iMatai ni Tui 21:1-29
21 Oti na ka kece qo, e yaco e dua na ka ena loganivaini nei Nepoci na kai Jesirieli+ e tiko e Jesirieli, volekata na valenitui nei Eapi na tui Samaria.
2 E mani tukuna vei Nepoci o Eapi: “Mo solia vei au na nomu loganivaini me noqu iteitei ni kakana draudrau ni volekata na noqu vale. Au na qai solia vei iko e dua na loganivaini vinaka sara me kena isosomi. Ke o vinakata au na solia vei iko na ilavo me kena isau.”
3 Ia e kaya o Nepoci vei Eapi: “Au na sega tu ga ni solia vei kemuni na nodra ivotavota na tukaqu ni vakatabuya sara ga o Jiova.”+
4 E mani lako ina nona vale o Eapi ena yalobibi kei na rarawa ena ka e tukuna o Nepoci na kai Jesirieli, ni a tukuna: “Au na sega ni solia vei kemuni na nodra ivotavota na tukaqu.” E davo sara ena nona idavodavo, e golea tani na matana qai sega ni via kana.
5 E lako yani vua o Jesepeli na watina,+ e tarogi koya: “Na cava o* rui rarawataka mo sega ni kana kina?”
6 E tukuna vua o Eapi: “Au a kaya vei Nepoci na kai Jesirieli, ‘Mo solia vei au na nomu loganivaini me kena isau na ilavo. Ke o vinakata, au na solia vei iko e dua tale na loganivaini me kena isosomi.’ Ia e kaya o koya, ‘Au na sega ni solia vei kemuni na noqu loganivaini.’”
7 E kaya vua o Jesepeli na watina: “O sega ni tui Isireli? Mo duri, mo kana, me marau na lomamu. Au na solia vei iko na loganivaini nei Nepoci na kai Jesirieli.”+
8 E mani vola o Jesepeli na ivola ena yaca i Eapi qai dregata ena mama ni tui,+ e vakauta sara vei ira na qase+ kei ira na turaga era tiko ena koro nei Nepoci.
9 E vola ena ivola: “Moni kacivaka e dua na lolo, moni vakadaberi Nepoci e matadra na tamata.
10 Moni vakadabera tale ga e rua na tagane macawa e matana, me rau beitaki koya+ ni rau kaya: ‘O vosavakacacataka na Kalou kei na tui!’+ Moni qai kauti koya i tuba, moni vakaviriki koya ena vatu me mate.”+
11 Era mani cakava na lewe ni nona koro, o ira na qase kei ira na turaga era tiko ena nona koro na ka e volai ena ivola e vakauta vei ira o Jesepeli.
12 Era kacivaka e dua na lolo ra qai vakadaberi Nepoci e matadra na tamata.
13 Erau curu yani e rua na tagane macawa, erau dabe sara e matana, erau tekivu beitaki Nepoci e matadra na tamata, erau kaya: “O Nepoci a vosavakacacataka na Kalou kei na tui!”+ Oti qori era kauti koya ina ibili ni koro ra qai vakaviriki koya ena vatu me mate.+
14 Era mani talatala vei Jesepeli, era kaya: “Sa mate o Nepoci ni vakaviriki ena vatu.”+
15 Ni rogoca ga o Jesepeli ni sa mate o Nepoci ni vakaviriki ena vatu, e kaya sara vei Eapi: “Mo tucake, mo lai taukena na loganivaini nei Nepoci na kai Jesirieli+ a bese ni solia vei iko me kena isau na ilavo, ni sega tale ni bula tiko o Nepoci. Sa mate o koya.”
16 Ni rogoca ga o Eapi ni sa mate o Nepoci, e tucake sara o Eapi me lako sobu ina loganivaini nei Nepoci na kai Jesirieli me taukena.
17 Ia e vosa o Jiova vei Ilaija+ na turaga ni Tisipa, e kaya:
18 “Tucake, lako sobu mo lai tavaki Eapi na tui Isireli e tiko e Samaria.+ E tiko ena loganivaini nei Nepoci, na vanua e lako kina me taukena.
19 Mo kaya vua, ‘Qo na ka e tukuna o Jiova: “O vakamatea e dua+ mo taura tale ga na nona qele?”’+ Mo tukuna vua, ‘Qo na ka e kaya o Jiova: “Na vanua era dramica kina na koli na dra i Nepoci, era na dramica kina na koli na nomu dra.”’”+
20 E kaya o Eapi vei Ilaija: “O sa kunei au o iko na kequ meca!”+ E kaya o koya: “Au sa kunei kemuni. ‘Ni oni nakita* moni cakava na ka ca ena mata i Jiova,+
21 au na kauta mai vei kemuni na ka ca, au na taviraki kemuni tani, au na muduka tale ga na tagane* kece+ ena vuvale i Eapi, wili kina o ira na vakaloloma kei ira na malumalumu e Isireli.+
22 Au na cakava na nomu vuvale me tautauvata kei na vuvale i Jerepoami+ na luvei Nipati, me tautauvata kei na vuvale i Pasa+ na luvei Eaija ni o vakacudrui au, o qai vakavuna me valavala ca o Isireli.’
23 Ena vuku i Jesepeli tale ga, e kaya o Jiova: ‘Era na kani Jesepeli na koli ena tikiniqele e Jesirieli.+
24 O koya e nei Eapi e mate ena koro ena kani koya na koli, o koya e mate ena veikau ena kani koya na manumanuvuka ni lomalagi.+
25 E sega tale ni dua me vakataki Eapi+ ni nakita* sara ga me cakava na ka ca ena mata i Jiova, ni uqeti koya kina o Jesepeli na watina.+
26 E torosobu sara ga na ka e cakava ni muri ira tiko na matakau vakasisila,* me vaka na ka era cakava kece na Amoraiti e cemuri ira o Jiova e matadra na Isireli.’”+
27 Ni rogoca ga o Eapi na vosa qori, e dresulaka na nona isulu, e vakaisulutaga, e lolo, e davo tiko ga ena isulutaga qai veilakoyaki voli ena lomabibi.
28 E qai vosa o Jiova vei Ilaija na turaga ni Tisipa:
29 “O sa raica na nona vakamalumalumu vei au o Eapi?+ Ni vakamalumalumutaki koya vei au, au na sega ni kauta mai na ka ca ena nona gauna. Au na qai kauta ga mai na ka ca ina nona vuvale ena gauna i luvena.”+
iVakamacala e ra
^ Ipe., “e rarawataka na lomamu.”
^ Ipe., “volitaki kemuni.”
^ Ipe., “dua e suasua e lalaga.” Na ivosavosa vakaIperiu ni veibeci me baleti ira na tagane.
^ Ipe., “volitaki koya.”
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
