iMatai ni Tui 4:1-34

  • Matanitu nei Solomoni (1-19)

  • Sautu na veiliutaki nei Solomoni (20-28)

    • Tikovinaka ena ruku ni vunivaini kei na vunilolo (25)

  • Vuku nei Solomoni kei na nona vosa vakaibalebale (29-34)

4  E veiliutaki e Isireli taucoko o Tui Solomoni.+  Qo o ira na nona turaga vakaitutu: o Asaraia na luvei Setoki+ na bete,  o Iliorevi kei Eaija na luvei Saesa erau vunivola,+ o Josafati+ na luvei Ailute e dauvola na ka ni matanitu,  o Penaia+ na luvei Jioiata na iliuliu ni mataivalu, o Setoki kei Epaiaca+ erau bete,  o Asaraia na luvei Necani+ e nodra iliuliu na vakailesilesi, o Seputi na luvei Necani e bete, e nona itokani na tui,+  o Esari e lewa na lewenivale, o Etonirami+ na luvei Apita e liutaki ira na tamata cakacaka.+  E 12 na vakailesilesi nei Solomoni me ratou liutaki ira kece na Isireli, eratou vakarautaka na kena kakana na tui kei na nona vuvale. Eratou dui lesi me ratou vakarautaka na kakana ena dua na vula ena veiyabaki.+  Qo na yacadratou: Na luvei Ure ena veiulunivanua e Ifireimi,  na luvei Tekeri e Makasi, e Selipimi,+ e Pecisemesi kei Eloni-pecianani, 10  na luvei Eseti e Erupoci (e nona o Soko kei na vanua kece o Eferi), 11  na luvei Epinatapi ena baba kece e Doa (e wati Tafaci na luvena yalewa o Solomoni), 12  o Pana na luvei Ailute e Tenaki, e Mekito+ kei Pecisiani+ taucoko, e volekati Saricani e ruku i Jesirieli, mai Pecisiani i Epeli-meola me yacova sara na yasayasa o Jokimiami,+ 13  na luvei Kiperi e Remoci-kiliati+ (e nona na koro vakavalelaca nei Jairi+ na luvei Manasa e tiko e Kiliati,+ e nona tale ga na yasayasa o Arikopi+ e tiko e Pasani:+ e 60 na koro lelevu vakabai, e kopa na kedra ivakadei), 14  o Einatapi na luvei Ito e Meneimi,+ 15  o Eimasi e Nafitalai (e kauti Pasemaca, e dua tale na luvei Solomoni me watina), 16  o Pana na luvei Usai e Aseri kei Paloci, 17  o Josafati na luvei Parua e Isakari, 18  o Semeai+ na luvei Ela e Penijamini,+ 19  o Kiperi na luvei Urei ena vanua o Kiliati,+ na vanua i Sioni+ na nodra tui na Amoraiti kei Oki+ na tui Pasani. E dua tale ga na vakailesilesi e lewai ira na vakailesilesi kece ena vanua. 20  Era lewe levu na Juta kei na Isireli me vaka na mataninuku ni wasawasa,+ era kana era gunu era marau tiko vakalevu.+ 21  E lewa taucoko o Solomoni na matanitu mai na Uciwai*+ ina nodra vanua na kai Filisitia me yacova na iyalayala kei Ijipita. Era kauta mai na iloloma ra qai qaravi Solomoni ena nona bula taucoko.+ 22  Na kakana e vakarautaki vei Solomoni e veisiga e 30 na ko* na ivakarau falawa vinaka sara kei na 60 na ko na ivakarau falawa, 23  e 10 na bulumakau yagovinaka, e 20 na bulumakau mai na vanua veico, e 100 na sipi, kei na so na dia tagane, na kaseli, na ropuki, kei na manumanuvuka yagovinaka. 24  Ni lewa tiko o koya na ka kece ena tai ni Uciwai*+ qo, mai Tifisa i Kesa,+ kei ira taucoko na tui ena tai ni Uciwai qo, e marautaka o koya na vakacegu ena vanua taucoko e voliti koya.+ 25  Era tikovinaka na Juta kei ira na Isireli, era dui tiko ena ruku ni nodra vunivaini kei na ruku ni nodra vunilolo mai Tani me yaco i Pieri-sepa ena gauna kece i Solomoni. 26  E 4,000* na valeniose nei Solomoni me maroroi kina na nona qiqinivalu, kei na 12,000 na ose.*+ 27  Era vakarautaka na vakailesilesi qo na kakana vei Tui Solomoni kei ira kece na kana ena teveli nei Tui Solomoni. Era dui veiqaravi ga ena nodra vula, ra qai raica me tiko kece na ka.+ 28  Era kauta tale ga yani na varile kei na tolonicovuata madu ena vanua kece e vinakati kina me kedra na ose kei na qeleniose me vaka era dui lesi kina. 29  E solia vakalevu na Kalou vei Solomoni na vuku kei na yalomatua, vaka kina na lomasoli* me vaka na nuku ni matasawa.+ 30  Na vuku i Solomoni e uasivia na nodra vuku na tamata kece mai na Tokalau kei na nodra vuku kece na kai Ijipita.+ 31  E vuku sara vei ira na kena vo, vei Icani+ na kawa nei Sira, vei Imani,+ vei Kalikoli+ kei Tarita o ratou na luvei Maoli, e rogo ena veimatanitu kece.+ 32  E bulia* e 3,000 na vosa vakaibalebale,+ e 1,005 na nona sere.+ 33  E dau vakamacalataka na kau, mai na sitari ni Lepanoni ina isopi+ era salava na bai, e dau vakamacalataka na manumanu,+ na manumanuvuka,+ na manumanu qasi+ kei na ika. 34  Era lako mai na lewe ni veivanua mera rogoca na vuku i Solomoni, era rogoca tale ga na tui e vuravura taucoko na nona vuku.+

iVakamacala e ra

Oya na Uferetisi.
Dua na ko e 220 na lita. Raica na iKuri B14.
Oya na ra ni Uferetisi.
Na fika qo e kunei ena so na ivolavivigi kei na tikinivolatabu veisemati. E kaya eso tale na ivolavivigi ni 40,000.
Se “dauvodo ose.”
Se “loma e kila rawa na ka.”
Se “cavuta.”