iKarua ni iVola Vei Ira mai Korinica 5:1-21
5 Eda kila ke rusa+ na valelaca qo, na noda vale e vuravura, ena solia na Kalou e dua na noda vale, na vale e sega ni caka ena liga,+ e tawamudu mai lomalagi.
2 Eda vutugu dina ena vale qo da qai vinakata sara ga meda tokara na kena ena soli vei keda mai lomalagi,+
3 nida sa na tokara, eda na sega ni luvawale.
4 O koya gona, o keda eda tokara tiko na valelaca qo eda vutugu, eda oca, nida sega ni via luvata laivi, eda vinakata ga meda tokara na kena tale adua,+ me sosomitaki kina na ka e matemate rawarawa ena bula.+
5 Na Kalou+ sara ga e vakarautaki keda ena veika qo, e solia vei keda na yalo tabu me ivakadei ni ka ena qai muri mai.+
6 Oya na vuna eda yaloqaqa tiko ga kina, eda kila tale ga ni gauna e noda vale voli kina na yago, eda sa yawaki koya na Turaga,+
7 nida lako voli ena vakabauta, sega ena ka e raica na matada.
8 Ia eda yaloqaqa da qai bolea meda yawaka na yagoda meda lai vakaitikotiko vata kei na Turaga.+
9 O koya gona, e noda isausau me vakadonui keda o koya—se da vakaitikotiko vata kei koya, se da yawaki koya.
10 Nida na rairai kece ena mata ni idabedabe ni veilewai i Karisito, meda vakaicovitaki yadua me vaka na noda ivalavala nida se vakayago, me salavata kei na ka eda dui cakava, se vinaka se ca.+
11 Na neitou kila ni dodonu me keitou rerevaka na Turaga, keitou vakauqeti ira kina eso tale, ia e sa kilai keitou na Kalou. Au nuitaka ni nomuni lewaeloma e sa uqeti kemuni moni kila tale ga se keitou tamata vakacava.
12 Keitou sega ni tukutukuni keitou tiko vei kemuni, ia keitou tukuna qo me uqeti kemuni moni sakitaki keitou, me isogo ni gusudra era sakitaka tiko na ka ena kena irairai ga e sau,+ sega ena vuku ni ka dina e vu mai loma.
13 Ke sa ca na ulu i keitou,+ e ca ena vuku ni Kalou, ke vinaka, e vinaka ena vukumuni.
14 Ni uqeti keitou na loloma i Karisito, e va kina qo na neitou lewa, e mate e le dua ena vukuda kece,+ baleta nida mate kece.
15 E mate ena vukuda kece mera kua kina ni bula ena vukudra ga+ o ira era bula tiko, mera bula ga ena vuku i koya e mate ena vukudra, qai vakaturi cake.
16 O koya gona, tekivu qo lako yani keitou sega ni kila tale e dua ena rai vakayago.+ Ke keitou a kilai Karisito mada ga ena rai vakayago, keitou sa sega tale ni qai kilai koya qo.+
17 O koya gona, o koya e duavata kei Karisito ena kabuli vou,+ sa na takali na veika makawa, raica! sa ra basika na veika vou.
18 Na ka kece e vakavuna na Kalou, o koya e vakaduavatataki keitou tale vua ena vuku i Karisito,+ qai solia vei keitou na itavi ni veivakaduavatataki,+
19 ya me keitou tukuna yani ni Kalou e vakaduavatataka na vuravura vua+ ena vuku i Karisito, e sega ni nanuma tiko ga na nodra ivalavala ca,+ e lesia tale ga vei keitou na vosa ni veivakaduavatataki.+
20 O keitou na mata,+ keitou matataki Karisito,+ ni keitou veivakauqeti e sa veivakauqeti sara tiko ga na Kalou. Ni keitou matataki Karisito keitou vakamasuti kemuni kina: “Moni mai duavata tale kei na Kalou.”
21 O koya e sega ni kila na ivalavala ca,+ e sa qai vakarautaki koya na Kalou me isoro ni noda ivalavala ca, meda okati kina meda tamata yalododonu ni Kalou+ ena vukuna.
