iMatai ni Tui 3:1-28
3 E bukia o Solomoni na isema ni vakawati vei Fero na tui Ijipita. E vakawatitaka* na luvei Fero goneyalewa+ qai kauti koya ina Koro i Tevita+ me tara oti mada na nona vale,+ kei na vale i Jiova,+ kei na bai e voliti Jerusalemi.+
2 Ia era vakacaboisoro tiko ga na tamata ena vanua cecere+ ni se sega ni tara+ e dua na vale ena yaca i Jiova me yacova mai na gauna oya.
3 E lomani Jiova tiko ga o Solomoni ni muria na lewa i Tevita na tamana, ia e vakacaboisoro qai vakama na isoro kubou ena vanua cecere.+
4 E lako i Kipioni na tui me vakacaboisoro ni rogo levu na vanua cecere+ oya. E cabora o Solomoni e 1,000 na isoro kama ena icabocabonisoro+ qori.
5 E mani rairai o Jiova ena tadra vei Solomoni ena bogi mai Kipioni qai kaya na Kalou: “Mo kerea mada na ka meu solia vei iko.”+
6 E kaya sara o Solomoni: “Oni vakaraitaka vakalevu na dei ni nomuni loloma vua na nomuni dauveiqaravi o Tevita na tamaqu ni lako e matamuni ena yalodina, ena ivalavala dodonu kei na yalododonu. Oni vakaraitaka tiko ga na dei ni loloma levu qo me yacova mai nikua, ni oni solia vua e dua na luvena tagane me dabe ena nona idabedabe vakaturaga.+
7 Ia qo kemuni Jiova na noqu Kalou, oni lesia na nomuni dauveiqaravi me tui me sosomitaki Tevita na tamaqu, ia au se gone ga, se lailai na ka au kila.*+
8 Na nomuni dauveiqaravi e maliwai ira tiko na nomuni tamata oni digitaka,+ e dua na iwiliwili tamata levu e sega ni tukuni se wiliki rawa.
9 Moni solia mada ga vua na nomuni dauveiqaravi na yalo ni talairawarawa me lewai ira kina na nomuni tamata,+ me vakaduiduitaka na ka e vinaka kei na ka e ca,+ ni o cei ena lewai ira rawa na nomuni tamata era lewe levu* qo?”
10 E taleitaka sara ga o Jiova ni kerea qo o Solomoni.+
11 E qai kaya vua na Kalou: “Ni o kerea na ka qo, o sega ga ni kerea mo bula balavu,* se mo vutuniyau, se mera mate na kemu meca, ia o kerea ga mo yalomatua mo rogoca kina na kisi ni veilewai,+
12 au na vakayacora na ka o kerea.+ Au na solia vei iko na lomavuku kei na yalomatua+ me kua sara ni dua e bula e liu mo drau tautauvata, ena sega sara ni dua me vakataki iko.+
13 Au na solia tale ga vei iko na ka o sega ni kerea,+ na iyau kei na rogo+ me kua kina ni dua na tui me vakataki iko ena nomu bula taucoko.*+
14 Ke o na lako ena noqu sala ni o muria tiko ga na noqu lawa kei na noqu ivakaro me vaka e vakayacora o Tevita na tamamu,+ au na vakabalavutaka tale ga na nomu bula.”*+
15 Ni yadra mai o Solomoni e qai kila ni a tadra. E Iako sara i Jerusalemi, e duri ena mata ni kato ni veiyalayalati i Jiova me cabora na isoro kama kei na isoro ni veiyaloni,+ qai vakarautaka e dua na magiti vei ira kece na nona dauveiqaravi.
16 Ena gauna oya erau lako mai e rua na saqamua me rau duri e matana na tui.
17 E kaya na imatai ni yalewa: “Yalovinaka noqu turaga, keirau vakaitikotiko kei na yalewa qo ena dua na vale, a tiko e vale ena gauna au vakasucu kina.
18 Oti e tolu na siga ni noqu vakasucu, e vakasucu tale ga na yalewa qo. Keirau tiko vata ga, e sega tale ni dua e tiko vata kei keirau e vale, o keirau ga.
19 E mate ena bogi na luvena* na yalewa qo ni davoci koya.
20 E mani duri o koya ena lomalomanibogi, e kauta na luvequ mai yasaqu ni moce tu na nomuni yalewa dauveiqaravi qai lai vakadavora e ligana,* e mai vakadavora na luvena sa mate tu e lomaserequ.
21 Niu duri ena mataka meu vakasucuma na luvequ, au raica ni sa mate tu. Au mani vakaraici koya vinaka ena mataka, au raica ni sega ni luvequ au vakasucuma.”
22 Ia e kaya na yalewa kadua: “Sega, se bula tiko na luvequ, na luvemu ga sa mate!” Ia e kaya tiko ga na imatai ni yalewa: “Sega, sa mate na luvemu, e bula tiko na luvequ.” Erau veiba tiko va qori e matana na tui.
23 E qai kaya na tui: “E kaya tiko o ka qo, ‘Na luvequ qo, e bula tiko, na luvemu ga sa mate!’ e kaya o ka ya, ‘Sega, na luvemu ga sa mate, na luvequ e bula tiko!’”
24 E mani kaya na tui: “Dou kauta mai vei au e dua na iseleiwau.” Era kauta sara na iseleiwau vua na tui.
25 E qai kaya na tui: “Dou musuka rua na gone e bula tiko, dou solia vei rau na yalewa qo me rau yadua.”
26 Sega ni bera ni vakamasuta na tui na yalewa e bula tiko na luvena, ni tuburi koya na nona lomani luvena. E kaya: “Yalovinaka noqu turaga! Moni solia ga vua na gone e bula tiko. Ni kua sara ni vakamatea!” Ia e tukuna tiko ga na yalewa kadua: “Ena sega ni noqu se nomu! Me musu rua ga!”
27 E kaya sara na tui: “Dou solia vua na imatai ni yalewa na gone e bula tiko! Dou kua sara ni vakamatea, qori ga na tinana.”
28 Era rogoca taucoko e Isireli na lewa sa tauca na tui, dua na ka na nodra qoroya na tui+ nira raica ni tiko vua na vuku ni Kalou me vakataulewa+ kina.
iVakamacala e ra
^ Se “taura.”
^ Ipe., “au sega ni kila noqu curu yani se curu mai.”
^ Se rawa ni, “dredre.” Ipe., “bibi.”
^ Ipe., “me levu nomu siga.”
^ Ipe., “nomu siga taucoko.”
^ Ipe., “vakabalavutaka na nomu siga.”
^ Se “luvena tagane.”
^ Ipe., “lomaserena.”
