sega ni lutu ina qele e dua na drauniulu i luvemu tagane.” 12  E kaya na marama: “Me vosa mada na nomuni dauveiqaravi vua na noqu turaga na tui.” E kaya na tui: “Vosa mai!” 13  E kaya na marama: “Na cava oni via cakava kina na ka qo vei ira na tamata ni Kalou?+ Ni vosa va qori na tui ena cala ga kina, ni na sega ni kauta lesu mai na tui na luvena tagane e vakasavi.+ 14  Eda na mate dina ga me vaka na wai e tasova ina qele qai sega ni kumuni rawa tale. Ia ena sega ni kauta tani na Kalou na nona bula e dua, e kila tale ga na sala me vakalesuya mai kina e dua e vakasava. 15  Au mai tukuna na ka qo vua na noqu turaga na tui nira vakarerei au na lewenivanua. E kaya gona na nomuni dauveiqaravi, ‘Yalovinaka, meu vosa vua na tui. De dua ena cakava na tui na ka e kerea na nona bobula. 16  Me vakarorogo mada ga na tui me vakabula na nona bobula mai na ligana na tamata e saga me vakarusai au kei na luvequ, mai na ivotavota e solia na Kalou.’+ 17  E kaya sara na nomuni dauveiqaravi, ‘Me vakacegui au mada ga na nona vosa na noqu turaga na tui,’ ni vaka ga e dua na agilosi ni Kalou dina na noqu turaga na tui, ni vakaduiduitaka na ka vinaka mai na ka ca. Me tokoni kemuni mada ga o Jiova na nomuni Kalou.” 18  E kaya na tui vua na marama: “Yalovinaka, kua ni vunia vei au e dua na ka au tarogi iko kina.” E kaya na marama: “Me vosa mada mai na noqu turaga na tui.” 19  E qai taroga na tui: “E tokoni iko o Joapi ena ka kece qo?”+ E sauma na marama: “Me vaka ni oni bula dina tiko kemuni na noqu turaga na tui, e dina* na ka e tukuna na noqu turaga na tui, o Joapi ga na nomuni dauveiqaravi e vakaroti au, e tukuna tale ga vua na nomuni dauveiqaravi na ka kece me kaya. 20  E cakava qo na nomuni dauveiqaravi o Joapi me veisautaka na veika e yaco, ia e vuku na noqu turaga me vaka na vuku ni agilosi ni Kalou dina me kila na ka kece ena vanua.” 21  Oti e tukuna na tui vei Joapi: “Sa vinaka, au na cakava qo.+ Lako, lai kauta lesu mai na cauravou o Apisalome.”+ 22  E cuva sara ina qele o Joapi, e davo vakatoboicu me vakavinavinaka vua na tui. E kaya o Joapi: “Kemuni na noqu turaga na tui, e qai kila nikua na nomuni dauveiqaravi ni oni nanumi au e matamuni, ni vakayacora na tui na ka e kerea na nona dauveiqaravi.” 23  Oti oya e tucake o Joapi, e lako i Kesuri+ me kauti Apisalome i Jerusalemi. 24  Ia e kaya na tui: “Me lesu ga ina nona vale, me kua ni raica na mataqu.” E lesu sara o Apisalome ina nona vale, e sega ni raica na matana na tui. 25  E sega ni dua e Isireli taucoko me qoroi vakalevu na kena totoka me vakataki Apisalome. E sega ni dua na ka e vakamelei rawa mai na qeteqeteniyavana ina buradelana. 26  Ni kotiva na uluna, e dau kotiva ni cava na yabaki ni sa rui bi vua, na bi ni drauniuluna e 200 na sikeli* ena ivakarau ni bibi ni vatu* ena valenitui. 27  E qai sucu e tolu na luvena tagane o Apisalome,+ e dua tale ga na luvena yalewa na yacana o Tema. E marama totoka dina. 28  E tiko ga e Jerusalemi o Apisalome me rua vinaka na yabaki qai sega ni raica na matana na tui.+ 29  E kacivi Joapi sara o Apisalome me talai koya vua na tui, ia e sega ni via lako yani vua. E talatala tale ena ikarua ni gauna, e sega tiko ga ni via lako yani. 30  E qai tukuna o Apisalome vei ira na nona dauveiqaravi: “Na tikiniqele nei Joapi e toka volekata na noqu, e tu kina eso na varile. Dou lai vakama.” Era vakama sara na dauveiqaravi i Apisalome na tikiniqele oya. 31  E tucake o Joapi qai lako ina vale nei Apisalome, e kaya vua: “Na cava era vakama kina na noqu tikiniqele na nomu dauveiqaravi?” 32  E kaya vei Joapi o Apisalome: “Raica! Au a talatala yani vei iko, ‘Lako mai meu talai iko vua na tui, mo taroga: “Na cava au lai kau mai kina e Kesuri?+ E vinaka ga meu a tiko ga mai kea. Ia qo meu raica na matana na tui, keu cala me vakamatei au.”’” 33  E mani lako o Joapi vua na tui me tukuna vua. E kacivi Apisalome sara na tui, e lako yani vua o koya, e davo vakatoboicu e matana qai cuva ina qele e matana na tui. E reguci Apisalome+ sara na tui.

iVakamacala e ra

Oya na iotioti ni kawa e nuitaki.
Se “sega ni dua e lako rawa ina imawi se imatau ena.”
Rauta ni 2.3 na kilokaramu (5 na paudi). Raica na iKuri B14.
Qo beka na ivakarau tudei e vakayagataki ena valenitui, se na sikeli ena “valenitui” e duidui mai na sikeli e dau vakayagataki raraba.