iMatai ni Veigauna 28:1-21
28 E soqoni ira kece na turaga ni Isireli i Jerusalemi o Tevita: o ira na turaga ni yavusa, o ira na iliuliu ni iwasewase+ era qarava na tui, o ira na turaga ni vica vata na udolu kei na vica vata na drau,+ o ira na turaga ni nona iyau kece kei na nona manumanu na tui+ kei na nodratou na luvena tagane,+ vaka kina o ira na vakailesilesi ni valenitui kei ira kece na tamata qaqa era yaga.+
2 E tucake sara o Tui Tevita e kaya:
“Ni rogoci au, kemuni na taciqu kei na noqu tamata. E gagadre ni lomaqu meu tara e dua na vale me vakacegu kina na kato ni veiyalayalati i Jiova me itutuniyava ni noda Kalou,+ au sa vakarau tu meu tara.+
3 Ia e kaya vei au na Kalou dina, ‘O na sega ni tara na vale ena yacaqu,+ ni o tamataivalu, o vakadavedra tale ga.’+
4 E digi au o Jiova na Kalou ni Isireli mai na vuvale kece i tamaqu meu tui Isireli me tawamudu,+ ni a digi Juta me iliuliu,+ ia mai na vuvale i Juta na vuvale i tamaqu,+ vei ira na luvei tamaqu, e vakadonui au ga meu nodra tui na Isireli taucoko.+
5 Vei ira kece na luvequ tagane, ni solia vei au o Jiova e levu na luvequ tagane,+ e digi Solomoni+ na luvequ me dabe ena idabedabe vakaturaga ni matanitu i Jiova me lewai Isireli.+
6 “E kaya vei au, ‘Na luvemu o Solomoni ena tara na noqu vale kei na noqu raranivale, niu digi koya me luvequ, au na tamana.+
7 Au na vakataudeitaka na nona matanitu me tawamudu+ ke nakita dei me vakayacora na noqu ivakaro kei na noqu lewa+ me vaka e vakayacora tiko qo.’
8 Au mani tukuna e matadra na Isireli taucoko, na ivavakoso i Jiova, ni vakarorogo tiko na noda Kalou: Moni muria vinaka, moni qara na ivakaro kece i Jiova na nomuni Kalou moni taukena kina na vanua vinaka,+ moni qai solia me nodra ivotavota tudei na luvemuni era taravi kemuni.
9 “O iko Solomoni na luvequ, mo kila na Kalou i tamamu, mo qaravi koya ena lomamu taucoko,*+ mo* marautaka,* ni kila na loma+ ni tamata kece o Jiova, e kila tale ga na nodra vakanananu kece.+ Ke o qarai koya o na kunei koya,+ ke o biuti koya ena biuti iko o koya me tawamudu.+
10 Ia qo mo kila ni digitaki iko o Jiova mo tara e dua na vale me valenisoro. Mo yaloqaqa, mo cakava.”
11 E qai solia o Tevita vei Solomoni na luvena na peleni+ ni varada+ kei na kena veivale, na rumuniyau, na rumu ena tabavale e cake, na rumu e loma kei na vale isogonikato.*+
12 E solia vua na peleni ni ka kece e tukuna vua na yalo tabu me baleta na rara ni vale+ i Jiova, na rumunikana kece e vakavolivolita, na valeniyau ena vale ni Kalou dina kei na vale e maroroi kina na iyaya vakatabui,*+
13 kei na nodra iwasewase na bete+ kei na Livai, na cakacaka kece me qaravi kina na vale i Jiova kei na iyaya kece ni veiqaravi ena vale i Jiova,
14 na bi ni koula, na koula ena iyaya kece e vakayagataki ena duidui veiqaravi, na bi ni iyaya siliva kece, kei na iyaya kece e vakayagataki ena duidui veiqaravi,
15 kei na bi ni itutu ni cina koula+ kei na kena cina koula, na bi ni itutu ni cina yadua kei na kena cina, na bi ni itutu ni cina siliva, na itutu ni cina yadua kei na kena cina me vaka e dau vakayagataki kina,
16 na bi ni koula ena teveli ni madrai yatuni*+ ena teveli yadua, kei na siliva ena teveli siliva,
17 na icula, na boulu, na itakitaki koula dina, na bi ni boulu koula lalai+ ena boulu lalai yadua, kei na bi ni boulu siliva lalai ena boulu lalai yadua.
18 E solia tale ga na bi ni koula savasava me caka kina na icabocabo ni ka boivinaka,+ na ivakatakarakara ni qiqi+ oya na jerupi+ koula erau vakatetaba tu me rau vakaruguta na kato ni veiyalayalati i Jiova.
19 E kaya o Tevita: “E tiko vei au na liga i Jiova, e vakavukui au meu vola+ vakamatailalai na peleni qo.”+
20 E mani kaya o Tevita vei Solomoni na luvena: “Mo yaloqaqa, mo kaukaua, mo cakava sara. Mo kua ni rere se domobula, ni tokoni iko+ na Kalou o Jiova, na noqu Kalou. Ena sega ni vakanadakui iko se biuti iko,+ ia ena tokoni iko me yacova ni oti na cakacaka kece ni veiqaravi ena vale i Jiova.
21 Qo na nodra iwasewase na bete+ kei ira na Livai+ me baleta na veiqaravi kece ena vale ni Kalou dina. Era tiko vata kei iko o ira na kenadau era tu vakarau mera qarava na cakacaka kece,+ vaka kina o ira na turaga+ kei ira kece na lewenivanua era na muria na nomu vosa kece.”
iVakamacala e ra
^ Se “ena yalodina.”
^ Se “mo lomasoli.”
^ Ipe., “neʹphesh.” Raica na iVakamacala ni Vosa.
^ Se “vale ni veibuluti.”
^ Se “iyaya savasava.”
^ Oya na madrai dauraici.
