iMatai ni Tui 22:1-53

  • Tovata o Josafati kei Eapi (1-12)

  • Parofisaitaka o Maikaia na druka (13-28)

    • Vakacalai Eapi e dua na yalo lasulasu (21, 22)

  • Vakamatei o Eapi e Remoci-kiliati (29-40)

  • Tui Juta o Josafati (41-50)

  • Tui Isireli o Esaia (51-53)

22  E sega ni veivaluvaluti o Siria kei Isireli me tolu na yabaki.  Ena ikatolu ni yabaki e lako sobu vei tui Isireli+ o Tui Josafati+ e Juta.  E tukuna sara o tui Isireli vei ira na nona tamata: “Oni kila ni noda o Remoci-kiliati?+ Ia eda lomalomarua ni taura mai e liga i tui Siria.”  E mani tukuna vei Josafati: “O na tomani au ena ivalu i Remoci-kiliati?” E kaya sara o Josafati vua na tui Isireli: “Edaru duavata o kedaru. Era duavata na noqu tamata kei na nomu tamata. E duavata na noqu ose kei na nomu ose.”+  Ia e kaya o Josafati vei tui Isireli: “Au kerea mo taroga e liu+ na vosa i Jiova.”+  E kumuni ira sara na parofita na tui Isireli, e rauta ni le 400 na tamata, e tukuna vei ira: “Meu valuti Remoci-kiliati se kua?” Era kaya: “Moni lako cake, ena solia o Jiova e ligamuni na tui.”  E kaya sara o Josafati: “E sega tale ni dua na parofita i Jiova e tiko eke? Meda tarogi koya tale ga.”+  E kaya sara na tui Isireli vei Josafati: “E vo tiko e dua me daru tarogi Jiova kina,+ ia au sega ni taleitaki koya+ ni sega ni dau parofisaitaka na ka vinaka me baleti au, na ka ca ga.+ Na yacana o Maikaia na luvei Imila.” Ia e kaya o Josafati: “Me kua ni tukuna qori na tui.”  E kaciva sara na tui Isireli e dua na nona vakailesilesi, e kaya: “Mo kauti Maikaia mai vakatotolo na luvei Imila.”+ 10  E dabe toka na tui Isireli kei Josafati na tui Juta ena nodrau dui idabedabe vakatui ena rara ni butu covuata ena matamata e Samaria, erau vakaisulu tale tu ga ni tui, ra qai parofisai tiko na parofita kece e matadrau.+ 11  E qai bulia o Setekaia na luvei Kinana eso na ileu kaukamea me nona, e kaya: “Qo na ka e tukuna o Jiova, ‘O na cumuti ira na kai Siria ena ka qo mo vakarusai ira.’” 12  E va tale ga qori na nodra parofisai na vo ni parofita kece, era kaya: “Moni lako cake i Remoci-kiliati moni qaqa, ena solia o Jiova e ligamuni na tui.” 13  E kaya vei Maikaia na italai a lai kacivi koya mai: “Raica! E dua ga na ka era tukuna kece na parofita vua na tui, e vinaka vua. Yalovinaka me va tale ga qori na ka o tukuna, me vinaka na ka o kaya.”+ 14  Ia e kaya o Maikaia: “Me vaka ni bula dina tiko o Jiova, na ka e tukuna vei au o Jiova, au na tukuna.” 15  E qai lako o koya vua na tui, e tarogi koya na tui: “Maikaia, me keimami lai valuti Remoci-kiliati se kua?” E tukuna sara: “Moni lako cake moni qaqa, ena solia o Jiova e ligamuni na tui.” 16  E kaya na tui: “Au tukuna vakavica vei iko mo bubului mo tukuna vei au na ka dina ena yaca i Jiova?” 17  E mani kaya o Maikaia: “Au raica nira veiseyaki tu na Isireli kece ena veiulunivanua+ me vaka na sipi e sega na kedra ivakatawa. E kaya o Jiova: ‘Sa sega na nodra turaga. Mera dui lesu ena vakacegu ina nodra vale.’” 18  E kaya sara na tui Isireli vei Josafati: “Au a sega ni tukuna vei iko, ‘Ena sega ni parofisaitaka o koya na ka vinaka me baleti au, na ka ca ga’?”+ 19  E kaya o Maikaia: “Moni rogoca mada na vosa i Jiova: Au raici Jiova ni dabe toka ena nona idabedabe vakaturaga,+ era duri tu e yasana na mataivalu kece vakalomalagi ena nona imatau kei na nona imawi.+ 20  E qai kaya o Jiova, ‘O cei ena vakacalai Eapi me lako cake qai bale mai Remoci-kiliati?’ E tukuna va qo e dua, e dua tale e tukuna va ya. 21  E lako yani e dua na kabula vakayalo*+ me duri ena mata i Jiova, e kaya, ‘Au na vakacalai koya.’ E tarogi koya o Jiova, ‘O na cakava vakacava?’ 22  E kaya o koya, ‘Au na lako yani, au na dua na yalo lasulasu e gusudra na nona parofita kece.’+ E mani kaya, ‘O na vakacalai koya, o na rawai koya tale ga. Mo lako mo cakava qori.’ 23  E qai vakacuruma o Jiova e dua na yalo lasulasu ena gusudra na nomuni parofita kece,+ ia e tukuna o Jiova ni oni na leqa kina.”+ 24  E toso yani o Setekaia na luvei Kinana, e sabica na balu i Maikaia qai kaya: “E biuti au vakacava na yalo i Jiova me vosa vei iko?+ 25  E kaya o Maikaia: “Raica! O na raica ena siga o na curu kina ena rumu sara e loma mo vunitaki iko.” 26  E kaya na tui Isireli: “Dou kauti Maikaia dou soli koya vei Emoni na iliuliu ni koro kei Joasi na luvenitui. 27  Dou kaya vei rau, ‘Qo na ka e tukuna na tui: “Drau biuta na tamata qo e valeniveivesu,+ drau vakalailaitaka na kena iwasewase ni madrai kei na mena wai meu lesu mada mai ena vakacegu.”’” 28  Ia e kaya o Maikaia: “Ke oni lesu dina mai ena vakacegu, e sega ni vosa vei au o Jiova.”+ E tomana: “Moni rogoca kece na lewe ni veivanua.” 29  Rau mani lako cake i Remoci-kiliati na tui Isireli kei Josafati na tui Juta.+ 30  E tukuna sara na tui Isireli vei Josafati: “Au na vakalecaleca au na qai lako yani ina ivalu, ia o iko mo tokara na nomu isulu vakatui.” E vakalecaleca sara na tui Isireli+ qai lako ina ivalu. 31  Ia na tui Siria e vakaroti ira na 32 na turaga ni nona qiqinivalu:+ “Moni kua ni valuta e dua e lailai se levu, moni valuta ga na tui Isireli.” 32  Nira raici Josafati ga na turaga ni qiqinivalu, era kaya: “Qo dina ga na tui Isireli.” Era vuki sara mera valuti koya, e tekivu kere veivuke o Josafati. 33  Nira raica ga na turaga ni qiqinivalu ni sega ni tui Isireli oya, era suka mera kua ni muri koya. 34  Ia e vanataka wale* na nona dakaititi e dua na tamata, mani lauta na isema ni nona isulunivalu na tui Isireli. E qai kaya na tui vei koya e kauta tiko na nona qiqinivalu: “Mo vuki mo kauti au tani ena ivalu* niu sa vuetaki vakaca.+ 35  E katakata na ivalu ena siga taucoko oya, era vakaduria na tui ena loma ni kareti nira qara tiko vei ira na kai Siria. E drodrova na loma ni qiqinivalu na dra ni nona mavoa, mani mate ena yakavi.+ 36  Ni voleka ni dromu na siga e kacivaki ena keba: “Moni dui lako ina nomuni koro! Moni dui lako ina nomuni vanua!”+ 37  Sa mate na tui, e kau yani i Samaria, era qai buluta na tui e Samaria. 38  Nira savata na qiqinivalu ena tobu e Samaria, era dramica na koli na nona dra ra qai sili e kea na saqamua,* me vaka na vosa e cavuta o Jiova.+ 39  Na vo ni itukutuku me baleti Eapi, na ka kece e cakava, na vale* tabua+ e tara kei na koro kece e tara, e volai ena ivola ni itukutuku ni nodra gauna na tui Isireli? 40  E qai davo vata kei ira na tukana o Eapi,+ e veiliutaki sara o Esaia+ na luvena tagane me sosomitaki koya. 41  Ia e tui Juta o Josafati+ na luvei Esa ena ikava ni yabaki i Tui Eapi e Isireli. 42  E veiliutaki o Josafati ni sa yabaki 35, e veiliutaki e Jerusalemi me 25 na yabaki. Na yaca i tinana o Asupa na luvei Sili. 43  E muria tiko ga na ivalavala kece i Esa+ na tamana. E sega ni biuta, ni cakava na ka e donu ena mata i Jiova.+ E sega ga ni kau tani na vanua cecere, era cabora tiko ga na tamata na isoro kei na isoro kubou ena vanua cecere.+ 44  E veiyaloni tiko ga o Josafati kei na tui Isireli.+ 45  Na vo ni itukutuku me baleti Josafati, na nona kaukaua kei na nona vala, e volai ena ivola ni itukutuku ni nodra gauna na tui Juta? 46  E cemuri ira tani tale ga ena vanua na tagane saqamua ni valenisoro+ era vo tiko ena gauna i Esa na tamana.+ 47  E sega na tui e Itomi,+ e tui tiko ga e dua na vakailesilesi.+ 48  E cakava tale ga o Josafati eso na waqa ni Tasisi* me soko i Oferi me usana mai na koula,+ ia era sega ni lako nira voca na waqa e Esioni-keperi.+ 49  E kaya sara vei Josafati o Esaia na luvei Eapi: “Mera lako vata na noqu tamata kei ira na nomu tamata ena waqa,” ia e sega ni vakadonuya o Josafati. 50  E qai davo vata kei ira na tukana+ o Josafati, e bulu kei ira na tukana ena Koro i Tevita na tukana, e veiliutaki sara o Jorami+ na luvena me sosomitaki koya. 51  Ia e tui Isireli e Samaria o Esaia+ na luvei Eapi ena ika17 ni yabaki i Tui Josafati e Juta, e veiliutaki e Isireli me rua na yabaki. 52  E cakava tiko ga na ka ca ena mata i Jiova, e muria tiko ga na ivalavala i tamana+ kei tinana,+ kei na ivalavala i Jerepoami na luvei Nipati, e vakavuna mera valavala ca na Isireli.+ 53  E qaravi Peali tiko ga,+ e cuva tiko vua qai vakacudrui Jiova tiko ga na Kalou ni Isireli+ me vaka na ka e cakava o tamana.

iVakamacala e ra

Se “agilosi.”
Se “sega ni nakita.”
Ipe., “keba.”
Se rawa ni, “na vanua era sili kina na saqamua, era dramica na koli na nona dra.”
Se “valenitui.”