iMatai ni Tui 5:1-18
5 Ni rogoca o Airami na tui Taia+ ni sa lumuti o Solomoni me tui me sosomitaki tamana, e talai ira na nona dauveiqaravi vei Solomoni, ni o Airami e dau itokani nei Tevita.*+
2 E talatala sara o Solomoni vei Airami:+
3 “O kila vinaka ni sega ni tara rawa na tamaqu o Tevita e dua na vale ena yaca i Jiova na nona Kalou nira valuti koya mai na veiyasana kece, me biuti ira mada na kena meca o Jiova ena ruku ni qeteqeteniyavana.+
4 Ia qo e vakacegui au o Jiova na noqu Kalou ena veiyasana kece.+ E sega ni dua me vorati au, e sega tale ga ni dua na ka ca e yaco tiko.+
5 Au via tara gona e dua na vale ena yaca i Jiova na noqu Kalou me vaka e yalataka o Jiova vei Tevita na tamaqu, e kaya: ‘Na luvemu tagane au na vakatikora ena nomu idabedabe vakaturaga me sosomitaki iko ena tara na vale ena yacaqu.’+
6 Mo vakaroti ira na nomu tamata mera taya vei au na sitari mai Lepanoni.+ Era na cakacaka vata na noqu dauveiqaravi kei ira na nomu dauveiqaravi, au na solia tale ga na kedra isau na nomu dauveiqaravi me vaka na isau o tukuna, ni o kila ni sega ni dua vei keimami e kila na ta kau me vakataki ira na kai Saitoni.”+
7 Ni rogoca o Airami na vosa i Solomoni e marau vakalevu, e kaya: “Me vakacaucautaki mada ga nikua o Jiova ni solia vei Tevita e dua na luvena vuku me lewa na iwiliwili tamata levu qo!”+
8 Sa qai talatala o Airami vei Solomoni: “Au sa rogoca na vosa o tukuna mai. Au na vakarautaka kece na ka o vinakata, na tolo ni sitari kei na tolo ni junipa.+
9 Era na kauta sobu mai Lepanoni i waitui na noqu dauveiqaravi, au na vesuvesuka na tolonikau me bilibili qai vakacirima e waitui ina vanua o tukuna vei au. Au na seresereka e kea mo qai kauta. Ia o na solia na kedra na lewe ni noqu vuvale+ me vaka au kerea.”
10 E mani solia kece o Airami na kau na sitari kei na junipa vei Solomoni me vaka na ka kece e vinakata.
11 E solia o Solomoni vei Airami e 20,000 na ko* na ivakarau witi me kedra na nona vuvale kei na 20 na ko waiwai olive* vinaka sara. Qori na ka e solia o Solomoni vei Airami e veiyabaki.+
12 E solia na vuku o Jiova vei Solomoni me vaka e yalataka vua.+ Erau veisaututaki o Airami kei Solomoni rau qai veiyalayalati.
13 E kacivi ira na tamata cakacaka mai Isireli taucoko o Tui Solomoni, era le 30,000 na tamata cakacaka.+
14 E dau tala vakaiwasewase e le 10,000 e veivula i Lepanoni. E dua na vula mera tiko e Lepanoni, e rua na vula mera tiko ena nodra vale, e lewai ira na tamata cakacaka o Etonirami.+
15 Era le 70,000 na tamata era daucakacaka* vei Solomoni, era le 80,000 na dauta vatu+ ena ulunivanua,+
16 vaka kina e 3,300 na vakailesilesi+ nei Solomoni era ivakatawa ni cakacaka mera raici ira na tamata cakacaka.
17 Sa qai vakarota na tui mera kelia na vatu lelevu, na vatu saulevu+ me yavu+ ni vale na vatu sa ta oti.+
18 Era ta vatu na matai nei Solomoni, o ira na matai nei Airami kei ira na kai Kipali,+ era vakarautaka tale ga na kau kei na vatu me tara kina na vale.
