iKarua ni Samuela 1:1-27

  • Rogoca o Tevita ni sa mate o Saula (1-16)

  • Sere ni lolosi nei Tevita me baleti Saula kei Jonacani (17-27)

1  Ni sa mate o Saula, e lesu mai o Tevita ena nona vakadrukai* ira na Amalekaiti, e tiko e Sikilaki+ o Tevita me rua na siga.  Ena ikatolu ni siga, e lako mai na keba nei Saula e dua na tamata, e kadresu na nona isulu, e tu e uluna na qele. Ni lako yani vei Tevita, e tekicuva ina qele qai davo vakatoboicu.  E tarogi koya o Tevita: “O lako mai vei?” E kaya o koya: “Au dro mai na nodra keba na Isireli.”  E tarogi koya o Tevita: “Na cava e yaco? Yalovinaka, tukuna mai vei au.” E kaya sara vua: “Era dro mai na ivalu na tamata, e levu tale ga era balemate. Erau mate mada ga o Saula kei Jonacani na luvena.”+  E qai taroga o Tevita na cauravou e lai tukutuku vua: “O kila vakacava ni sa mate o Saula kei Jonacani na luvena?”  E kaya vua na cauravou: “Au lako yani ena Ulunivanua o Kilipoa,+ e tiko kina o Saula e ravita tu na nona moto, sa ra volekati koya na qiqinivalu kei ira na dauvodo ose.+  Ni vuki mai o koya e raici au sara, e kacivi au, au qai kaya, ‘O yau qo!’  E tarogi au, ‘O cei o iko?’ Au kaya vua, ‘O yau e dua na Amalekaiti.’+  E qai kaya o koya, ‘Yalovinaka, mai duri e yasaqu mo vakamatei au, au sa rarawa vakalevu niu se bula tiko.’ 10  Au mani lai tu e yasana, au vakamatei koya sara+ niu kila ni na sega ni bula, ni sa bale i ra, sa mavoa tu. Au qai taura mai na isala vakatui e toka e uluna kei na qato e dara toka e ligana, meu kauta mai ke vua na noqu turaga.” 11  E taura sara na nona isulu o Tevita qai dresulaka, era cakava tale ga qori o ira kece na tiko vata kei koya. 12  Era tagilagalaga, era tagi ra qai lolo+ ena vuku i Saula, o Jonacani na luvena, o ira na tamata i Jiova, kei na vuvale ni Isireli+ me yacova na yakavi nira bale ena iseleiwau. 13  E taroga o Tevita na cauravou e lai tukutuku vua: “O iko mai vei?” E kaya: “O yau na luve ni vulagi, na Amalekaiti.” 14  E qai tukuna vua o Tevita: “Na cava o sega ni rere kina mo dodoka na ligamu mo vakamatea na lumuti i Jiova?”+ 15  E kaciva sara e dua na cauravou o Tevita, e kaya: “Toso i liu mo mokuti koya.” E mokuti koya sara me mate.+ 16  E tukuna vua o Tevita: “Sa baleti iko ga na nomu mate, ni vakacalai iko na gusumu ni o kaya, ‘Au vakamatea sara ga na lumuti i Jiova.’”+ 17  E mani lagata o Tevita na sere ni lolosi qo vei Saula kei Jonacani+ na luvena 18  qai kaya mera vakavulici na Juta ena sere ni lolosi e vakatokai “Na Dakaititi,” e volai ena ivola i Jaeseri:+ 19  “Kemuni Isireli, era balemate na tamata totoka ena nomuni vanua cecere.+ Era balemate o ira na qaqa! 20  Moni kua ni tukuna e Kaca,+Moni kua ni kacivaka ena gaunisala e Asikiloni,De ra na marau vakalevu na nodra goneyalewa na kai Filisitia,De ra na reki kina na nodra goneyalewa na tamata tawacili. 21  O kemuni na ulunivanua e Kilipoa,+Me kua na tegu se uca e tauci kemuni,Se were e vuataka na ka me cautaki vua na Kalou,+Ni vakawaletaki e kea na nodra isasabai na tamata qaqa,Na isasabai nei Saula sa sega tale ni lumu ena waiwai. 22  Mai na nodra dra na vakamatei, mai na nodra uro na tamata qaqa,E sega ni gole tani na dakaititi nei Jonacani,+Qai sega ni lesu wale na iseleiwau i Saula.+ 23  O Saula kei Jonacani+ erau dauloloma rau qai yalovinaka ni rau se bula,Erau sega ni tawase ni rau mate.+ Erau totolo sara vei ira na ikeli,+Erau kaukaua sara vei ira na laione.+ 24  O kemuni na goneyalewa ni Isireli, moni tagicaki Saula,O koya e vakaisulutaki kemuni ena isulu damudamu kei na iukuuku,O koya e vakaiukuukutaka na nomuni isulu ena koula. 25  Era bale na qaqa ena ivalu! E balemate o Jonacani ena nomuni vanua cecere!+ 26  Au rarawa vakalevu ena vukumu, taciqu Jonacani,O rui talei vei au.+ E talei sara nomu lomani au ni vakatauvatani kei na nodra loloma na yalewa.+ 27  Era bale na qaqaQai rusa na iyaragi ni ivalu!”

iVakamacala e ra

Se “mokuti.”