iMatai ni Tui 9:1-28

  • Rairai tale vei Solomoni o Jiova (1-9)

  • iLoloma nei Solomoni vei Tui Airami (10-14)

  • Levu na ka e tara o Solomoni (15-28)

9  Ni tara oti ga o Solomoni na vale i Jiova, na valenitui,+ kei na ka kece e via cakava o Solomoni,+  e rairai tale vei Solomoni o Jiova ena ikarua ni gauna me vaka na nona rairai vua mai Kipioni.+  E kaya vua o Jiova: “Au sa rogoca na nomu masu kei na nomu kerekere vei au, au sa vakatabuya na vale qo o tara me tiko kina na yacaqu+ me tawamudu, ena tiko ga e kea na mataqu kei na lomaqu.+  Ia o iko, ke o lako e mataqu me vakataki Tevita na tamamu+ ena yalodina+ kei na yalododonu+ ni o vakayacora na ka kece au vakaroti iko kina,+ o muria na noqu lawa kei na noqu lewa,+  au na vakataudeitaka na idabedabe vakaturaga ni nomu matanitu mo lewai Isireli me tawamudu, me vaka au yalataka vei Tevita na tamamu, niu kaya, ‘Ena tiko e dua ena nomu iyatukawa me dabe ena idabedabe vakaturaga e Isireli.’+  Ia ke oni vakanadakui au kei ira na luvemuni moni kua ni muri au, moni sega ni vakayacora na noqu ivakaro kei na noqu lawa au solia vei kemuni, oni lako moni qarava eso tale na kalou moni cuva vei ira,+  au na vakarusai Isireli mai na vanua au sa solia vei ira,+ au na biuta tani mai mataqu+ na vale au sa vakatabuya ena yacaqu, ena vosabeci*o Isireli, era na vakalialiai koya na lewe ni veivanua kece.+  Ena vuki na vale qo me ibinibini vatu.+ Era na vakararai kece ena kidroa o ira na lakosivita, era na vakalukalu ra qai kaya, ‘Na cava e cakava kina qori o Jiova ena vanua qo kei na vale qo?’+  Era na kaya, ‘Nira biuti Jiova na nodra Kalou, o koya e kauti ira cake na tukadra mai na vanua o Ijipita, era vakabauta eso tale na kalou, era cuva vei ira ra qai qaravi ira. Qori na vuna e vakayacora kina o Jiova na ca kece qo vei ira.’”+ 10  Oti e 20 na yabaki nona tara tiko o Solomoni e rua na vale, na vale i Jiova kei na valenitui,+ 11  e vakarautaka o Airami+ na tui Taia vei Solomoni na kau sitari, na kau junipa, kei na koula ena kena levu e vinakata o koya+ qai solia vei Airami o Tui Solomoni e 20 na koro ena vanua o Kalili. 12  E biuti Taia sara o Airami me lai raica na koro e solia vua o Solomoni, ia e sega ni donu vua qori.* 13  E kaya o koya: “Na koro vakacava o solia qo vei au taciqu?” Era qai vakayacani me Vanua o Kepuli* me yacova mai na siga qo. 14  Ia e vakauta o Airami vua na tui e 120 na taledi* koula.+ 15  Qo na kedra itukutuku na tamata cakacaka+ e vakarota o Tui Solomoni mera tara na vale i Jiova,+ na nona vale,* na Buke,*+ na bai kei Jerusalemi, o Asori,+ o Mekito,+ kei Keseri.+ 16  (E lako cake o Fero na tui Ijipita me valuti Keseri qai vakama ena bukawaqa, e vakamatei ira tale ga na kai Kenani+ era tiko ena koro. E mani solia na koro me iloloma ni veitalatala* vua na luvena yalewa,+ na wati Solomoni.) 17  E tarai* Keseri o Solomoni, o Pecioroni i Ra,+ 18  o Pealaci,+ kei Tema ena vanua talasiga, ena vanua, 19  na koro kece ni iyau nei Solomoni, na koro ni qiqinivalu,+ na nodra koro na dauvodo ose, kei na ka e via tara o Solomoni e Jerusalemi, e Lepanoni, kei na vanua kece e lewa. 20  Ia o ira kece na vo ni Amoraiti, na Itaiti, na Perisaiti, na Aivaiti kei na Jepusaiti+ era sega ni wili vata kei ira na Isireli,+ 21  era sega ni vakarusa na Isireli na nodra kawa era vo ena vanua, mani kacivi ira o Solomoni mera cakacaka vakabobula me yacova mai na siga qo.+ 22  Ia e sega ni dua na Isireli e vakabobulataka o Solomoni,+ nira nona dauvala, era nona dauveiqaravi, era nona turaga vakaitutu, era nona turaganivalu, era turaga ni nona qiqinivalu, kei na nona dauvodo ose. 23  Era le 550 na nodra turaga na vakailesilesi era lewa na cakacaka i Solomoni, era vakatawai ira na cakacaka tiko.+ 24  Ia e lako cake mai na Koro i Tevita+ na luvena yalewa o Fero+ me lako ina nona vale e tara vua o Solomoni, oti e tara o koya na Buke.*+ 25  E cabora vakatolu e veiyabaki+ o Solomoni na isoro kama kei na isoro ni veiyaloni ena icabocabonisoro a tara me nei Jiova,+ e dau vakama tale ga na isoro kubou ena icabocabonisoro e tu ena mata i Jiova, e mani vakaotia na vale o koya.+ 26  E taya tale ga o Tui Solomoni eso na waqa mai Esioni-keperi+ volekati Eloci, ena matasawa ni Wasa Damudamu ena vanua o Itomi.+ 27  E talai ira na nona dauveiqaravi o Airami ena so na waqa,+ o ira na kaiwaqa era kila vinaka na wasawasa, mera cakacaka vata kei ira na dauveiqaravi nei Solomoni. 28  Era lako i Oferi,+ era kauta mai kea e 420 na taledi koula ra qai kauta vei Tui Solomoni.

iVakamacala e ra

Ipe., “vosa vakaibalebale.”
Ipe., “sega ni donu e matana.”
Se rawa ni, “na Vanua Sega na Betena.”
Dua na taledi e 34.2 na kilokaramu (1,101 na onisi). Raica na iKuri B14.
Se “valenitui.”
Se “Milo.” Na vosa vakaIperiu e kena ibalebale “bulu.”
Se “iloloma ni vakamau, ikaukau nei yalewa.”
Se “baitaki.”
Se “Milo.” Na vosa vakaIperiu e kena ibalebale “bulu.”